AKORANGA 07

He Pēhea te Āhua o Ihowa?

PUREI

He aha ōu whakaaro mō Ihowa, mō te Atua? He mea whakamīharo rānei ia mamao atu i a koe, pērā i ngā whetū o tētahi ikarangi kei tawhiti? He rite rānei ia ki te āwhā whatitiri, he kaha engari ehara i te tuakiri? He pēhea rawa te āhua o Ihowa? Mā tāna Kupu, te Paipera, e whakakitea ana mai e Ihowa ōna āhua, me tōna whakaaro ki a koe.

1. He aha tātou kāhore nei e kite i te Atua?

“He Wairua te Atua.” (Hoani 4:24) Kāhore he tinana kikokiko o Ihowa. He Wairua ia e noho ana ki te rangi, he wāhi e kore e kitea e tātou.

2. He aha ētahi āhuatanga o Ihowa?

Kāore a Ihowa e kitea, engari he Tuakiri pono ia ka arohaina ina mōhio tātou ki a ia, he ātaahua nōna. E kī ana te Paipera: “E aroha ana hoki a Ihowa ki te ritenga pai, e kore anō e whakarere i tāna hunga tapu.” (Ngā Waiata 37:28) He “tino nui (tōna) aroha me tāna mahi tohu,” inā tonu ki te hunga e mamae ana. (Hēmi 5:11) “E tata ana a Ihowa ki te hunga ngākau marū; ka whakaorangia anō e ia te hunga wairua iro.” (Nga Waiata 34:18) Otirā, i mōhio rānei koe ka pāngia a Ihowa e a tātou mahi? Pāpōuri ana ia i te tangata e mahi ana i te kino. (Ngā Waiata 78:40, 41) Koa hoki ana ia i te tangata e mahi ana i te tika.—Pānuitia Ngā Whakataukī 27:11.

3. Ka whakaatu pēhea a Ihowa e aroha ana ia ki a tātou?

Kei runga noa atu te aroha o Ihowa. Inā hoki, “He aroha te Atua.” (1 Hoani 4:8) E whakakitea ana e Ihowa tōna aroha, kāhore i te Paipera anake, engari i ngā mea hoki i hangā e ia. (Pānuitia Ngā Mahi 14:17.) Hei tauira, whakaarohia tāna hanga i a tātou. Hōmai ana e ia te kaha kia kite i ngā tae ātaahua, kia rongo puoro pārekareka, kia rongo i ngā kai tino reka. E hiahia ana ia kia hari tātou i te ora.

KIMI MĀRAMATANGA

Akona he pēhea i taea e Ihowa āna mahi mīharo. Kitea hoki he pēhea e whakaaturia ana e Ihowa ōna āhua ātaahua.

4. Wairua tapu—Te kaha pakari o te Atua

Pēnei i a tātou ka whakamahi nei i ō tātou ringaringa, ka whakamahi a Ihowa i tōna wairua tapu. E whakamārama ana te Paipera ehara te wairua tapu i te tuakiri, engari ko te kaha o te Atua ki te mahi mea. Pānuitia Ruka 11:13 me Ngā Mahi 2:17, kōrerotia ēnei pātai:

Ka “ringihia” e te Atua tōna wairua tapu ki a rātou e inoia ana. Nā reira, ki tōu whakaaro he tuakiri rānei te wairua tapu, ko te kaha pakari rānei o te Atua? He aha koe ka kōrero pēnā ai?

E mahi ana a Ihowa i ngā mea mīharo mā tōna wairua tapu. Pānuitia Ngā Waiata 33:6 me 2 Pita 1:20, 21, kōrerotia tēnei pātai:

Kua whakamahi pēheatia e Ihowa tōna wairua tapu?

5. He ātaahua te āhua o Ihowa

He pononga pono a Mohi nā te Atua, engari i pīrangi ia kia mōhio pai ake ki tōna Kaihanga. Nā ka mea a Mohi ki a ia: “Whakaaturia mai ki ahau ōu ara, kia mōhio ai ahau ki a koe.” (Ekoruhe 33:13) Hei whakautu, i kōrerotia e Ihowa ētahi āhua ōna ki a Mohi. Pānuitia Ekoruhe 34:4-6, kōrerotia ēnei pātai:

He aha ōna āhua i whakaatu a Ihowa ki a Mohi?
Ko ēhea o ngā āhua o Ihowa ngā mea pai rawa ki a koe?

6. E whakaaro ana a Ihowa ki te tangata

He pononga i Īhipa te iwi a Ihowa, ngā Hīperu. I pēhea te ngākau o Ihowa i te mamaetanga o tāna iwi? Whakarongo ki te ORORONGO ka whai atu, pānuitia Ekoruhe 3:1-10 rānei. Kōrerotia ngā pātai ka whai ake.

ORORONGO: I Whakaaro a Ihowa Ki Ō Rātou Mamae (2:45)

I tēnei kōrero, he pēhea te ngākau o Ihowa ki te mamae o te tangata?—Tirohia ngā rārangi 7 me 8.
Ki tōu whakaaro, e tino hiahia ana rānei a Ihowa ki te āwhina i te tangata, ā, ka taea rānei e ia? He aha ai, he aha i kore ai rānei?