ISAMBILILO 07
Uzye e Yehova Wawa Wuli?
Uzye ukakwelenganya ukuti e Yehova wawa wuli? Uzye ukamwelenganya ukuti wawa nkaninye na maka, swinya wawa ukutali wulyanye vino tukalola intanda ica kuti tutanga tuwe iviwuza vyakwe? Nanti ukamwelenganya ukuti acintu vye cimwi ica maka cino cawa ngati akupanta kwa mvula? Nomba tungati e Yehova wawa wuli? E Baibolo ikatunena imiwele yino Yehova wawa nayo. Ikatunena nu kuti akatusakamala.
1. Amulandu ci wuno tutanga tulole Leza?
“Leza Amuzimu.” (Yohani 4:24) E Yehova atawa nu muwili ndi wuno twawa nawo. Asiloleka swinya akakwikala kwi yulu kuno tutanga tulole.
2. Amiwele ci yimwi yino Yehova wawa nayo?
Kweni tutanga tulole e Yehova, lelo nga twamumanya, tukamukunda nkaninye amuno wawa ni miwele yino ikalenga tuwavwambisya ukumupalamila. E Baibolo ikalanda ukuti: “Imfumu e Leza [e Yehova] wakunda uwuzima, swinya asilecelezya awantu wakwe” awacisinka. (Amalumbo 37:28) Swinya e Yehova wawa “nu luse ulukulu ni nkumbunye,” maka maka ku wantu wano wakuyimba. (Jemusi 5:11) E Yehova akawa mupipi “na wantu wano wasi ni nsimpo; akatula wano isuwilo lyawo lyapelela.” (Amalumbo 34:18) Uzye wamanya kuno tungasecelesya Yehova nanti ukumulumisya umwezo? Umuntu wino akasolapo ukucita iviwipe akamusonzya insoni swinya akamulumisya umwezo. (Amalumbo 78:40, 41) Lelo wino akacita ivizima akamusecelesya.—Wazya Imilumbe 27:11.
3. Uzye e Yehova akalanjizya wuli ukuti watukunda?
Pa miwele yonsinye yino wawa nayo, ulukundo aluno lwakulisya. E ‘Leza alukundo.’ (1 Yohani 4:8) E Yehova asitulanjizya vye ulukundo ukupitila mwe Baibolo, lelo akalanjizya ukuti watukunda na mwe vyo welewula. (Wazya Imilimo 14:17.) Ku cakulolelako, teyelenganyako vye pe vyo watwelewula. Watwelewula mu nzila ya kuti twalola amakala, twakwivwa indwimbo inzima, swinya twakwivwa na vino ivya kulya vinonile. Akalonda twakwivwa icete ukuwa nu wumi.
SAMBILILA IVICILE PA-A
Sambilila vino Yehova akacita ivintu vya kuzungusya. Nu kulola vino akatulanjizya imiwele yakwe imizima.
4. Umuzimu uwutele—amaka yano Leza akawomvya
Wulyanye vino tukawomvya amakasa pakuwomba incito, avino ne Yehova nye akawomvya umuzimu uwutele. E Baibolo ikatunena ukuti umuzimu uwutele asa muntu, lelo amaka yano Leza akawomvya pa kucita ivintu. Wazyani Luka 11:13 na Imilimo 2:17, nu kulanzyanya ya-a amawuzyo:
-
Nga cakuti e Leza ‘akapungulila’ umuzimu wakwe uwutele kwe wano wakumulenga, uzye ungati umuzimu uwutele amuntu? Amulandu ci wuno wasucila wowo?
E Yehova akawomvya umuzimu wakwe uwutele mukucita ivintu ivya kuzungusya. Wazyani Amalumbo 33:6 ne 2 Peter 1:20, 21, nu kulanzyanya lyo-o iwuzyo:
-
Amunzila ci zimwi muno Yehova wawomvezizyemo umuzimu wakwe uwutele?
5. E Yehova wawa ni miwele imizima yino ikatupalamika kwe weliwe
Nanti aca kuti e Musa walinji amuwomvi wa kwe Leza uwa cisinka, walondanga sana ukumanya Kelewula wakwe. Wanenile Yehova ukuti: “Nkukulambilizya ukuti unene vino ukulonda kwako kuli, alyakuti manye, ngandange nkakusechelesya.” (Ukufuma 33:13) E Yehova wasusile e Musa pano wamunenile imiwele yimwi yino wawa nayo. Wazyani Ukufuma 34:4-6, nu kulanzyanya ya-a amawuzyo:
-
Amiwele ci yo Yehova wawa nayo yino wanenile Musa?
-
Pa miwele yonsinye iya kwe Yehova, ayili kwinye yino ikakufika sana pa mwezo?
6. E Yehova wawikako sana amano ku wantu
AwaHeberi, awantu wa kwe Leza, walinji awazya mu Egypt. Nomba e Yehova wayivwanga wuli wo-o vino awantu wakwe wayimbanga? Lizyani AMAZWI nu kunkonkamo, nanti wazyani Ukufuma 3:1-10. Apano mulanzyanye amawuzyo yano yakonkapo.
-
Uzye lyo-o ilyasi lyakwavwa ukumanya ukuti e Yehova akayivwa wuli pe vino awantu wakwe wakayimba? (Lolani versi 7 nu 8.)
-
Uzye ukwelenganya ukuti e Yehova akalondesya ukwavwa awantu swinya wawa na maka yakuwavwa? Amulandu ci wuno wasucila wowo?
7. Tungasambilila imiwele ya kwe Yehova ku vintu vino welewula
E Yehova akatusambilizya imiwele yino wawa nayo ukupitila mwe vino welewula. Tambani e VIDYO. Apano muwazye Waroma 1:20, nu kulanzyanya iwuzyo lino lyakonkapo.
-
Amiwele ci iya kwe Yehova yino ukalola mu vintu vino wapanga?
WAMWI WAKATI: “Leza asa muntu, wawa mu cifuwa ca muntu.”
-
Nga wewe ukutipo wuli?
-
Amulandu ci wuno ukayivwila wowo?
IVISINKA VIKULU
E Yehova tutanga tumulole. Lelo wawa ni miwele imizima imivule nkaninye yino ikatupalamika kwe weliwe, ulukundo aluno lwakulisya pe yonsinye.
Avyani Vino Wasambilila?
-
Amulandu ci wuno tusilola e Yehova?
-
Uzye umuzimu uwutele acani?
-
Amiwele ci yimwi yino Yehova wawa nayo?
MANYILAPO NA VINJI
Sambilila na vinji pa miwele imicindamisye 4 yino Yehova wawa nayo.
“Uzye e Leza Wawa Wuli?” (Ulupungu lwa kwa Kalinda Na. 1 2019)
Lola uwusinincizyo wuno wukalanjizya ukuti e Yehova atawa apali ponsinye swinya mu vintu ivili consinye.
“Uzye e Leza Wawa Apali Ponsinye?” (Icipande ca pa webusayiti)
Lola umulandu wuno e Baibolo ikalandila pa muzimu uwutele ukuti amakasa ya kwe Leza.
Umonsi wumwi intonko waposilwe ukuzumila ukuti Leza wamukunda. Lola cino calenzile ukuti apiluke.
“Pe Yo-o Impindi Nkayivwa Ukuti Ningavwako Wanji” (Ulupungu lwa kwa Kalinda, October 1, 2015)
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
