WANGƆ 07

Yehova ndo du ngasia?

Ngoi mɛ mɔ ndo da bɛ mɔ na Yehova Nzapa ko, mɔ ndo hũ lo ngasia? Mɔ ndo hũ ya lo kotani nvɛ̃ni, lo yɔngɔrɔni na mɔ nga ma se mɛ atongolo yɔngɔrɔni na e? Bere mɔ ndo da bɛ mɔ ya lo na ngunu gba wa ta lo ndo li nzɔ̃ kpale tɛrɛ azi ma nga ma gbekpa? Yehova ndo du nvɛ̃ni ngasia? Kaya Ngbangɔ mɛ tɛnɛ tɛ lo, lo kambisa hɛ̃ e aseliye tɛ lo mɛ ndo fa ya lo ndo kpã lɛ lo ndo e.

1. Nda mɛ ta elengbi ti hũngɔ Nzapa ma nɛ?

“Nzapa du nyingɔ.” (Yoanɛ 4:24, NWT) Ta Yehova na tɛrɛ ti mi nga ma tɛ e azi ma. Lo du nyingɔ mɛ ndo du ka yayu, ndo mɛ ta elengbi ti hũngɔ ni ma.

2. Aseliye mɛndɛ̃ mɛ Yehova na ni nɛ?

Adu biani ya ta elengbi ti hũngɔ Yehova ma, kanda se e gi hĩngangɔ lo ko, e na sepalangɔ na lo na lo mɛ ya lo da biani wa lo nga na aseliye ti nzɔ̃ni. Ngbangɔ tɛnɛ ya: “Yehova ndo ye mbilimbili wa ta lo na ziangɔ azi tɛ lo ti mbilimbili ma.” (Nzembo 37:28) Lo nga na “songo ti bɛ gba, wa londo fa nga bɛ ti vundu,” gba ni ka tɛ azi mɛ ndo hũ pɛnɔ̃. (Zaki 5:11) “Yehova ndo du dã na azi ko la bɛ la fa kã, lo ndo so na azi mɛ nzɛ̃.” (Nzembo 34:18) Mɔ ndo hĩnga ya aye mɛ mɔ ndo li alɛngbi ti hɛ̃ngɔ Yehova dengɔ bɛ bere vundu? Zo ko la ndo li siɔ kpale ko, ta Nzapa ndo sepala na lo ma na lo mɛ ya lo ndo hɛ̃ lo vundu. (Nzembo 78:40, 41) Kanda zo kola ndo li kpale ti nzɔ̃ni ko, lo ndo hɛ̃ Yehova dengɔ bɛ.—Di Masese 27:11.

3. Ngasia la Yehova ndo fa ya lo ndo ye e nɛ?

Liye tɛ Yehova mɛ aɔ aseliye tɛ lo mɛndɛ̃ adu songo. Adu biani ya, “Nzapa du songo.” (1 Yoanɛ 4:8, NWT) Yehova fa e na songo tɛ lo na lége ti Ngbangɔ nga na lége ti aye mɛ lo li. (Di Awa Pangɔ Kwa 14:17.) Na ndakisa binga li mɔ na ndo se mɛndó lo li na e. Lo li e na likoki ti hũngɔ alangi ti nzɔ̃ni, ti mangɔ amiziki ti nzɔ̃ni, nga ti mangɔ mũngo ti tɛ ti nzɔ̃ni. Lo na gwɛ̃ ya e sepala na dungɔ lɛ ngɛ̃́.

GI HĨNGANGƆ LO MƐNDƐ̃

Gi hĩngangɔ ye mɛ Yehova ndo li ni na kwa ti nɛngɔ ya lo li aye ti kpɛ̃nɛ. Wa na gesi ba se mɛ Yehova ndo fa na e aseliye tɛ lo ti nzɔ̃ni.

4. Nyingɔ vúru du ngunu tɛ Nzapa mɛ lo ndo li na kwa

Nga ma se mɛ e ndo li kwa na ti e ko, Yehova ndo li kwa na lége ti nyingɔ vúru tɛ lo. Ngbangɔ tɛnɛ ya ta nyingɔ vúru du zo ma, kanda adu ngunu mɛ Nzapa ndo li ni na kwa ti lingɔ na aye. Di Luka 11:13 nga na Awa Pangɔ Kwa 2:17, wa na pɛni hɛ̃ gbinya ti ahũnda olo mɛ:

Nzapa na “sangɔ” nyingɔ vúru tɛ lo ndo azi ko la ndo yɔ ni ka ti lo. Mɔ da bɛ mɔ ya: nyingɔ vúru du zo bere ngunu mɛ Nzapa ndo li na kwa? Nda mɛ mɔ tɛnɛ ngaso nɛ?

Yehova ndo li aye ti kpɛ̃nɛ na lége ti nyingɔ vúru tɛ lo. Di Nzembo 33:6 nga na 2 Petro 1:20, 21, wa na pɛni hɛ̃ gbinya ti hũnda olo mɛ:

Aye mɛndó Yehova li ni na lége ti nyingɔ vurú tɛ lo nɛ?

5. Yehova na aseliye ti nzɔ̃ni gba

Abɛse du ya Moize ndó wakwa tɛ Yehova ti mbilimbili ko, na ngoi kɔi ndó ko lo na gwɛ̃ ti hĩngangɔ nzɔ̃ni nvɛ̃ni Wa lingɔ lo. Na lo ni la Moize yɔndó kati lo ya: “Fa mbi na lége tɛ mɔ ti nɛngɔ ya mbi hĩnga mɔ nzɔ̃ni.” (Kobima 33:13) La Yehova kambisandó hɛ̃ Moize aseliye tɛ lo mɛndɛ̃. Di Kobima 34:4-6, wa na pɛni hɛ̃ gbinya ti ahũnda olo mɛ:

Aseliye mɛndɛ̃ tɛ Yehova mɛndó lo fa na Moize nɛ?
Aseliye tɛ Yehova mɛ mɔ ndo sepala na ni gba wa?

6. Yehova ndo da bɛ lo na azi

Azi tɛ Nzapa, aya Izraɛlɛ ndó ka gbɛ mbɛ ti Ezipito. Yehova mandó tɛrɛ lo ngasia na ngoi mɛndó ala ndo hũ pɛnɔ nɛ? Ma AUDIO bere Di Kobima 3:1-10. wa na pɛni hɛ̃ gbinya ti ahũnda olo mɛ.

AUDIO: Yehova asalisaki bango ntango bazalaki na mpasi (2:45)

Wangɔ mɛ pandɛ mɛ hɛ̃ mɔ na ndo se mɛ Yehova ndo ma tɛrɛ lo na ngoi mɛ azi ndo hũ pɛnɔ̃ nɛ?—ba vɛrsɛ ti 7 ná 8.
Mɔ da bɛ mɔ ya Yehova na gwɛ̃ ti zangɔ azi, wa lo na ngunu ti lingɔ ni? Wa na lo nɛ?