LISON 07

Kal tipu di algin ku Jeova sedu?

TOKA

Kuma ku bu pensa Jeova Deus sedu? Bu pensa kuma i un algin importanti dimas ku bu ka pudi pertusi del? O bu pensa kuma i un algin ku tene puder, ma ku ka tene sintimentu? Kal tipu di algin ku na bardadi Jeova sedu? Na si Palabra, Biblia, Jeova konta kal ki alguns di si manera, i konta tambi kuma i ta preokupa ku bo.

1. Ke ku manda no ka pudi oja Deus?

“Deus i Spiritu”. (Jon 4:24) Jeova ka tene un kurpu suma di pekaduris. El i spiritu i ta vivi na seu, un lugar ku no ka pudi oja.

2. Kal ki alguns manera di sedu di Jeova?

Apesar di kuma no ka pudi oja Jeova, el i un algin real ku tene maneras di sedu ku ta atrai kilis ku kunsil. Biblia fala: “SIÑOR ama kusa ku sta sertu, i ka na bandona si pobu fiel”. (Salmu 37:28) El tambi i “ta sinti garandi pena ku miserikordia” spesialmenti pa jintis ku sta na sufri. (Tiagu 5:11) “SIÑOR sta pertu di kilis ku tene korson kebrantadu; i ta salba kilis ku tene spiritu kalkadu.” (Salmu 34:18) Sera ki bu sibiba kuma, ke ku bu ta fasi pudi pui Jeova fika kontenti o tristi? Un algin ku disidi fasi ke ki mau, ta pui Deus fika tristi i sinti mal. (Salmu 78:40, 41) Ma un algin ku disidi fasi ke ki bon, ta pui Deus kontenti. — Lei Ditus 27:11.

3. Kuma ku Jeova mostra kuma i amanu?

Un di personalidadi mas garandi di Jeova i amor. Na bardadi, “Deus i amor.” (Anos ku pui italiku, 1 Jon 4:8) Jeova mostranu si amor i ka so atraves di Biblia, ma tambi atraves di kusas ki kumpu. (Lei Atus 14:17.) Pur izemplu, pensa na manera ki kumpunu. I danu kapasidadi di oja koris bonitu, di sukuta musikas bonitu, di sinti gustu di kumidas sabi. I misti pa no vivi sabi.

APRINDI MAS

Diskubri ke ku Jeova ta usa pa fasi kusas adimiradu. I dipus nota kuma ku Jeova mostranu si maneras di sedu ku ta fasinu pertusi del.

4. Spiritu santu i forsa ativu di Deus

Suma ku no ta usa no mon pa tarbaja, asin tambi ku Jeova ta usa si spiritu santu. Biblia mostra di kuma spiritu santu i ka Deus, ma i forsa ku Deus ta usa pa fasi kusas. Lei Lukas 11:13 ku Atus 2:17, dipus bo kombersa aserka des purguntas:

Deus na “darma” si spiritu santu riba di kilis ku pidil. Sera ki bu pensa kuma spiritu santu i Deus o i forsa ativu di Deus? Pabia ku bu fala sin?

Jeova ta usa si spiritu santu pa fasi kusas adimiradu. Lei Salmu 33:6 ku 2 Pedru 1:20, 21, dipus bo kombersa aserka des purgunta:

Di kal maneras ku Jeova usaba si spiritu santu?

5. Jeova tene un manera di sedu atraenti

Moisés seduba un servu fiel di Deus, ma i mistiba kunsi si Kriadur mas minjor. Asin Moisés falal: “Fasin kunsi bu kamiñu. Asin N ta kunsiu”. (Saida 33:13) I Jeova kontal kal tipu di algin ki sedu. Lei Saida 34:4-6, dipus bo kombersa aserka des purguntas:

Kal ki alguns di manera di sedu di Jeova ki konta Moisés?
Kal un des manera di sedu di Jeova ku bu mas gosta del?

6. Jeova ta preokupa ku jintis

Ebreus, povu di Deus, seduba skravu na Ejitu. Kuma ku Jeova sinti oca ke na sufri? Obi AUDIO i kumpaña leitura, o lei Saida 3:1-10. Dipus bo kombersa aserka des purguntas:

AUDIO: Jeova Preokupa ku se Sufrimentu (2:45)

Ke ku es storia ta sinau, aserka di kuma ku Jeova ta sinti ora ku pekaduris na sufri? — Jubi versikulu 7 ku 8.
Bu pensa kuma na bardadi Jeova misti juda pekaduris, i sera ki pudi fasil? Pabia ku bu pensa kuma i sin, o pabia ku bu pensa kuma i nau?