SAK A 07

Bõe la d mi Wẽnnaam a Zeova zugu?

ÉCOUTER EN

Yãmb sã n tagsd Wẽnnaam a Zeova yelle, bõe n wat y yamẽ? Yãmb tagsdame t’a yaa kãsenga, n zãr ne ninsaalbã hal tɩ ned pa tõe n yɩ a zoa bɩ? Bɩ yãmb tagsdame t’a tara pãng wʋsgo, n tõe n sãam bũmb fãa n pa zoe nimbãanega, wa sa-kãsenga? Sɩd-sɩda, a Zeova yaa wãn to? Biiblã pʋgẽ, b wilgda a Zeova sẽn yaa Wẽnnaam ning buudã, la b wilgdẽ me tɩ yãmb yell pak-a lame.

1. Bõe yĩng tɩ tõnd pa tõe n yã Wẽnnaam?

“Wẽnnaam yaa Sɩɩga.” (Zã 4:24) A Zeova pa tar yĩn-nems wa tõnd ye. A yaa Sɩɩga, n be saasẽ.

2. Biibã pʋgẽ, bõe la b yet a Zeova zugu?

Yaa sɩd tɩ tõnd pa tõe n yã a Zeova ye. La d sã n bao n bãng-a, d na n bãnga bũmb toor-toor sẽn na n kɩt tɩ d nong-a. Biiblã pʋgẽ, b yetame t’a Zeova “nonga tɩrlem, la bãmb ka basd sẽn maand-b pʋ-peelem ne bãmbã ye.” (Yɩɩn-sõamyã 37:28) Sẽn paase, ‘a tara nonglem wʋsgo, la a yaa nimbãan-zoɛta,’ sẽn yɩɩd fãa ne neb nins sẽn namsdã. (Zak 5:11) A Zeova “pẽe sũ-sãang rãmbã, la b fãagda sũ-pa-noaang rãmbã.” (Yɩɩn-sõamyã 34:19) Yãmb miime tɩ tõnd manesmã tõe n nooga a Zeova sũuri, wall n sãam a sũur bɩ? Ned sã n yãk yam n maand sẽn yaa wẽnga, sãamda a sũuri. (Yɩɩn-sõamyã 78:40, 41) La ned sẽn maand sẽn yaa tɩrg noogda a sũuri.—Karm-y Yel-bũn 27:11.

3. Wãn to la a Zeova wilgd t’a nonga tõndo?

Nonglmã n yaa a Zeova zʋg-sõng ning sẽn yaa kãseng n tɩ yɩɩdã. Sɩd me, Biiblã pʋgẽ, b pa yet bal tɩ Wẽnnaam tara nonglem ye. B yetame tɩ “Wẽnnaam yaa nonglem.” (1 Zã 4:8) Pa Biiblã pʋgẽ bal la a Zeova wilgd t’a yaa nonglem soab ye. Bũmb nins a sẽn naanã me wilgda rẽ. (Karm-y Tʋʋm 14:17.) Wala makre, tags-y a sẽn naan tõnd to-to wã yelle. A naana tõnd tɩ d tõe n yã bũmb toor-toor kõbg tɩ noom-do, n kelg mizik wall d lemb rɩɩb n bãng a noom. A ratame tɩ d vɩɩmd ne sũ-noogo.

D BAO N BÃNG N PAASE

D ges bũmb ning a Zeova sẽn tũnugd ne n maand bõn-kãsemsã. Rẽ poore, d na n yãa a Zeova sẽn wilgd a sẽn yaa Wẽnnaam ning buudã to-to.

4. Vʋʋsem sõngã yaa Wẽnnaam pãnga

A Zeova tũnugda ne a vʋʋsem sõngã n tʋmdẽ, wa tõnd sẽn tar d nusã n tʋmdẽ wã. Biiblã pʋgẽ, b wilgdame tɩ vʋʋsem sõngã pa Wẽnnaam ye. Yaa pãng ning Wẽnnaam sẽn tar n maand bũmb fãa wã. Karm-y Luk 11:13 la Tʋʋm 2:17, tɩ rẽ poor bɩ y leok sogsgã:

B yeelame tɩ Wẽnnaam na n “pʋdga” a vʋʋsem sõngã neb nins sẽn kot-a wã zugu. Woto wã, yãmb tagsdame tɩ vʋʋsem sõngã yaa Wẽnnaam bɩ, bɩ yaa Wẽnnaam pãnga? Bõe yĩnga?

A Zeova tũnugda ne a vʋʋsem sõngã n maand bõn-kãsemse. Karm-y Yɩɩn-sõamyã 33:6 la 2 Pɩyɛɛr 1:20, 21, tɩ rẽ poor bɩ y leok sokrã:

Bõe ne bõe la a Zeova tũnug ne a vʋʋsem sõngã n maane?

5. A Zeova sẽn yaa Wẽnnaam ning buudã bee yamleoogo

A Moyiiz ra maanda sɩd ne Wẽnnaam, la a ra rat n bãng a Naandã sõma. Rẽ n so t’a Moyiiz yeel-a yaa: “Mam kotame tɩ y kɩt tɩ mam bãng yãmb soayã, dẽ, mam na bãng yãmba.” (Yikri 33:13) A Zeova leoka a Moyiizi, n wilg-a a sẽn yaa Wẽnnaam ning buudã. Karm-y Yikr 34:4-6, tɩ rẽ poor bɩ y leok sogsgã:

Bõe la a Zeova yeel a Moyiiz sẽn na yɩl t’a bãng a sẽn yaa Wẽnnaam ning buudã?
Bõe n noom yãmb a Zeova nengẽ?

6. A Zeova rata ninsaalbã neere

Ebre-rãmbã sẽn da yaa Wẽnnaam nin-buiidã ra bee Ezɩpt n yaa yembse. A Zeova manesem yɩɩ wãn ne b sẽn da namsdã? Kelg-y ODIO wã, wall y karem Yikr 3:1-10. Rẽ poor bɩ y leok sogsgã.

ODIO: B namsgã ra sãamda a Zeova sũuri (2:45)

Bõe la kiba-kãngã sõngd yãmb tɩ y bãng a Zeova tagsg sẽn yaa soab ninsaalbã namsgã wɛɛngẽ?—Ges-y vɛrse a 7 ne a 8.
Yãmb tagsdame t’a Zeova sɩd rat n sõnga ninsaalbã, la t’a tõe n sõng-b lame bɩ? Bõe yĩnga?

7. D tõe n gesa a Zeova sẽn naanã n bãng a sẽn yaa Wẽnnaam ning buudã

A Zeova tũnugda ne bũmb nins a sẽn naanã n wilgd a sẽn yaa Wẽnnaam ning buudã. Ges-y VIDEO wã. Rẽ poor bɩ y karem Rom dãmb 1:20, la y leok sokrã.