LESON 07
Wat Nao Bible Talem Abaotem Jehovah?
Hao nao tingting blo iu abaotem Jehovah God? Iu tingse hem barava holy and farawe from iu, olsem olketa star insaed wanfala galaxy wea farawe tumas? Or iu tingse hem garem big paoa bat no garem tingting or feeling, wea hem olsem thunder and rain wea strong tumas? Jehovah hem wat kaen God? Bible storyim olketa wei blo Jehovah, and tu, Bible sei hem tingim iu.
1. Why nao iumi no savve lukim God?
“God hem wanfala Spirit.” (John 4:24) Jehovah no garem physical body. Hem wanfala spirit wea stap lo heven wea iumi no savve lukim.
2. Wanem nao samfala wei blo Jehovah?
Iumi no savve lukim Jehovah. Bat taem iumi savve lo hem bae iumi lovem hem bikos hem God wea garem olketa naesfala wei. Bible sei: “Jehovah tinghae lo justice, and hem bae no lusim olketa wea faithful lo hem.” (Psalm 37:28, NW) Hem ‘lovem and showimaot mercy’ tu, especially lo pipol wea kasem hard taem. (James 5:11) “Jehovah hem redi for helpem olketa wea sorre tumas, and hem sevem olketa wea discourage.” (Psalm 34:18, NW) Hao iu savve, iumi savve mekem Jehovah hapi or sorre? Man wea duim nogud samting hem mekem Jehovah feel nogud and sorre. (Sams 78:40, 41) Bat man wea duim gud samting hem mekem Jehovah hapi.—Readim Proverbs 27:11, NW.
3. Wat nao showim Jehovah lovem iumi?
Wanfala wei blo Jehovah hem love. Bible sei: “God hem love.” (1 John 4:8) Jehovah lovem iumi and iumi savve read abaotem lo Bible and lukim lo olketa samting wea hem creatim. (Readim Acts 14:17.) Example nao, tingim hao hem wakem iumi. Hem wakem iumi and iumi savve lukim olketa naes kala, herem naes music, and teistim naes kaikai. Hem laekem iumi for enjoyim laef.
DIG GO MOA
Bae iumi lanem hao Jehovah duim olketa big samting and hao hem showim iumi olketa naesfala wei blo hem.
4. Holy spirit hem paoa blo God
Olsem iumi iusim hand for duim waka, Jehovah iusim holy spirit blo hem. Bible sei holy spirit no wanfala god, bat hem paoa wea God iusim for duim samting wea hem laekem. Readim Luke 11:13 and Acts 2:17, then discussim tugeta olketa kwestin hia:
-
God “bae givim kam” holy spirit lo olketa wea askem. Iu tingse holy spirit hem wanfala God, or hem paoa blo God? Why nao iu sei olsem?
Jehovah iusim holy spirit for duim olketa big samting. Readim Psalm 33:6 (NW), and 2 Peter 1:20, 21, then discussim tugeta disfala kwestin:
-
Wat nao samfala samting wea Jehovah iusim holy spirit blo hem for duim?
5. Jehovah garem olketa naesfala wei
Moses hem faithful for worshipim God bat hem still laek for savve gud lo Creator blo hem. So Moses sei lo hem: “Plis yu tisim mi olketa wei blong yu, mekem mi savegud long yu.” (Eksodas 33:13) Then Jehovah talem samfala wei blo hem lo Moses. Readim Eksodas 34:4-6, then discussim tugeta olketa kwestin hia:
-
Wat nao samfala wei blo Jehovah wea Hem talem lo Moses?
-
Which wan lo olketa wei blo Jehovah nao iu laekem tumas?
6. Jehovah tingim pipol
Olketa pipol blo God bifor slave lo Egypt. Hao nao Jehovah feel taem hem lukim olketa safa? Pleim AUDIO and luk followim, or readim Exodus 3:1-10 (NW). Then discussim tugeta olketa kwestin hia.
-
Wat nao iu lane from disfala story abaotem feeling blo Jehovah taem hem lukim pipol safa?—Lukim verse 7, 8.
-
Iu tingse Jehovah barava laek for helpem iumi and hem fit for duim datwan? Why nao iu ting olsem?
7. Iumi savve lanem olketa wei blo Jehovah from creation
Olketa wei blo Jehovah showaot lo creation blo hem. Pleim VIDEO. Then readim Rome 1:20, and discussim tugeta disfala kwestin.
-
Wat nao samfala wei blo Jehovah wea iu tingim taem iu lukluk lo creation blo hem?
SAMFALA SAVVE TALEM: “From iumi no savve lukim God hard for iumi savve lo hem.”
-
Wat nao tingting blo iu?
-
Hao nao iu ting olsem?
MAIN POINT
Jehovah hem Spirit wea iumi no savve lukim. Hem garem love and staka naesfala wei tu.
Review
-
Why nao iumi no savve lukim Jehovah?
-
Wat nao holy spirit?
-
Wat nao samfala wei blo Jehovah?
FAENDAOT MOA
Read abaotem fofala wei blo Jehovah for savve gud lo hem.
Lukim pruv wea showim Jehovah hem no stap evriwea.
Lukim why Bible sei holy spirit hem olsem hand blo God.
Wanfala blind man faendem hard for bilivim God lovem hem. Faendaot wat nao mekem hem changem tingting blo hem.
“Distaem Nao Mi Fit for Helpem Olketa Narawan” (Wastaoa, November 1, 2015)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
