ELONGESO 07
Siovaa Ukahi Ñgeni?
Tyina ove usoka, Siovaa Huku ukahi ñgeni? Hamwe usoka okuti mokonda Omukulami, uli unene kokule ngononthungululu, katyitavela okukala popepi nae. Ine hamwe usoka okuti hamunthu-ko, otyipuka tyina vala ononkhono ngomuliakulo. Mahi ngwe muene ukahi ñgeni? Mo Mbimbiliya, Siovaa welipopia oñgeni ngwe muene ekahi. Ombimbiliya tupu ipopia okuti Siovaa ukuhole.
1. Omokonda yatyi tuahamonena Huku?
“Huku kamonwa komaiho.” (Suau 4:24) Siovaa utupu olutu ngo lwovanthu. Huku omunthu umwe wahamoneka komaiho. Ukala keulu, mahi apa muene-muene akala, kapamonwa novanthu.
2. Siovaa ukahi ñgeni?
Otyili, Siovaa kamoneka komaiho. Mahi oko ekahi, ngwe muene tyina omunthu amemunoñgonoka nawa, uhuva! Ombimbiliya ipopia okuti “Siovaa uhole ovipuka viaviuka, iya kamasi-po vana vehemuyeke-po.” (Salmo 37:28) Siovaa tupu “una oluembia olunene nokankhenda.” Mahi haunene ulingila okankhenda vana vamona emone. (Tiaku 5:11) “Siovaa uli popepi na vana vaihamenwa komutima. Uyovola vana vasoya.” (Salmo 34:18) Ove utyii okuti etyi ulinga tyipondola okuhambukiswa Siovaa oo okumunumanesa? Tyina omunthu alinga ovipuka ovivi, Siovaa tyimuihama komutima. (Salmo 78:40, 41) Mahi tyina tulinga oviwa, Siovaa nae uhambukwa. — Tanga Provérbios 27:11.
3. Okutyi tutatela okuti Siovaa utuhole?
Ombimbiliya ipopia okuti “Huku oluembia.” Oluembia lwa Huku tulutalela movipuka aviho alinga. (1 Suau 4:8) Siovaa mo Mbimbiliya wapopia-mo okuti utuhole. Mahi hatyetyi vala apopia, muene tupu novipuka atunga vityilekesa umwe okuti utuhole. (Tanga Ovilinga 14:17.) Nkhele soka vala kotyipuka etutunga. Onthwe tutyivila okutala ovivala, tutehelela oviimbo, tuhole okulia kuapepa nawa. Siovaa wetutunga tupu ngotyo, omokonda uhanda tuhambukwe.
KUHANDE OKUNOÑGONOKA VALI?
Monoñgonoka ine ovipuka Huku alinga uvilinga natyi. Pahe konyima otale ovipuka vimwe Siovaa atunga vitukuatesako okunoñgonoka etyi ekahi.
4. Atyiho Huku alinga, utyilinga nononkhono mbae
Onthwe ovilinga vietu tuvilinga nomankhanya. Mahi Siovaa atyiho alinga utyilinga nononkhono mbae, etyi ovanyingi vati “osipilitu sandu.” Ombimbiliya ipopia okuti ononkhono mba Huku, hamunthu-ko. Tangei Luka 11:13 no Ovilinga 2:17, amutomphola omapulo aa:
-
Huku ‘makauyulila ononkhono’ vana vemuita. Opo ngotyo naina, okuti ononkhono mba Huku omunthu? Oityi wakumbululila ngotyo?
Siovaa walinga ovipuka vihuvisa nononkhono mbae. Tangei Salmo 33:6 na 2 Petulu 1:20, 21, amutomphola epulo eli:
-
Ovipuka patyi Siovaa alinga nononkhono mbae?
5. Siovaa omunthu omuwa
Moisesi ankho omunthu umwe wali epanga lya Huku, mahi no ngotyo ankho uhanda okunoñgonoka vali nawa Omutungi wae. Otyo apopilila Huku onondaka ombu mbokuati: “Noñgonokese onondyila mbove, opo ndyikunoñgonoke nawa.” (Êxodo 33:13) Siovaa Huku emukumbulula, emupopila umwe nawa-nawa etyi ekahi. Tangei Êxodo 34:4-6, amutomphola omapulo aa:
-
Siovaa wapopilile Moisesi okuti omunthu umwe ukahi ñgeni?
-
Oityi ove uhole vali ku Siovaa Huku?
6. Siovaa wesuka novanthu
Kwali ovanthu vamwe ankho vatiwa ova Hebeleu. Ovanthu ovo, ankho ovanthu va Huku, mahi vakalele ovapika kotyilongo tyo Isitu. Oñgeni Siovaa akalele tyina ankho amona ovanthu vae vamoneswa emone ngo olio? Tehelelei o AUDIU. Tyina mutehelela otyo mulandula mono Mbimbiliya mbenyi. Okuti hatyo, tangei umwe Êxodo 3:1-10, amutomphola omapulo aa:
-
Siovaa ukala ñgeni tyina amona ovanthu vamona ononkhumbi? — Tala povelesikulu 7-8.
-
Mokusoka kwove, Siovaa uhanda umwe okukuatesako ovanthu? Okuti utyivila umwe okukuatesako ovanthu? Oityi wakumbululila ngotyo?
7. Ovipuka Siovaa atunga vitupopila etyi ekahi
Otyipuka Huku atunga ovipuka tyilekesa oñgeni ekahi. Talei OVIDIU. Pahe amutange Ova Loma 1:20, amutomphola epulo eli:
-
Ovipuka Siovaa atunga vikulongesa okuti ukahi ñgeni?
OVANTHU VAMWE VATI: “Huku hamunthu-ko-ale. Huku ononkhono mbuli vala mouye auho.”
-
Iya ove oityi usoka?
-
Oityi usokela ngotyo?
ETYI WELILONGESA
Wanoñgonoka okuti Huku kamoneka komaiho mokonda utupu olutu ngo lwetu. Mahi omunthu umwe omuwa, ukahi nawa, uhole ovanthu.
Okupitulula
-
Omokonda yatyi tuahamonena Huku?
-
Ononkhono mba Huku oityi?
-
Siovaa ukahi ñgeni?
KUHANDE OKUOVOLA VALI?
Tanga onthele ei unoñgonoke umwe nawa etyi Huku ekahi.
Okuti Siovaa Huku waoya vala ouye watyo auho, utupu apa eheli? Tanga onthele ei utyinoñgonoke.
Oityi Ombimbiliya ipopila okuti ononkhono mba Huku okuvoko kwae?
Julio Corio, omumphoki iya ankho ketyitavela okuti Huku umuhole. Pahe tanga onthele ei utale oityi ayekelako okusoka ngotyo.
