ƐZUKOALƐDEƐ 07
Kɛzi Gyihova De Ɛ?
Saa ɛte Gyihova Nyamenle anwo edwɛkɛ a, duzu a ba wɔ adwenle nu a? Asoo ɛnwu ye kɛ ɔ nwo yɛ ɛzulolɛ yɛɛ ɔ nee wɔ avinli twe kɛ nwɔlɔra mɔɔ wɔ moamoa la? Anzɛɛ ɛbu ye kɛ awie mɔɔ lɛ tumi kpole noko ɔnlɛ ɛlɔlɛ kɛ ahumu mɔɔ ɛlɛtu la ɔ? Kɛzi Gyihova de amgba ɛ? Baebolo ne maa yɛnwu Gyihova subane ne mɔ nee kɛzi ɔdwenle ɛ nwo la.
1. Duzu ati a yɛngola yɛnnwu Nyamenle a?
“Nyamenle le Sunsum.” (Dwɔn 4:24) Gyihova ɛnlɛ sonlabaka kɛ yɛdayɛ la. Ɔle Sunsum mɔɔ de anwuma, ɛleka mɔɔ yɛngola yɛnva yɛ nye yɛnnwu ɛkɛ la.
2. Gyihova subane ne mɔ bie a le boni?
Yɛngola yɛnnwu Gyihova ɛdeɛ, noko ɔle Awie mɔɔ wɔ ɛkɛ ne amgba. Ɔlɛ subane ngɛnlɛma la ati menli mɔɔ ze ye la kulo ye. Baebolo ne ka kɛ: “Gyihova kulo pɛlepɛlelilɛ, na ɔnrɛkpo ye nɔhavoma.” (Edwɛne 37:28) Eza ɔda ‘ahunluyelɛyelalɛ yɛɛ anwunvɔnezelɛ’ ali ɔkile menli mɔɔ ɛlɛnwu amaneɛ la titili. (Gyemise 5:11) “Gyihova bikye bɛdabɛ mɔɔ bɛ ahonle ɛbubu la; na ɔdie bɛdabɛ mɔɔ bɛ sa nu ɛdo la.” (Edwɛne 34:18) Asoo ɛze kɛ yɛbahola yɛamaa Gyihova anye alie anzɛɛ yeali nyane? Saa awie si kpɔkɛ kɛ ɔbayɛ ninyɛne mɔɔ ɛnle kpalɛ a ɔmaa ɔ rɛle bɔ na ɔdi nyane. (Edwɛne 78:40, 41) Noko saa awie yɛ mɔɔ le kpalɛ la a ɔmaa ɔ nye die.—Kenga Mrɛlɛbulɛ 27:11.
3. Kɛzi Gyihova da ye ali kɛ ɔkulo yɛ ɛ?
Gyihova subane titili a le ɛlɔlɛ. Nɔhalɛ nu, “Nyamenle le ɛlɔlɛ.” (1 Dwɔn 4:8) Gyihova dua Baebolo ne nee ninyɛne mɔɔ yebɔ la azo da ye ɛlɔlɛ ne ali. (Kenga Gyima ne 14:17.) Kɛ neazo la, suzu kɛzi ɔbɔle yɛ la anwo. Yebɔ yɛ mɔɔ yɛkola yɛnwu kɔla ngakyile, yɛtie edwɛne mɔɔ yɛ fɛ na yɛte aleɛ fɛlɛko a. Ɔkulo kɛ yɛ nye die wɔ ɛbɛlabɔlɛ nu.
SUKOA DƆƆNWO
Sukoa deɛ mɔɔ Gyihova fa yɛ nwanwane ninyɛne la anwo debie. Akee nea kɛzi Gyihova da ye subane ngɛnlɛma ne mɔ ali la.
4. Sunsum nwuanzanwuanza ne le Nyamenle gyimayɛlɛ tumi
Gyihova fa ye sunsum nwuanzanwuanza ne yɛ gyima kɛ mɔɔ yɛfa yɛ sa yɛyɛ gyima la. Baebolo ne maa ɔda ali kɛ sunsum nwuanzanwuanza ne ɛnle sonla, emomu ɔle tumi mɔɔ Nyamenle fa yɛ gyima a. Kenga Luku 11:13 nee Gyima ne 2:17, na akee bɛzuzu kpuya ɛhye mɔ anwo:
-
Nyamenle ‘bawola’ ye sunsum nwuanzanwuanza ne agua bɛdabɛ mɔɔ bɛsɛlɛ ye la anwo zo. Ɔti, ɛnea a sunsum nwuanzanwuanza ne le Nyamenle anzɛɛ tumi mɔɔ Nyamenle fa yɛ gyima la? Duzu ati a wɔha ye zɔ a?
Gyihova fa ye sunsum nwuanzanwuanza ne yɛ ninyɛne mɔɔ yɛ nwanwane la. Kenga Edwɛne 33:6 nee 2 Pita 1:20, 21, na akee bɛzuzu kpuya ɛhye anwo:
-
Ndenle mɔɔ Gyihova ɛlua zo ɛva ye sunsum ne ɛyɛ gyima la bie mɔ a le boni?
5. Gyihova lɛ subane ngɛnlɛma
Ɛnee Mosisi le Nyamenle sonvolɛ nɔhavo, noko ɛnee ɔkulo kɛ ɔnwu ye Bɔvolɛ ne kpalɛ. Ɔti Mosisi hanle hilele ye kɛ: “Maa menwu wɔ ndenle ne mɔ amaa meanwu wɔ.” (Ɛzɛdɔso 33:13) Gyihova maanle Mosisi nwunle Ye subane ne mɔ bie. Kenga Ɛzɛdɔso 34:4-6, na akee bɛzuzu kpuya ɛhye mɔ anwo:
-
Gyihova subane boni mɔ a ɔmaanle Mosisi nwunle ye a?
-
Gyihova subane boni mɔ a ɛ nye die nwo kpalɛ a?
6. Gyihova dwenle menli nwo
Ɛnee Nyamenle menli Hibuluma le ngɛkɛlɛ wɔ Yigyibiti. Kɛzi Gyihova dele nganeɛ wɔ bɛ amaneɛnwunlɛ ne anwo ɛ? Bɔ ƆDIO ne na di ɔ nzi, anzɛɛ kenga Ɛzɛdɔso 3:1-10. Akee bɛzuzu kpuya ɛhye mɔ anwo.
-
Duzu a edwɛkɛ ɛhye maa ɛnwu ye wɔ kɛzi Gyihova te nganeɛ wɔ amaneɛ mɔɔ alesama ɛlɛnwu ye la anwo a?—Nea ngyehyɛnu 7 nee 8.
-
Ɛnea a amgba Gyihova kulo kɛ ɔboa alesama yɛɛ ɔbahola yeaboa bɛ ɔ? Duzu ati ɔ?
7. Abɔdeɛ da Gyihova subane ne mɔ ali
Gyihova dua ninyɛne mɔɔ yebɔ la azo da ye subane ne mɔ ali. Ye VIDIO ne. Akee kenga Wulomuma 1:20, na bɛzuzu kpuya ɛhye anwo.
-
Gyihova subane boni mɔ a ɛnwu ye wɔ ninyɛne mɔɔ yebɔ la anu a?
BIE MƆ KA KƐ: “Nyamenle ɛnle awie mɔɔ wɔ ɛkɛ ne amgba a, emomu ɔle tumi mɔɔ wɔ ɛleka biala a.”
-
Kɛzi ɛnwu ye ɛ?
-
Duzu ati a ɛdwenle zɔ a?
EDWƐKƐ TITILI
Gyihova le Sunsum mɔɔ yɛngola yɛnnwu ye. Ɔlɛ subane ngɛnlɛma dɔɔnwo, ɛlɔlɛ a le nuhua titili a.
Ndinu
-
Duzu ati a yɛngola yɛnnwu Gyihova a?
-
Sunsum nwuanzanwuanza ne a le duzu?
-
Gyihova subane ne mɔ bie a le boni?
KPONDƐ DƆƆNWO
Sukoa Gyihova subane titili nna ne anwo debie dɔɔnwo amaa wɔanwu ye kpalɛ.
Nea daselɛ mɔɔ kile kɛ Gyihova ɛnle ɛleka biala la.
Nea deɛmɔti Baebolo ne ka kɛ sunsum nwuanzanwuanza ne le Nyamenle asa la.
“Sunsum Nwuanzanwuanza Ne A Le Duzu?” (Edwɛkɛ mɔɔ wɔ jw.org azo)
Ɛnee nrenyia anyezinliravolɛ bie ɛnlie ɛnli kɛ Nyamenle dwenle ɔ nwo. Nea debie mɔɔ maanle ɔhakyile ye adwenle la.
“Kɛkala Mekola Meboa Awie Mɔ” (Ɛzinzalɛ Arane, October 1, 2015)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
