MWAHA 07

Yehova ta Mukhalelo Taani?

ORUMIHA

Vaavaa munuupuwelaanyu sa Yehova Muluku tiheeni enarwa mmuupuweloni mwanyu? Apwanne ootepa orakamelana ni nyuwaano, hiihaa ntoko itheneeri irakamelannaaya ni ikalaxiya? Naari munamwaanyiherya wi tooweryaxa nyenya tahi muchu, hiihaa ntoko etari? Yehova ta mukhalelo taani? Moorweela wa Masu awe, Piipiliya, Yehova onnooniherya mikhalelo sawe mikina, ntoko woothokororyani wawe.

1. Ntakhara heeni hannawerya omoona Muluku?

“Muluku munepa.” (Yohani 4:24) Yehova haanono mwiili woomuchu. Owo Munepa onakhala wirimu, nipuro nenlo nihinaweryaahu woona.

2. Taavi ari makhalelo makina a Yehova?

Hannawerya omoona Yehova. Nyenya vaavaa nnamusuwelaahu, ninnamusivela nthowa nawi owo Muchu eeparipari orino mikhalelo saphaama. Piipiliya oni: “Yehova annasivela othoriha, Nave hanáriha ósiveliwa awe.” (Salumu 37:28, NN) Owo tho “tawaaca ikharari ni mahala,” xaxaxa wa achu anahooxeya. (Tiyako 5:11) “Yehova ori vakhiviru va yawo a murima wophweya, Onnávulusha yawo a munepa wotcharuwasha.” (Salumu 34:18, NN) Apwanne mwaanasuwela wi Yehova onnavoloweliwa ni mukhalelo nnapaakaahu ichu? Muchu yoowo onathanla opaka ichu soohiphwanelela onnamuthananiha nave onnamweeriha okhala oohica. (Salumu 78:40, 41) Nyenya muchu onathanla opaka ichu sawookololowa onnamuhakalaliha.—Mwaalakhanye Masiposipo 27:11.

3. Yehova onooniherya hai wi onnanisivela?

Mmoha wa mikhalelo sawooneyaxa sa Yehova ti osivela. Mweeparipari, “Muluku ti osivela.” (1 Yohani 4:8) Yehova onnooniherya osivela wawe, ohiya pahiru orweela Mpiipiliyani nyenya tho orweela wa ichu seiyo opatunxeiye. (Mwaalakhanye Saweriwa T’arummwa 14:17.) Ntoko yootakiherya, moone mukhalelo onipatunxeiye. Owo oonivaha mavyakelo a woona ikoore sooreera, owiriyana macipo aphaama, ni opuha yoolya yoosiva. Owo onachuna wi nipuhe ekumi.

OHUSERYA MWAWIISEELA

Muhuserye yeeyo Yehova onaphariheleiye wi awerye waakhwaniherya ichu sootikhiniha. Voocharela moone mukhalelo Yehova onanooniheryeiye mikhalelo sawe saphaama.

4. Munepa waweela—ikuru sa Muluku

Hiiha ntoko hiyaano nnapharihelaahu mata wi niphare muteko, Yehova onapharihela munepa awe waweela. Piipiliya onnooniherya wi munepa waweela, tahi muchu, nyenya ikuru Muluku onaphariheleiye wi apakeno ichu. Mwaalakhanye Luka 11:13 ni Saweriwa T’arummwa 2:17, nave voocharela muthokororye makoho ala:

Muluku onahaala ‘wiichela’ munepa awe waweela wa yaawo anamveka. Mwawiihiiha apwanne munuupuwela wi munepa waweela muchu, naari wi ikuru seiyo Muluku onaphariheleiye muteko? Ntakhara heeni munalocaanyu hiihaa?

Yehova onnapharihela munepa awe waweela wi akhwaaniherye ichu sootikhiniha. Mwaalakhanye Salumu 33:6 ni 2 Pedro 1:20, 21, nave voocharela muthokororye nikoho nla:

Mmikhalelo taani mikina Yehova aapharihenleiye munepa awe waweela?

5. Yehova ookhalano mikhalelo saphaama

Mose aari kapuro oororomeleya a Muluku, nyenya aanachuna omusuwela phaama Mpatuxa awe. Mwawiihiiha Mose aaloca wa yoowo: “Mukihusihe ephiro anyu, kinnoovekaani, wi miyo koosuweleeni.” (Mukwaha 33:13) Mu naakhulo, Yehova aahimooniherya Mose makupa makina a mikhalelo Sawe. Mwaalakhanye Mukwaha 34:4-6, nave voocharela muthokororye makoho ala:

Makupa taani a mikhalelo sawe Yehova aamoonihenryeiye Mose?
Mikhalelo taani sa Yehova xaxaxa inootannyaani murima?

6. Yehova onnaapwacha achu

Aheepiri, achu a Muluku, yaari akapuro o Yikuputu. Yehova onne hai vaavaa achu awe yaahooseyaaya? Nwiriyane ETRAMA YOORUMA nave mucharihe, naari mwaalakhanye Mukwaha 3:1-10. Voocharela muthokororye makoho anacharela.

ETRAMA YOORUMA: Jeová se importava com o sofrimento deles (2:45)

Tiheeni yaweereya yeela enoohusihaayaani sa mukhalelo Yehova onooneiye vooloca sa ohooxeya wa achu? —Moone iversikulu 7 ni 8.
Apwanne chiryene munuupuwela wi Yehova onnachuna waakhaviherya achu nave wi owo onanwerya weerano yeeyo? Waakhanle wi aa ntakhara heeni, naari waakhanle wi hooye ntakhara heeni?

7. Soopatuxiwa sinnooniherya mikhalelo sa Yehova

Yehova onnooniherya mikhalelo sawe moorweela wa ichu seiyo opatunxeiye. Moone EXILEMA. Voocharela mwaalakhanye Aroma 1:20, nave muthokororye nikoho nnacharela.