MUTU 07

Kansi Yehova Ali na Minkhalidwe Yotyani?

MVWISHILANI

Mukaganizila za Yehova, n’cinji cuwela m’maganizo mwanu? Kansi muganiza kuti ni Mulungu wocitisha mantha koma soti wamphamvu ngako wamene onkhala kutali, cakuti mungakwanishe lini kunkhala naye pa ushamwali? Koma kansi Yehova ni Mulungu wotyani makamaka? Baibo yutiyavya kuziŵa minkhalidwe ya Yehova. Yutiyavya soti kuziŵa kuti okusamalilani mweo pamweka.

1. Ndaŵa yanji tukwanisha lini kumuona Mulungu?

“Mulungu ni mzimu.” (Yohane 4:24) Yehova ali lini na muŵili monga ni watili nao seo. Yove ni mzimu ndipo onkhala kululu. Tetyo, tingakwanishe lini kumuona.

2. Kansi iyakine mwa minkhalidwe yaali nayo Yehova ni yotyani?

Olo kuti Yehova tingamuone lini, tikamuziŵa tingafwike pozindikila kuti ni munthu wenewene wamene ali na minkhalidwe yabwino. Baibo yukamba kuti: “Yehova okonda cilungamo, ndipo angasiye lini ŵanthu ŵake okhulupilika.” (Salimo 37:28) Oonesha soti “cikondi cikulu na cifundo,” makamaka kuli ŵala ovutika. (Yakobo 5:11) “Yehova ali pafupi na ŵanthu ovutika maganizo ndipo opulumusa ŵanthu ozimvwila cisoni.” (Salimo 34:18) Kuyangizhyila apo, kansi muziŵa kuti Yehova okhuziwa na vocita vasu? Okhumudwa ngati munthu ocita vinthu viipa. (Salimo 78:40, 41) Koma osangalala ngati munthu ocita vinthu vabwino.—Ŵelengani Miyambo 27:11.

3. Kansi Yehova oonesha tyani kuti otikonda?

Nkhalidwe ikulu ya Yehova ni cikondi. Baibo yukamba kuti “Mulungu ndiye cikondi.” (1 Yohane 4:8) Yehova oonesha cikondi cake kupitila m’Baibo na mu vinthu vecilenga. (Ŵelengani Machitidwe 14:17.) Mwacisanzo, ganizilani mwecitipangila. Etipanga m’njila yakuti tikokwanisha kuona mitundu yokongola ya vinthu, kumvwa nyimbo zosangalasa, nosangalala na kuwama kwa vakulya. Yehova ofuna kuti tikosangalala na umoyo.

PHUNZILANI ZINYINJI

Onani kuti n’cinji cakuseŵenzesha Yehova pokwanilisha cifunilo cake. Onani soti mwamene Yehova otioneshela minkhalidwe yake yabwino.

4. Mzimu utuŵa ni mphamvu yakuseŵenzesha Mulungu

Seo teŵanthu tuseŵenzesha manja poseŵenza. Koma Yehova oseŵenzesha mzimu wake utuŵa. Baibo yukamba kuti mzimu utuŵa ni munthu lini, koma ni mphamvu yakuseŵenzesha Mulungu pokwanilisha cifunilo cake. Ŵelengani Luka 11:13 na Machitidwe 2:17, nokambilana makonsho aŵa:

Mulungu opeleka mzimu wake utuŵa kuli ŵala amene omusenga. Kulingana na mfundo iyi, muganiza kuti mzimu utuŵa ni munthu, olo ni mphamvu yakuseŵenzesha Mulungu? Ndaŵa yanji mwayankha tetyo?

Yehova oseŵenzesha mzimu wake utuŵa pokwanilisha cifunilo cake. Ŵelengani Salimo 33:6 na 2 Petulo 1:20, 21, nokambilana konsho iyi:

Kansi Yehova waseŵenzesha mzimu wake utuŵa m’njila ziyakine zotyani?

5. Yehova ali na minkhalidwe yabwino ngako

Mose enze mtumiki wokhulupilika wa Mulungu, koma enzofuna kumuziŵa bwino. Tetyo, emusenga kuti: “Niziŵisheni njila zanu kuti nikuziŵeni.” (Ekisodo 33:13) Poyankha, Yehova euzhya Mose iyakine mwa minkhalidwe yake. Ŵelengani Ekisodo 34:4-6, nokambilana makonsho aŵa:

Ni minkhalidwe yotyani yamene Yehova emuululila Mose?
Ni minkhalidwe yotyani ya Yehova yukucitishani ngako cidwi?

6. Yehova osamala za ŵanthu

Pa nthawi iyakine, Aheberi, amene enze ŵanthu a Mulungu, enze mu ukapolo ku Iguputo. Kansi Yehova enzokumvwa tyani akaona ŵanthu ŵake ovutika? Lizhyani MBALI YOMVWISHILA TYALA ndipo mukokonkha m’Baibo yanu, olo ŵelengani Ekisodo 3:1-10, nokambilana makonsho aŵa:

MBALI YOMVWISHILA TYALA: Yehova Enzokumvwa Caipa Akaona Mweenzovutikila Ŵanthu Ŵake (2:45)

Kansi nkhani iyi yuonesha kuti Yehova akumvwa tyani akaona ŵanthu ovutika?—Onani mavesi 7 na 8.
Muganiza kuti Yehova ofuna cendi kuthandiza ŵanthu, na kuti angakwanishe kucita izo? Ngati muganiza tetyo, ndaŵa yanji? Nanga ngati muganiza lini tetyo, ndaŵa yanji?

7. Cilengedwe cuonesha minkhalidwe ya Yehova

Yehova oonesha minkhalidwe yake kupitila mu vinthu vecilenga. Onelelani VIDYO. Pavuli pake, ŵelengani Aroma 1:20, nokambilana konsho yokonkhapo.