ISIFUNDO 07

Unjani UJehova?

IDLALE

Unjani UJehova?

Nawucabanga ngoJehova uZimu, khuyini efika emkhumbulwenakho? Kghani ucabanga ngomuntu othileko okarisako kodwana okude khulu nawe, njengeenkwekwezi ezikomunye umthala? Namtjhana ucabanga ukuthi mumuntu onganabuntu mhlamunye njengomdumo orarambako? Kuhlekuhle unjani uJehova? NgeliZwi lakhe iBhayibheli, uJehova uyasivezela ubuntu bakhe kunye nekareko anayo ngawe.

1. Kubayini singakghoni ukubona uZimu?

“UZimu Mmoya.” (Jwanisi 4:24) UJehova akanawo umzimba ofana newethu. UMmoya begodu uhlala ezulwini, indawo engekhe sayibona.

2. Ngibuphi obunye ubuntu bakaJehova?

Nanyana uJehova angabonakali, umuMuntu wamambala onobuntu obumenza athandeke kilabo abamaziko. IBhayibheli lithi: ‘UJehova uyabuthanda ubulungiswa, begodu angeze abalahle abathembekileko bakhe.’ (IRhubo 37:28) Libuye lithi, “unethando khulu begodu unesirhawu,” khulukhulu kilabo abahlunguphazwako. (Jakopo 5:11) “UJehova useduze nalabo abanehliziyo ephukileko; uyabasindisa labo abadanileko.” (IRhubo 34:18, umtlolo ongenzasi) Kghani bewazi ukuthi izenzo zethu ziyamthinta uJehova? Kuyamdanisa lokha abantu nabakhetha ukwenza izinto ezimbi. (IRhubo 78:40, 41) Kuyamthabisa ukubona abantu benza izinto ezihle.—Funda IzAga 27:11.

3. UJehova utjengisa njani ukuthi uyasithanda?

Ubuntu obuveleleko bakaJehova lithando. Kokwakho, “uZimu ulithando.” (1 Jwanisi 4:8) UJehova uyasitjengisa ukuthi uyasithanda, ingasi ngeBhayibheli kwaphela kodwana nezintweni azidalileko. (Funda IzEnzo 14:17) Ngokwesibonelo, khesicabange ngendlela asidale ngayo. Usinikele ikghono lokubona imibala emihle, ukuzwa umbhino omnandi nokunambitha ukudla okumnandi. Ufuna sithabele ukuphila.

FUNDA NGOKUNGENELELEKO

Funda ngokuthi khuyini uJehova ayisebenzisako ukwenza izinto ezihle. Bese ubona indlela aveze ngayo ubuntu bakhe obuhle kithi.

4. Ummoya ocwengileko —mamandla kaZimu asebenzako

Njengombana nathi sisebenzisa izandla zethu ukwenza okuthileko, noJehova usebenzisa ummoyakhe ocwengileko. IBhayibheli lithi ummoya ocwengileko akusimumuntu kodwana mamandla uZimu awasebenzisako ukwenza izinto. Funda uLukasi 11:13 nezEnzo 2:17, bese nicoca ngemibuzo elandelako:

Singawubawa ummoya ocwengileko begodu uZimu ‘uzosithululela’ wona. Yeke, ucabanga ukuthi ummoya ocwengileko umumuntu namkha mamandla uZimu awasebenzisako? Kubayini utjho njalo?

UJehova usebenzisa ummoyakhe ocwengileko bona enze izinto ezihle. Funda IRhubo 33:6 neyesi-2 kaPitrosi 1:20, 21, bese nicoca ngombuzo naku:

UJehova uwusebenzise njani ummoyakhe ocwengileko esikhathini esidlulileko?

5. UJehova unobuntu obuhle nobuthandekako

UMosi bekalotjha uZimu kodwana bekafuna ukwazi uMdalakhe khudlwana. Yeke, uMosi wathi kuye: “Ngibawa ungenze ngazi iindlela zakho, ukwenzela bona ngikwazi.” (Eksodusi 33:13) UJehova waphendula uMosi ngokumtjela ukuthi umuMuntu onjani. Funda u-Eksodusi 34:4-6, bese nicoca ngemibuzo nasi:

Ngibuphi obunye ubuntu uJehova abuveza kuMosi?
Ngibuphi ubuntu bakaJehova obuthandekako kuwe?

6. UJehova unendaba nabantu

AmaHebheru, abantu bakaZimu, bebaziingqila eGibhide. Ukuhlunguphazwa kwawo kwamthinta njani uJehova? Dlala umgadangiso OLALELWAKO ukhambisane nawo namkha ufunde u-Eksodusi 3:1-10. Ngemva kwalokho, nicoce ngemibuzo elandelako.

OKULALELWAKO: UJehova Bekanendaba Nokutshwenyeka Kwabo (2:45)

Indaba le ikutjelani ngendlela uJehova azizwa ngayo ngokutlhaga kwabantu?—Funda ivesi 7 no-8.
Kghani ucabanga bona uJehova uyakufuna ukusiza abantu nokuthi angakghona ukubasiza? Sekela ipendulwakho.