FAKAAKOAGA 07
Ko e Atua Fēfē a Iehova?
Ko e heigoa e manatu haau, ko e Atua fēfē a Iehova? Ofoofogia kia a ia ka e mamao mai ia koe, tuga e tau fetū mo e tau fakatokaaga fetū? Po ke manamanatu a koe ki a ia kua malolō lahi ka e nakai fai logonaaga, tuga e pakūlagi? Ko e Atua fēfē mooli a Iehova? Fakakite he Tohi Tapu e falu he tau mahani ha Iehova, ti pihia mo e levekiaga haana ki a koe.
1. Ko e ha ne nakai maeke a tautolu ke kitia e Atua?
“Ko e Atua ko e agaga ni a ia.” (Ioane 4:24) Nakai ha ha ia Iehova e tino tuga e tagata. Ko ia ko e Agaaga ne nofo he lagi, ko e matakavi ne nakai kitia e tautolu.
2. Ko e heigoa e falu mahani ha Iehova?
Pete he nakai kitia a Iehova, ko ia ko e Atua mooli mo e tau mahani haana kua mafanatia ki a lautolu ne iloa a ia. Pehē e Tohi Tapu: “Kua fiafia a Iehova ke he fakafiliaga; nakai tiaki foki e ia hana tau tagata tapu.” (Salamo 37:28) Kua ‘fakaalofa fakalahi mo e hofihofi noa’ foki a ia, mua atu ki a lautolu kua matematekelea. (Iakopo 5:11) “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” (Salamo 34:18) Iloa nakai e koe kua lauia a Iehova he tau logonaaga ha tautolu? Ko e tagata kua fifili ke taute e tau mahani kelea kua fakahukia mo e fakamomoko a Iehova. (Salamo 78:40, 41) Ka ko e tagata kua taute e mena kua hako kua fakafiafia a Iehova.—Totou Tau Fakatai 27:11.
3. Fakakite fēfē e Iehova kua fakaalofa a ia ki a tautolu?
Ko e mahani ha Iehova kua mua ue atu ko e fakaalofa. “Ko e Atua ko e fakaalofa a ia.” (1 Ioane 4:8) Fakakite e Iehova e fakaalofa haana i loto he Tohi Tapu ti pihia mo e tau mena ne tufugatia foki e ia. (Totou Gahua 14:17.) Ma e fakatai, manamanatu ke he puhala kua tufugatia e ia a tautolu. Foaki mai e ia e lotomatala ki a tautolu ke kitia e tau lanu fulufuluola, logona e tau leo kofe fiafia, mo e kai e tau mena kai lolo. Manako a ia ki a tautolu ke fiafia e moui.
KUMIKUMI FAKAHOKULO
Fakaako e puhala kua fakaaoga e Iehova ke taute e tau mena ofoofogia. Ti kitia e puhala kua fakakite e Iehova e tau mahani mafanatia haana.
4. Agaaga tapu—ko e malolō gahuahua he Atua
Tuga ni he fakaaoga e tautolu e tau lima ke taute e tau gahua, fakaaoga e Iehova e agaaga tapu haana. Fakakite he Tohi Tapu ko e agaaga tapu ko e malolō he Atua kua fakaaoga ke taute aki e tau mena, ka e nakai ko e tagata. Totou Luka 11:13 mo e Gahua 2:17, ti tutala ke he tau hūhū nei:
-
To “liligi hifo” he Atua e agaaga tapu haana ki a lautolu kua ole ki ai. Ti manatu kia a koe ko e agaaga tapu ko e tagata po ke malolō gahuahua he Atua? Ko e ha ne talahau pihia a koe?
Fakaaoga e Iehova e agaaga tapu haana ke taute e tau mena ofoofogia. Totou Salamo 33:6 mo e 2 Peteru 1:20, 21, ti tutala ke he hūhū nei:
-
Ko e heigoa falu puhala ne fakaaoga e Iehova e agaaga tapu haana?
5. Ha ha ia Iehova e aga mafanatia
Ko Mose ko e fekafekau fakamooli he Atua ka e manako a ia ke iloa mitaki e Tufuga haana. Ti tala age a Mose ki a Iehova: “Kia fakailoa mai e koe kia au hau a puhala, kia iloa ai e au a koe.” (Esoto 33:13) He tali, fakakite e Iehova ki a Mose e falu vala he aga Haana. Totou Esoto 34:4-6, ti tutala ke he tau hūhū nei:
-
Ko e heigoa e tau vala he aga ha Iehova ne fakakite ki a Mose?
-
Ko e heigoa e tau mahani ha Iehova ne kua nava pauaki e koe?
6. Manamanatu a Iehova ke he tau tagata
Ko e tau Heperu ko e tau tagata he Atua ne fakatupa i Aikupito. Fēfē e logonaaga ha Iehova ke he matematekelea ha lautolu? Tā e AUTIŌ ti muitua ki ai, po ke totou Esoto 3:1-10. Ti tutala ke he tau hūhū nā.
-
Ko e heigoa kua talahau he tala nei ki a koe ke he logonaaga ha Iehova hagaao ke he matematekelea he tagata?—Kikite e kupu 7 mo e 8.
-
Manatu kia a koe kua manako mooli a Iehova ke lagomatai e tau tagata ti taute pihia ni e ia? Ko e ha ne manatu pihia a koe, po ke ko e ha ne nakai manatu pihia a koe?
7. Fakakite he tau mena kua tufugatia e tau mahani ha Iehova
Fakakite e Iehova e tau mahani haana he tau mena ne tufugatia e ia. Tā e VITIŌ. Ti totou Roma 1:20, mo e tutala ke he hūhū nā.
-
Ko e heigoa e tau mahani ha Iehova kua kitia e koe he tau mena ne tufugatia e ia?
PEHĒ FALU TAGATA: “Nakai ko e tagata e Atua, ko e malolō a ia ne ha ha he tau mena oti.”
-
Fēfē e manatu haau?
-
Ko e ha ne logona hifo pihia a koe?
MANATU KATOA
Ko Iehova ko e Agaaga nakai kitia mo e tau mahani mafanatia loga, mua atu ke he fakaalofa.
Liu Fakamanatu
-
Ko e ha kua nakai maeke a tautolu ke kitia a Iehova?
-
Ko e heigoa e agaaga tapu?
-
Ko e heigoa falu mahani ha Iehova?
KUMI FOKI
Fakahokulo e maama haau hagaao ki a Iehova he fakaako fā e tau mahani mua ue atu haana.
Manamanatu ke he fakamooliaga kua nakai nofo a Iehova he tau mena oti.
“Nofo Kia e Atua he Tau Mena Oti?” (Vala tala he kupega hila)
Kitia e kakano kua fakatatai he Tohi Tapu e agaaga tapu ke he lima he Atua.
Taufetului e tagata matapouli ke talitonu kua manamanatu e Atua ki a ia. Iloa e kakano ati hiki e manatu haana.
“Logona Hifo e Au Mogonei, kua Maeke Au ke Lagomatai e Falu” (Ko e Kolo Toko, Novema-Tesemo 2015)
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
