NTʼUDI 07

¿A i nkja kʼa Jehová?

YʼO̱DE HA

Mu̱ gi beni kʼa Jehová, ¿ankja gi beni ge i nkja? ¿Gi beni ge gege i ndo̱ peʼtsi tse̱dí nihi i ndo̱ mädíki pe i ʼbu̱i ra ndo̱ yapu̱ de nuke, kjangútho yu̱ tso̱ de ʼna galaxia? ¿Gua gi beni ge i nkja ʼna ndähi ra ndo̱ nze̱dí ge niste i tso, kjangútho ʼna rrayo mu̱ i yoti? ¿Pe a i nkja kʼa Jehová? Ha nu̱ ro hñä, nu̱ Biblia, kʼa Jehová i úhtigihu̱ ʼra de ku̱ yo tsi chala ʼmu̱i nihi kʼa hmädí i tso po nuke.

1. ¿Ó hi i tso go käʼtihu̱ kʼa Tsi Mähkí Tá?

“Kʼa Tsi Mähkí Tá ro espíritu” (Juan 4:24). Kʼa Jehová hi i nkja ga ngo̱ nindi ga ndoʼyo. Gege i nkja ʼna espíritu ge i ʼbu̱i a jitsi, ʼna luga ge nihi hi i tso go käʼtihu̱.

2. ¿Té piʼra tsi chala ʼmu̱i i peʼtsi kʼa Jehová?

Mahke hi i tso go käʼtihu̱ kʼa Jehová, mu̱ má di pädihu̱ a i nkja gege má go ne go mädíhu̱ xo i nkja ngu ʼna kjäʼni ge i peʼtsi yä tsi chala ʼmu̱i. Nu̱ Biblia i mä: “kʼa Jehová i mädí kʼa ra zo nihi hin da zogi ku̱ hi i ʼuege de gege” (Salmo 37:28). Nihi “i úhtite ndunthi hmädí nihi i juihki yu̱ maʼra”, pe má i kjánu̱ ko yu̱ kjäʼni i thogi yu̱ ra nthí (Santiago 5:11). “K’a Jehová hi i ‘uege de ku̱ i pe’tsi ‘na koraso xi nxe̱ni; i fötsí goʼtho ku̱ i ndo̱ nsenti” (Salmo 34:18). ¿Kja gi pädi ge nugohu̱ da zo go kjáhu̱ da mpoho o da nsenti kʼa Jehová ko kʼa di pe̱hmu̱? Kʼa kjäʼni i kjá kʼa ra ntsʼo i kjáhpi da nsenti kʼa ro koraso (Salmo 78:40, 41). Pe kʼa kjäʼni i kjá kʼa ra zo i kjáhpi da ndo̱ mpoho (xödí Proverbios 27:11).

3. ¿Ankja i úhtigihu̱ kʼa Jehová ge i mähkígihu̱?

Kʼa ro chala ʼmu̱i má i nigi de kʼa Jehová genkʼa hmädí. Xo, “kʼa Tsi Mähkí Tá ro hmädí” (1 Juan 4:8). Kʼa Jehová i úhtigihu̱ kʼa ro hmädí po madé nu̱ Biblia nihi po goʼtho yu̱ xi o̱te (xödí Hechos 14:17). Mbeni, ankja ga o̱tegihu̱. Bi o̱tegihu̱ pa da zo go käʼtihu̱ goʼtho yu̱ tsi chala koló i ʼbu̱i, go mpohmu̱ mu̱ di o̱dehu̱ da nzu̱ní yu̱ ʼbidá nihi go tsihu̱ yu̱ hñuni ra ndo̱ nku̱hi. Gege i ne da ndo̱ mpoho nu ma nzahkihu̱.

MA PÄDIHU̱ MÁ RA NGU DE NU̱ TEMA

Ma núhu̱ té i kju̱ kʼa Jehová pa da o̱te goʼtho ra ndo̱ zo. Nihi go ma núhu̱ ankja ga úhtigihu̱ ku̱ yo tsi chala ʼmu̱i.

4. Kʼa espíritu santo: kʼa ro tse̱dí kʼa Tsi Mähkí Tá i ʼñäni

Nugohu̱ di kju̱hu̱ yu̱ ma ʼyehu̱ pa go pe̱hmu̱, pe kʼa Jehová i kju̱ kʼa ro espíritu santo. Nu̱ Biblia i mä ge nu̱ espíritu santo hi i nkja ʼna kjäʼni, má ra zo genkʼa ro tse̱dí i kju̱ kʼa Tsi Mähkí Tá pa da o̱te goʼtho kʼa i ne gege. Xödíhu̱ Lucas 11:13 ko kʼa Hechos 2:17, nihi ñähu̱ de gehna:

Kʼa Tsi Mähkí Tá da ʼuni kʼa ro espíritu santo ku̱ tó da öhpíbi. Po gehna, ¿gi beni ge kʼa espíritu santo ge ʼna kjäʼni gua genkʼa ro tse̱dí i peʼtsi kʼa Tsi Mähkí Tá, kʼa ro tse̱dí i ʼñäni? ¿Ó gi beni nkjanu̱?

Kʼa Jehová i kju̱ kʼa ro espíritu santo pa da o̱te goʼtho ra ndo̱ zo. Xödíhu̱ Salmo 33:6 ko kʼa 2 Pedro 1:20, 21, nihi ñähu̱ de gehna:

¿Ankja xi gu̱ kʼa Jehová kʼa ro espíritu santo?

5. Kʼa Jehová i peʼtsi yä tsi chala ʼmu̱i ge i kjá go kuatihu̱ ko gege

Kʼa Moisés mi pe̱hpíbi ngu mi ne kʼa Tsi Mähkí Tá. Pe mahke mi nkjanu̱, má mi ne di bädi a mi nkja kʼa ro Tsi Mähkí Tá. Po gehna kʼa Moisés bi xifí: “’ñuhtígi ku̱ ri ‘ñu pa go pädi tó genke” (Éxodo 33:13). Kʼa Jehová bi xiʼ kʼa Moisés a mi nkja gege. Xödíhu̱ Éxodo 34:4-6 nihi ñähu̱ de gehna:

¿Ndänaku̱ chala ʼmu̱i i peʼtsi kʼa Jehová bi xiʼ kʼa Moisés?
¿Té ma chala ʼmu̱i de kʼa Jehová gi núge má ra zo?

6. Kʼa Jehová i ʼñonfeni po yu̱ kjäʼni

Ku̱ hebreo, kʼa mbro hnini kʼa Tsi Mähkí Tá, bi nkjáhu̱ esclavo de kʼa Egipto. ¿Té mi tso kʼa Jehová mu̱ mi nú ge kʼa ro hnini mi tʼu̱ni? ʼYo̱dehu̱ nu̱ AUDIO nihi te̱nihu̱ nu̱ nxödí, o ho̱nse gi xödíhu̱ Éxodo 3:1-10. ʼMe̱fa ñähu̱ de gehna:

AUDIO: Kʼa Jehová bi zo ra u̱ mu̱ mi nú ge mi tʼu̱ni kʼa ro hnini (2:45)

¿Té i úhtiki de kʼa Jehová nuná to núhu̱ mu̱ gege i käʼti kʼa ra nthí i thogi yu̱ kjäʼni? (Núhu̱ yu̱ xe̱ni 7 ko nu̱ 8).
¿Kja gi íhkji ge kʼa Jehová hä i ne da mötsí yu̱ kjäʼni? ¿Kja gi íhkji ge da zo da kjá? ¿Ó gi mbeni nkjanu̱?

7. Ko goʼtho yu̱ xi o̱te kʼa Jehová di núhu̱ ku̱ yo tsi chala ʼmu̱i

Kʼa Jehová i úhtigihu̱ a i nkja gege po goʼtho yu̱ xi o̱te. Núhu̱ nu̱ VIDEO. ʼMe̱fa xödíhu̱ Romanos 1:20 nihi ñähu̱ de gehna:

VIDEO: Ko ku̱ xi o̱te kʼa Jehová i úhtite ro hmädí: nu ma ndoʼyohu̱ (1:57)

¿Té ma chala ʼmu̱i gi núge de kʼa Jehová ko goʼtho yu̱ xi o̱te?

KʼA I MÄHMU̱ PIʼRA YÄ KJÄʼNI: “Kʼa Tsi Mähkí Tá i nkja ʼna tse̱dí ge i ʼbu̱i po goʼtho yä luga, hi ge ʼna kjäʼni pa da zo go núhu̱ a i nkja gege”.