ISIFUNDO 07
UJehova NguNkulunkulu Onjani?
Kufikani engqondweni yakho nxa ucabanga ngoJehova uNkulunkulu? Ucabanga ukuthi uphakeme kakhulu okokuthi ngeke sibe ngabangane bakhe yini? Kumbe ubona angani uNkulunkulu ngamandla nje agcwele yonke indawo? Unjani sibili uJehova? ILizwi lakhe iBhayibhili liyasitshela ukuthi unguNkulunkulu onjani lokuthi ulendaba lawe.
1. Kungani singenelisi ukubona uNkulunkulu?
“UNkulunkulu unguMoya.” (UJohane 4:24) Lokhu kutsho ukuthi uJehova kalamzimba onjengowethu abantu. Asingeke simbone ngoba unguMoya njalo uhlala ezulwini.
2. Unjani uNkulunkulu?
Lanxa singeke simbone uNkulunkulu, singenelisa ukwazi ukuthi unjani futhi lokhu kuzakwenza simthande kakhulu. IBhayibhili lithi: “UJehova uthanda ukwahlulela okuhle, kasoze abalahle abaqotho kuye.” (IHubo 37:28) “Ulozwelo olukhulu futhi ulesihawu” ikakhulu nxa ebona abantu behlupheka. (UJakhobe 5:11) “UJehova useduze lalabo abalenhliziyo ezidabukileyo, uyabasiza labo abadanileyo.” (IHubo 34:18) Ubukwazi yini ukuthi esikwenzayo kungamthokozisa kumbe kumdanise uJehova? Kuyamdanisa ukubona abantu besenza izinto ezimbi. (IHubo 78:40, 41) Kodwa umuntu owenza okulungileyo uyamthokozisa.—Bala iZaga 27:11.
3. UJehova utshengisa njani ukuthi uyasithanda?
UJehova waziwa kakhulu ngothando lwakhe. IBhayibhili lithi: “UNkulunkulu uluthando.” (1 UJohane 4:8) Uthando lwakhe sifunda ngalo eBhayibhilini siphinde silubone lasezintweni azidalileyo. (Bala imiSebenzi 14:17.) Ngokwesibonelo, indlela asidale ngayo itshengisa uthando lwakhe. Kuyasithokozisa ukubona amaluba amahle, ukuzwa umculo omnandi kanye lokudla ukudla okutshiyeneyo okumnandi. Lokhu kutshengisa ukuthi ufuna siyikholise sibili impilo.
GEBHA UJULE
Engxenyeni le uzafunda ukuthi uJehova uwusebenzisa njani umoya wakhe ongcwele lokuthi unguNkulunkulu onjani.
4. Umoya ongcwele ngamandla kaNkulunkulu
UJehova usebenzisa umoya ongcwele ukuze enze loba yini ayifunayo, njengoba nje lathi sisebenzisa izandla ukuze senze imisebenzi etshiyeneyo. IBhayibhili liveza ukuthi umoya ongcwele kawusomuntu kodwa ngamandla uNkulunkulu awasebenzisa ukwenza loba yini. Bala uLukha 11:13 lemiSebenzi 2:17 beselixoxa ngemibuzo elandelayo:
-
UNkulunkulu ‘uyathulula umoya’ wakhe ongcwele ebantwini abawucelayo. Manje ubona angathi umoya ongcwele ngumuntu kumbe ngamandla kaNkulunkulu? Yindaba usitsho njalo?
UJehova usebenzisa umoya wakhe ongcwele ukuze enze imisebenzi etshiyeneyo. Bala iHubo 104:30 lo-2 Phetro 1:20, 21 beselixoxa ngombuzo lo:
-
UJehova wawusebenzisa njani umoya wakhe ongcwele?
5. UJehova ulobuntu obenza simthande
Lanxa uMosi wayeselesikhathi eside eyinceku kaNkulunkulu, wayelokhu efisa ukwazi okunengi ngoMdali wakhe. Ngakho wancenga uNkulunkulu wathi: “Ngicela ungifundise indlela zakho ukuze ngikwazi.” (U-Eksodusi 33:13) UJehova wamphendula ngokumtshela ukuthi unguNkulunkulu onjani. Bala u-Eksodusi 34:4-6 beseliphendula imibuzo le:
-
UJehova wamtshelani uMosi?
-
Yibuphi ubuntu bukaJehova obuthanda kakhulu?
6. UJehova ulendaba labantu
UJehova wezwa njani ngesikhathi ebona ama-Israyeli eyizigqili eGibhithe? Lalelani UKUBALWA KWEBHAYIBHILI kumbe libale u-Eksodusi 3:1-10 beselixoxa ngemibuzo elandelayo.
-
UJehova uzwa njani nxa ebona abantu behlupheka?—Khangela ivesi 7 lo-8.
-
Ucabanga ukuthi uJehova uyafuna yini ukunceda abantu lokuthi ulawo amandla okwenza njalo? Kungani usitsho njalo?
7. Izinto ezidaliweyo ziyasifundisa ukuthi uJehova unjani
Nxa sikhangela izinto ezidaliweyo siyabona ukuthi uJehova unguNkulunkulu onjani. Bukelani IVIDIYO. Ngemva kwalokho balani uRoma 1:20 beselixoxa ngombuzo olandelayo.
-
Izinto ezidaliweyo ziveza ukuthi uJehova ulobuntu obunjani?
ABANYE BATHI: “UNkulunkulu kasomuntu kodwa ngamandla nje amakhulu agcwele yonke indawo.”
-
Wena uthini?
-
Kungani usitsho njalo?
ISIFINQO
Asingeke simbone uJehova ngoba unguMoya. Loba kunjalo ulobuntu obenza simthande futhi waziwa ngokuthi ulothando.
Ufundeni?
-
Kungani singeke simbone uJehova?
-
Uyini umoya ongcwele?
-
UJehova ulobuntu obunjani?
THOLA OKUNENGI
Bala isihloko lesi uzwe ngezi- mpawu zobuntu bukaJehova ezine ezizakunceda ukuthi umthande kakhulu.
Bala isihloko lesi uzwe ukuthi kungani uJehova engasomandla nje agcwele yonke indawo.
“UNkulunkulu Utholakala Yonke Indawo Yini?” (Isihloko esikuwebhusayithi yethu)
Bala isihloko lesi uzwe ukuthi kungani iBhayibhili lifanisa umoya ongcwele lezandla zikaNkulunkulu.
Indoda engaboniyo yayingakholwa ukuthi uNkulunkulu ulendaba layo. Bala isihloko lesi uzwe ukuthi kuyini okwenza yatshintsha indlela eyayicabanga ngayo.
“Khathesi Sengisenelisa Ukuncedisa Abanye Abantu” (INqabayokulinda, October 1, 2015)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
