LES 07
Ki Clase di Persona Jehova Ta?
Ki clase di Persona bo ta pensa cu Jehova Dios ta? Algun hende ta pensa cu e ta impresionante y leu for di nos, y cu nos no por tin un amistad cu ne. Tin hende ta pensa cu e ta un Persona poderoso cu no tin sintimento. Ki clase di Persona Jehova ta realmente? Mediante Bijbel, esta, Dios su Palabra, Jehova ta revela algun di su cualidadnan. Ademas, Bijbel ta mustra cu Jehova ta interesa den bo.
1. Dicon nos no por mira Dios?
“Dios ta un Spirito.” (Juan 4:24) Jehova no tin un curpa fisico manera nos tin. Jehova ta un Persona invisibel cu ta biba den cielo.
2. Kico ta algun cualidad cu Jehova tin?
Nos no por mira Jehova, pero ora nos siña conoc’e, nos ta sinti nos motiva pa stim’e pasobra e ta un Persona real y e tin bunita cualidad. Bijbel ta mustra cu Jehova stima husticia y cu e no ta bandona hende cu ta leal na dje. (Salmo 37:28) E “tin masha cariño, compasion y misericordia”, specialmente pa hende cu ta sufri. (Santiago 5:11) Bijbel ta mustra tambe cu “Jehova ta cerca di hende cu tin curason kibra; e ta salba hende cu ta desanima.” (Salmo 34:18) Ademas, bo tabata sa cu loke nos ta haci por pone Jehova bira sea contento of tristo? Ora un persona ta scoge pa haci malo, esey ta desapunta Jehova y ta haci Jehova tristo. (Salmo 78:40, 41) Di otro banda, si un persona ta scoge pa haci bon, esey ta haci Jehova contento.—Lesa Proverbionan 27:11.
3. Con Jehova ta mustra cu e ta stima nos?
E cualidad principal di Jehova ta amor. De echo, “Dios ta amor.” (1 Juan 4:8) Jehova a revela su amor na nos no solamente mediante Bijbel, sino tambe mediante loke el a crea. (Lesa Echonan 14:17.) Tuma por ehempel e manera cu el a crea nos. Nos por mira un variedad di color bunita, scucha dushi musica y disfruta di dushi cuminda. Si, Jehova a crea nos pa disfruta di bida.
KICO MAS NOS POR SIÑA?
Laga nos wak kico Jehova ta uza pa logra varios cos asombroso. Despues, wak con Jehova a revela su bunita cualidadnan na nos.
4. Spirito santo ta Dios su forsa activo
Mescos cu nos ta uza nos mannan pa haci algo, Jehova ta uza su spirito santo pa haci tur loke e ta desea. Bijbel ta mustra cu spirito santo no ta un persona. Mas bien, e ta e forsa cu Jehova ta uza pa cumpli cu su boluntad. Lesa Lucas 11:13 y Echonan 2:17. Despues, analisa e siguiente preguntanan:
-
Dios lo “drama” su spirito santo riba hende cu pidie pa su spirito santo. Pues, bo ta kere cu spirito santo ta un persona of e ta e forsa activo di Dios? Dicon bo ta pensa esey?
Jehova ta uza su spirito santo pa logra varios cos asombroso. Lesa Salmo 104:30 y 2 Pedro 1:20, 21. Despues, analisa e siguiente pregunta:
-
Con ta algun manera cu Jehova a uza su spirito santo?
5. Jehova tin bunita cualidad
Aunke cu Moises tabata un fiel sirbidor di Dios, e kier a siña mas tocante su Creador. Pesey, Moises a bisa Dios: “Laga mi conoce bo camindanan, pa mi conoce bo.” (Exodo 33:13) Como contesta, Jehova a revela na Moises algun di su cualidadnan. Lesa Exodo 34:4-6. Despues, analisa e siguiente preguntanan:
-
Cua ta e cualidadnan cu Jehova a revela na Moises?
-
Ki cualidad di Jehova bo ta gusta mas?
6. Jehova ta interesa den nos
E Hebreonan, kendenan tabata e pueblo di Jehova den antiguedad, tabata catibo na Egipto. Con Jehova a sintie ora e tabata mira su pueblo sufri? Toca e AUDIO y sigui e lesamento di Exodo 3:1-10 of lesa e textonan den Bijbel. Despues, analisa e siguiente preguntanan:
-
Segun e relato aki, con Jehova ta sintie ora e mira hende sufri?—Wak versiculo 7 y 8.
-
Bo ta kere cu di berdad Jehova kier yuda hende y cu e por haci esey? Dicon bo ta pensa asina?
7. Nos por mira e cualidadnan di Jehova den naturaleza
Nos por siña tocante e cualidadnan di Jehova ora nos mira loke el a crea. Pasa e VIDEO. Despues, lesa Romanonan 1:20 y analisa e siguiente pregunta:
-
Ki cualidad di Jehova bo ta mira den loke el a crea?
LOKE HENDE SA BISA: “Dios no ta un persona real. E ta djis un forsa cu ta tur caminda.”
-
Kico abo mes ta pensa?
-
Dicon bo ta pensa esey?
RESUMEN
Jehova ta un Persona invisibel. E tin hopi bunita cualidad, y su cualidad principal ta amor.
Repaso
-
Dicon nos no por mira Jehova?
-
Kico spirito santo ta?
-
Bo por menciona algun di e cualidadnan di Jehova?
MAS INFORMACION INTERESANTE
Conoce Jehova mihor analisando su cuater cualidadnan di mas importante.
Wak ki prueba tin cu Jehova no ta presente den tur cos ni cu e ta tur caminda.
“Dios Ta Tur Caminda of Omnipresente?” (articulo riba jw.org)
Wak dicon Bijbel ta compara spirito santo cu e mannan di Dios.
Tabata dificil pa un homber ciego kere cu Dios ta stim’e. Wak kico a cambia su punto di bista.
“Awor Si Mi Ta Sinti Cu Mi Por Yuda Otro Hende” (E Toren di Vigilancia di 1 di october 2015)
You May Also Like
PREGUNTA CU HOPI HENDE SA HACI
Con un Curso di Bijbel cu Testigonan di Jehova Ta Bay?
Pa sigui un curso di Bijbel interactivo gratis cu testigonan di Jehova, bo por uza cualkier traduccion di Bijbel cu bo ta prefera. Sinti bo liber pa invita henter bo famia of amigonan pa join bo.
