CILONGESA 07

Vati ua fua Yehova?

ZIKULENU

Vati ua fua Yehova?

Kuli yenu, vati ua fua Yehova Njambi? Vuno mue ku mu singanieka ku pua umo mukua ku vuisa liova kaha ua kala ku laako netu ngeci mua vintangantanga ni? Mue ku mu singanieka ku pua mukua ngolo, vunoni ka kele na vifua via vuntu ngeci mua muhiato ni? Vati ua fua mpundu Yehova? Ku hitila mu Lizi lieni Mbimbiliya, Yehova ua solola vifua vieni na seho ya mi haka.

1. Omo lia vika ka tue ku hasa ku mona Njambi?

“Njambi ikeye Sipilitu.” (Yoano 4:24) Yehova ka kele na muvila ua ntsitu na maninga. Ua pua sipilitu kaha ua kala muilu, ka citava ku mu mona.

2. Vifua vika ua kala navio Yehova?

Vutuhu ka tu hasa ku mu mona, vunoni kua kala mpundu kaha ua kala na vifua via lingisa vaze va mu tantekeya va mu leme. Mbimbiliya nguayo: “Yehova ua lema vuoloke kaha ke ku seza veni vakua ku lela.” (Visamo 37:28) Cikuavo naua, “Muangana ikeye na sulu na nkeke ikeye mukua cikeketima,” cikuma-kuma kuli vaze vali mu lamba. (Tiango 5:11) “Yehova ali ha hiehi na vaze va li na mutima ua ku-tsa, Kaha ohiela vaze vali na cimbembesi ca ku vavala.” (Visamo 34:18) Mua tantekeyele ngecize vilinga vietu vi hasa ku vuisa Yehova ndzolela ci pue vusiua ni? Muntu ue ku hangula ku linga via ku vihia ue ku mu futula ku mutima na ku mu vuisa vusiua vua kama. (Visamo 78:40, 41) Vunoni muntu ue ku hangula ku linga via cili ue ku vuisa Yehova ndzolela.—Tandenu Visimo 27:11.

3. Vati Yehova ua muesa ngecize ua tu lema?

Cifua ca Yehova ca tsimana cikuma, cilemo. Ni tu handeke vene nguetu, “Njambi ikeye cilemo.” (1 Yoano 4:8) Yehova ue ku muesa cilemo ceni kati lika ku hitila mu Mbimbiliya, vunoni ku hitila naua mu viuma via tangele. (Tandenu Vilinga 14:17.) Ca ku muenako, tu ci hilulenu ku cifua ca tu tangelelemo. Ua tu hana vuhasi vua ku mona mavala a cili, ku ivua miaso ya ku tovala na ku ivua ku tovala ca via ku-lia. Cili vene ua tonda tu yoye mu ndzolela.

TANTEKEYENU VIKUAVO

Tantekeyenu via pangesele Yehova mu ku puisamo viuma via ku komouesa. Kaha talenu vati Yehova ue ku muesa vifua vieni via cili.

4. Sipilitu santu—Ngolo ye ku pangesa Njambi

Yehova ue ku pangesa sipilitu santu yeni ngue muze mu tue ku pangesa yetu mavoko mu ku linga viuma. Mbimbiliya ya muesa ngecize sipilitu santu ka ya puile muntu, vunoni ya pua ngolo ye ku pangesa Njambi mu ku linga viuma. Tandenu Luka 11:13 na Vilinga 2:17, kaha simutuilenu ha vihula vi na hatako.

Njambi a ka “muaniena” sipilitu santu hali vaze ve ku mu vundilayo. Mu ku mona cenu, vuno sipilitu santu ya pua muntu ni ya pua ndzili ya Njambi? Omo lia vika?

Yehova ue ku pangesa sipilitu santu yeni mu ku puisamo viuma via ku komouesa. Tandenu Visamo 33:6 na 2 Petulu 1:20, 21, kaha mu nima yaco simutuilenu ha cihula eci:

Mu vinjila vika Yehova ua pangesele sipilitu santu yeni?

5. Yehova ua kala na vifua vie kuya ku mitima

Mosesa ua puile ngamba ya Njambi ua ku ononoka, vunoni ua tondele ku tantekeya vuino Sakatanga ueni. Ngeci ua mu lekele ngueni: “Nji lekese vuovuno, zinjila ziove linga nji ku tantekeye.” (Ezundu 33:13) Ngeci Yehova ua mu lekesele vimo vifua vieni via cili. Tandenu Ezundu 34:4-6, kaha mu nima yaco simutuilenu ha vihula vi na hatako:

Vifua vika ua lekesele Yehova kuli Mosesa?
Vifua vika via Yehova vie ku miya cikuma ku mutima?

6. Yehova ua haka seho ku vantu

Vangamba va Njambi vaHevelu, va puile vandungo mu Ingito. Vati lamba li va muene lia vuisile Yehova ku mutima? Halakanenu AUDIO kaha kavangeyenu ni tandenu Ezundu 3:1-10. Mu nima yaco simutuilenu ha vihula vi na hatako.

AUDIO: Yehova ua Hakele Seho ku Lamba Yavo (2:45)

Vika mua lilongesa ku muzimbu ou ku tuala ha cifua ce ku livuilamo Yehova mue ku mona vantu va yanda?—Talenu vinanga 7 na 8.
Mu ku mona cenu, vuno Yehova a tonda mpundu ku kuasa vantu kaha ua kala na ngolo ya ku lingamo ni? Nga eyo ni houe, omo lia vika?