LÈS 07
Ki Klase di Persona Yehova Ta?
Ki klase di Persona bo ta pensa Yehova Dios ta? Algun hende ta pensa ku e ta mahestuoso i leu for di nos i ku nos no por tin un amistat kuné. Tin hende ta pensa ku e ta un Persona poderoso ku no tin sintimentu. Ki klase di Persona Yehova ta realmente? Mediante Beibel, esta, Palabra di Dios, Yehova ta revelá algun di su kualidatnan. Ademas, Beibel ta mustra ku Yehova ta interesá den bo.
1. Dikon nos no por mira Dios?
“Dios ta un Spiritu.” (Huan 4:24) Yehova no tin un kurpa físiko manera nos tin. Yehova ta un Persona invisibel ku ta biba den shelu.
2. Kiko ta algun kualidat ku Yehova tin?
Nos no por mira Yehova, pero ora nos siña konos’é, nos ta sinti nos motivá pa stim’é pasobra e ta un Persona real i e tin bunita kualidat. Beibel ta mustra ku Yehova stima hustisia i ku e no ta bandoná hende ku ta leal na dje. (Salmo 37:28) E tin “masha kariño, kompashon i miserikòrdia,” spesialmente pa hende ku ta sufri. (Santiago 5:11) Beibel ta mustra tambe ku “Yehova ta serka di hende ku tin kurason kibrá; e ta salba hende ku ta desanimá.” (Salmo 34:18) Ademas, bo tabata sa ku loke nos ta hasi por pone Yehova bira sea kontentu òf tristu? Ora un persona ta skohe pa hasi malu, esei ta desapuntá Yehova i ta hasi Yehova tristu. (Salmo 78:40, 41) Di otro banda, si un persona ta skohe pa hasi bon, esei ta hasi Yehova kontentu.—Lesa Proverbionan 27:11.
3. Kon Yehova ta mustra ku e ta stima nos?
E kualidat prinsipal di Yehova ta amor. De echo, “Dios ta amor.” (1 Huan 4:8) Yehova a revelá su amor na nos no solamente mediante Beibel, sino tambe pa medio di loke el a krea. (Lesa Echonan 14:17.) Tuma por ehèmpel e manera ku el a krea nos. Nos por mira un variedat di koló bunita, skucha dushi músika i disfrutá di dushi kuminda. Sí, Yehova a krea nos pa disfrutá di bida.
KIKO MAS NOS POR SIÑA?
Laga nos wak kiko Yehova ta usa pa logra vários kos asombroso. Despues, wak kon Yehova a revelá su bunita kualidatnan na nos.
4. Spiritu santu ta Dios su forsa aktivo
Meskos ku nos ta usa nos mannan pa hasi algu, Yehova ta usa su spiritu santu pa hasi tur loke e ta deseá. Beibel ta mustra ku spiritu santu no ta un persona. Mas bien, e ta e forsa ku Yehova ta usa pa kumpli ku su boluntat. Lesa Lukas 11:13 i Echonan 2:17. Despues, analisá e siguiente preguntanan:
-
Dios lo “drama” su spiritu santu riba hende ku pidié pa su spiritu santu. Pues, bo ta kere ku spiritu santu ta un persona òf e ta e forsa aktivo di Dios? Dikon bo ta pensa esei?
Yehova ta usa su spiritu santu pa logra vários kos asombroso. Lesa Salmo 104:30 i 2 Pedro 1:20, 21. Despues, analisá e siguiente pregunta:
-
Kon ta algun manera ku Yehova a usa su spiritu santu?
5. Yehova tin bunita kualidat
Aunke ku Moises tabata un fiel sirbidó di Dios, e kier a siña mas tokante su Kreador. P’esei, Moises a bisa Dios: “Laga mi konosé bo kamindanan, pa mi konosé bo.” (Éksodo 33:13) Komo kontesta, Yehova a revelá na Moises algun di su kualidatnan. Lesa Éksodo 34:4-6. Despues, analisá e siguiente preguntanan:
-
Kua di su kualidatnan, Yehova a revelá na Moises?
-
Ki kualidat di Yehova bo ta gusta mas?
6. Yehova ta interesá den nos
E hebreonan, kendenan tabata e pueblo di Yehova di antigwedat, tabata katibu na Egipto. Kon Yehova tabata sintié ora e tabata mira su pueblo sufri? Toka e OUDIO i sigui e lesamentu di Éksodo 3:1-10 òf lesa e teksto den Beibel. Despues, analisá e siguiente preguntanan:
-
Segun e relato akí, kon Yehova ta sintié ora e mira hende sufri?—Wak versíkulo 7 i 8.
-
Bo ta kere ku di bèrdat Yehova ke yuda hende i ku e tin e abilidat i kapasidat pa hasi esei? Dikon bo ta pensa asina?
7. Nos por mira e kualidatnan di Yehova den naturalesa
Nos por siña tokante e kualidatnan di Yehova ora nos mira loke el a krea. Pasa e VIDIO. Despues, lesa Romanonan 1:20 i analisá e siguiente pregunta:
-
Ki kualidat di Yehova bo ta mira den loke el a krea?
LOKE HENDE SA BISA: “Dios no ta un persona real. E ta djis un forsa ku ta tur kaminda.”
-
Kiko abo mes ta pensa?
-
Dikon bo ta pensa esei?
RESÚMEN
Yehova ta un Persona invisibel. E tin hopi bunita kualidat, i su kualidat prinsipal ta amor.
Repaso
-
Dikon nos no por mira Yehova?
-
Kiko spiritu santu ta?
-
Bo por menshoná algun di e kualidatnan di Yehova?
MAS INFORMASHON INTERESANTE
Konosé Yehova mihó analisando su kuater kualidatnan di mas importante.
Wak ki prueba tin ku Yehova no ta presente den tur kos ni ku e ta tur kaminda.
Wak dikon Beibel ta kompará spiritu santu ku e mannan di Dios.
Tabata difísil pa un hòmber siegu kere ku Dios ta stim’é. Wak kiko a kambia su punto di bista.
“Awor Mi Ta Sinti Ku Mi Por Yuda Otro Hende” (E Toren di Vigilansia di 1 di òktober 2015)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
