LONGO DIA 07

Yehowa udi Muthu wa Luholo Lutshi?

TEGELELA MU

Wana tangiza egi Yehowa Nzambi wakhala luholo lutshi? Athu avula ana tangiza egi Nzambi wakhala gualeha, tuajiyilego guta n’enji maga nga gusuena hehi n’enji. Aye nji wana tangiza egi Nzambi wakhala nu ngolo jiavula gifua gikudi, uvi gashigo nu makalegelo ajiya gutuma athu ha gusuena gudi muene ba? Na Yehowa udi diago muthu wa luholo lutshi? Biblia yana gutumonesa makalegelo a Yehowa, yana zuela nji egi wana gudisagesa mukunda nu aye.

1. Mukunda natshi tuanago gumona Nzambi?

“Nzambi udi nyuma.” (Yone 4:24) Yehowa gakhalago nu muila gifua wetu. Udi nyuma, wana khala gosa mu dilu, tuajiyilego nji gumumona.

2. Makalegelo a luholo lutshi Yehowa wana khala nawo?

Tuajiyilego gumona Yehowa, uvi gula tualonguga ha gumujiya, mbatumuzumba muavula handaga udi muthu wa giamatshidia nu udi nu makalegelo abonga. Biblia idi muzuela egi: ‘Yehowa wana zumba ndaga jia giamatshidia, muene mbagashigo mubemba athu adi agujinginyina gudi muene.’ (Ngimbo 37:28) Wakhala nji nu “guzumba guakola nu khenda jiavula” gudi athu adi mumona malamba. (Yakoba 5:11) ‘Yehowa udi hehi nu athu adi nu gikenene, wana huluisa athu aguleba.’ (Ngimbo 34:18) Aye wana jiya egi ndaga tuana kalagala jiana suanguluisa Yehowa nga gumuhana gikenene ba? Gula tuakalagala ndaga jiabola Yehowa wana vua gikenene. (Ngimbo 78:40, 41) Uvi muthu wana kalagala ndaga jiawaha wana gumusuanguluisa.—Tanga Ishima 27:11.

3. Luholo lutshi Yehowa wana monesa egi wana gutuzumba?

Khadilo dia Yehowa diabalega ndando didi guzumba. Yadiago, “Nzambi udi guzumba.” (1 Yone 4:8) Yehowa wana monesa mu njila ya Biblia nu mu njila ya ima yafugile muene egi wana gutuzumba. (Tanga Makalegelo 14:17.) Ha gufezegesa, tangiza luholo luatufugile muene nu luendu lua gusuanguluga nu mikubu yabonga, ha gutegelela miziki yawaha nu ha gusuanguluga nu ima ya gudia yawaha. Yehowa wana tshigina egi tukhale nu gusuanguluga.

TUKAMBE GUJIYA NDAGA JIAVULA

Tala luholo Yehowa wana kalagala ndaga jia gushimana nu luholo wana monesa makalegelo enji abonga.

4. Nyuma ya Nzambi idi ngolo jienji

Yehowa wana kalegela nyuma yenji ha gutshita mudimo, gifua luholo esue nji tuana kalegela mago etu. Biblia yana monesa egi nyuma ya Nzambi ishigo muthu, uvi idi ngolo Nzambi wana kalegela midimo. Tanga Luka 11:13 nu Makalegelo 2:17, gungima zuelelenu mihu eyi yalandula:

Nzambi ‘mbawumuanga’ nyuma yenji gudi athu adi gumulomba nayo. Udi mutangiza egi nyuma ya Nzambi idi muthu nga idi ngolo Nzambi wana kalegela mudimo? Mukunda natshi udi muzuela ngenyi?

Yehowa wana kalagala ndaga jia gushimana mu njila ya nyuma yenji. Tanga Ngimbo 33:6 nu 2 Phetelo 1:20, 21, gungima zuelelenu muhu owu walandula:

Ima itshi Yehowa wakalegele mu njila ya nyuma yenji?

5. Yehowa wakhala nu makalegelo abonga

Moize wakhalele mukombeledi wa Nzambi, uvi wakambele gujiya mufugi wenji muabonga. Hene Moize wamuwambelele egi: ‘Nguleze njila jiaye, hagula ngugujiye.’ (Guzoga 33:13) Yehowa wawambelele Moize gula wakhalele muthu wa luholo lutshi. Tanga Guzoga 34:4-6, gungima zuelelenu mihu eyi yalandula:

Makalegelo atshi Yehowa wamonesele Moize?
Khadilo ditshi dia Yehowa diana gugusuanguluisa muavula?

6. Yehowa wana gudisagesa mukunda nu athu

Enya Isalele akhalele ahiga gu Ejipitu. Luholo lutshi Yehowa wadivuile tangua akombeledi enji akhalele mumonesewa lamba? Landula AUDIO wa lutango lua Biblia landula mu Biblia, nga ndo Tanga Guzoga 3:1-10. Gungima zuelelenu mihu eyi yalandula.

AUDIO: Yehowa Wakhalele Gudisagesa Mukunda nu Malamba Awo (2:45)

Ndaga eji jiagukuatesa ha gujiya egi Yehowa wana gudivua gikuatshi tangua athu ana mona malamba?—Tala verse 7 nu 8.
Udi mutangiza egi Yehowa wana tshigina diago gukuatesa athu ba? Wana khala diago nu ngolo jia guakuatesa ba? Mukunda natshi wazuela ngenyi?