THUTO 07

Jehofa ke Modimo wa Mohuta Mang?

BAPALA

Wena ge o nagana ka Jehofa Modimo, go tla eng ka monaganong wa gago? Na o bona Modimo e le yo mogolo kudu e bile a le kgole kudu le wena, moo e lego gore o ka se tsoge o kgonne go mmatamela, go no swana le ge dinaledi di le kgole le kgole? Goba na o no mmona a le matla kudu go no swana le modumo wa legadima, eupša e se Modimo wa kgonthe? Bjale o ka ipotšiša gore: ‘Ge e le gabotse Jehofa ke Modimo wa mohuta mang?’ Ka Lentšung la gagwe e lego Beibele, Jehofa ka boyena o re botša ka tše dingwe tša dika tša gagwe. E bile e re botša gore le wena o a go rata.

1. Ke ka baka la eng re ka se kgone go bona Modimo?

Beibele e re “Modimo ke Moya.” (Johane 4:24) Jehofa ga a na mmele wa go swana le wa rena. Se se ra gore re ka se kgone go mmona, ka gore o dula legodimong.

2. Tše dingwe tša dika tša Jehofa ke dife?

Ke nnete gore re ka se kgone go bona Jehofa. Eupša ge re ka thoma go mo tseba gabotse, re tlo mo rata, ka ge re tlo mo tšea e le Modimo wa kgonthe. Beibele e re: “Jehofa o rata toka, e bile a ka se tlogele bao ba mmotegelago.” (Psalme 37:28) ‘O rata batho kudu e bile o a ba gaugela,’ kudukudu bao ba nago le mathata. (Jakobo 5:11) E bile “o kgauswi le ba dipelo tše di robegilego; o phološa ba meoya e nyamilego o šoro.” (Psalme 34:18) Na o be o tseba gore mekgwa ya rena e ka dira gore Jehofa a nyame goba a thabe? Motho yo a kgethago go dira dilo tše mpe, o nyamiša Jehofa. (Psalme 78:40, 41) Eupša yo a kgethago go dira dilo tše dibotse, o a mo thabiša.—Bala Diema 27:11.

3. Jehofa o bontšha bjang gore o a re rata?

Seka se segolo sa Jehofa ke lerato. Ge e le gabotse, Beibele e re “Modimo ke lerato.” (1 Johane 4:8) Ke nnete gore ge re bala Beibele re a kwa gore Jehofa o na le lerato. Eupša re bona lerato la gagwe le dilong tšeo a di bopilego. (Bala Ditiro 14:17.) Ka mohlala, e no nagana ka tsela yeo a re bopilego ka yona. O re file bokgoni bja go bona mebala e mebotse, bja go kwa mmino o mobosana, le bja go kgona go kwa tatso ya dijo tše dibose. Ka nnete Jehofa o nyaka re ipshina ka bophelo.

ITHUTE KA MO GO TSENELETŠEGO

Ithute gore Jehofa o kgona bjang go dira dilo tše dikgolo tšeo di kgahlišago kudu. Ke moka o bone gore o re bontšha bjang dika tša gagwe tše dibotse.

4. Moya o mokgethwa ke matla ao Modimo a a šomišago

Go no swana le ge re diriša matsogo a rena ge re šoma, Jehofa le yena o diriša moya wa gagwe o mokgethwa ge a šoma. Balang Luka 11:13 le Ditiro 2:17, gomme le boledišaneng ka dipotšišo tše di latelago:

Lengwalo le le bontšha gore Modimo o tla “tšhollela” moya wa gagwe o mokgethwa go bao ba mo kgopelago wona. Bjale na o nagana gore moya o mokgethwa ke Modimo goba ke matla ao Modimo a a šomišago? Ke ka baka la’ng o re’alo?

Jehofa o diriša moya wa gagwe o mokgethwa go dira dilo tše dikgolo tše di kgahlišago. Balang Psalme 33:6 le 2 Petro 1:20, 21, gomme le boledišaneng ka potšišo e latelago:

Ke ka ditsela dife tše dingwe tšeo Jehofa a dirišitšego moya wa gagwe o mokgethwa?

5 Jehofa o na le dika tše dingwe tše dibotse

Moshe e be e le mohlanka yo a botegago wa Modimo. Eupša nakong e nngwe, o ile a nyaka go tseba Modimo gakaone. O ile a kgopela Modimo gore: “Ntsebiše ditsela tša gago gore ke go tsebe.” (Ekisodo 33:13) Jehofa o ile a dira bjalo, e bile a ba a mmotša gore ke yena Modimo wa mohuta mang. Balang Ekisodo 34:4-6, gomme le boledišaneng ka dipotšišo tše di latelago:

Ke dika dife tša Jehofa tšeo a ilego a di botša Moshe?
Ke seka sefe sa Jehofa seo wena o se ratago kudu?

6. Jehofa o rata batho

Nakong e nngwe, Baheberu bao e bego e le batho ba Modimo, e ile ya ba makgoba nageng ya Egipita. Jehofa o ile a ikwa bjang ge a be a ba bona ba sokola? Bapalang MMALO WO WA BEIBELE WA GO THEETŠWA gomme le sepedišane le wona, goba le bale Ekisodo 3:1-10. Ke moka le boledišaneng ka dipotšišo tše di latelago:

MMALO WA BEIBELE WA GO THEETŠWA: Jehofa o Ile a ba Bona ge ba be ba Sokola (2:45)

Go ya ka pego ye, Jehofa o be a ikwa bjang ge a be a bona batho ba gagwe ba sokola?—Bona temana 7 le 8.
Na o nagana gore Jehofa o tloga a nyaka go thuša batho, le gore a ka kgona go ba thuša? Ke ka baka la’ng o nagana bjalo?

7. Re ka ithuta gore Jehofa ke Modimo wa mohuta mang go dilo tšeo a di bopilego

Dilo tšeo Jehofa a di bopilego di re thuša go tseba dika tša gagwe. Bapalang BIDIO ye. Ke moka le bale Baroma 1:20, gomme le boledišaneng ka potšišo e latelago.