YACHACHINA 07
¿Imaina Jehová can?
Jehováp pensaptiyqui, ¿imaina creenqui casckanta? ¿Creenqui ancha atun casckanta pero ancha caru ckammanta tían, imaina estrellas ancha caru tiancu sujcuna estrellasmanta? ¿O pensanqui casckanta imallapas ancha atiyníyoj, mana personalidarníyoj, suj tormentát ina? ¿Imaina Jehová can? Paypa palabranpi, Bibliapi, Jehová ckaachiáysh huaquin cualidares y astaanpas interés ima apin ckammanta.
1. ¿Imajchus maa atiycu ckaayta Tata Yayát?
«Tata yaya can suj espíritu» (Juan 4:24). Jehová mana apin suj cuerpu aichamanta y tullumanta. Pay can suj espíritu ima causan cieluspi, suj lugar ima maa atiycu ckaayta.
2. ¿Mayckan cancu huaquin cualidares Jehovamanta?
Amapas maa atiycu ckaayta Jehovata, payta ʼrejsiptiycu chay tanckaaycu munanayshta, pay can suj persuna de verdar ancha súmaj cualidares apisckanta. Biblia nin: «Jehová justiciát munan y mana sacken picunasta leales capuncu» (Salmo 37:28). Astaanpas «ancha munácoj y misericordioso can», y astaan persunasuan ima usuncu (Santiago 5:11). «Jehová ckaylla tían picunasmanta soncko llaquiscka apincu; ckeshpichin picunasta utquiscka tiancu y desanimasckas» (Salmo 34:18). ¿Yacharanquichu ima atiycu cusichiyta o llaquichiyta Jehovata ʼruasckayshuan? Persuna ima ajllan mana alli imastis ʼruayta llaquichin y sonckonta nanachipun (Salmo 78:40, 41). Pero persuna ima ʼruan alli tiasckanta ancha ashcát cusichin (léey Proverbios 27:11).
3. ¿Imaina ckaachin Jehová munaasckayshta?
Atun cualidar Jehovamanta can múnay. Chayna can, «Tata Yaya múnay can» (1 Juan 4:8). Jehová múnay ckaachiáysh Biblia ckoaspa y túcuy imastis ima pay ʼruara (léey Hechos 14:17). Pénsay, por ejemplu, imaina ʼruaaraycu. Capaces ʼruaaraycu ckaáypaj súmaj colores y cusicúypaj musicaan y ancha súmaj micunasmanta. Pay munan causayniyshpi cusisckas canayshta.
ASTAAN ESTUDIANÁYSH TÍAN YACHÁYPAJ
Ckaasúysh imaina Jehová ʼruan atun imastis ʼruáypaj. Y chaymanta ckaasúysh imaina ckaachin súmaj cualidaresninta.
4. Espíritu santu: Tata Yáyap atiynin
Nockáysh maquisniyshta ocupáysh llamcáypaj y Jehová espíritu santunta ocupan. Biblia maa nin espíritu santu suj persuna can, manapé Tata Yáyap fuersan can ima pay ocupan tucuyta ʼruáypaj. Leeychis Lucas 11:13 y Hechos 2:17 y ʼrimaychis cá tapunasmanta:
-
Tata Yaya ichancka espíritu santunta saanpi picunasmanta mañapuncu. Chayvachá, ¿pensanqui ckam espíritu santu suj persuna can, o fuersa Tata Yayamanta can, túcuy imastis ʼruanánpaj? ¿Imajchus chayna pensanqui?
Jehová espíritu santunta ocupan atun imastis ʼruáypaj. Leeychis Salmo 33:6 y 2 Pedro 1:20, 21 y ʼrimaychis cá tapunasmanta:
-
¿Ima layasmanta ocupara Jehová espíritu santunta?
5. Jehová apin cualidares ima gustaaycu
Moisés siruera Tata Yayát lealmente. Aun chayna, munara astaan ʼrejsiyta paymanta. Chayraycu Moisés nipora: «Yachachíay ñanesniyquita atináypaj ʼrejsisuyta» (Éxodo 33:13). Jehová contestapora ʼrimapus huaquin cualidaresninmanta. Leeychis Éxodo 34:4-6 y ʼrimaychis cá tapunasmanta:
-
¿Mayckancuna carancu cualidares ima Jehová nipora Moisesta?
-
¿Ima cualidares Jehovamanta astaan gustasun ckamta?
6. Jehová persunasraycu preocupacun
Hebreos, Tata Yáyap llajtan ñaupamanta, Egiptopi esclavus carancu. ¿Imaina senticora Jehová ckaayta llajtanta usus? Uyariychis AUDIU y lecturát seguiychis, o leeychis Éxodo 3:1-10. Chaymanta ʼrimaychis cá tapunasmanta:
-
¿Imát yachachisun cá parte Bibliamanta imaina Jehová senticun ckaas persunasta usus? (Ckaaychis versículos 7 y 8).
-
¿Creenquichu ima Jehová de verdar yanapayta munan persunasta? ¿Imajchus ckam chayna pensanqui?
7. Naturalesáp ckaaycu Jehóvap cualidaresninta
Jehová yachachiáysh ima personalidar apin imastispi ima ʼruara. Ckaaychis VIDIU. Chaymanta leeychis Romanos 1:20 y ʼrimaychis cá tapunasmanta:
-
¿Ima cualidares Jehovamanta ckam ckaanqui túcuy ʼruasckanpi?
HUAQUINCUNA NINCU: «Tata Yaya can suj fuersa ima túcuy lauspi tían, mana can suj persuna ima atiycu ʼrejsiyta».
-
Ckam, ¿imát pensanqui?
-
¿Imajchus chayna pensanqui?
BIBLÍAP YACHACHINASNIN
Jehová can suj espíritu chayraycu maa atiycu ckaayta. Ancha súmaj cualidares apin, y túcuy cualidaresninmanta astaan súmaj can munayninta.
Yuyáypaj
-
¿Imajchus maa atiycu ckaayta Jehovata?
-
Espíritu santu, ¿imát can?
-
¿Mayckancuna cancu huaquin cualidares Jehovamanta?
ASTAAN YÁCHAY
ʼRéjsiy astaan allít Jehovata estudias taa cualidaresninta astaan súmaj.
«¿Imaina Tata Yaya can?» (La Atalaya, núm. 1 2019 huatamanta)
Ckáay ima ckaachin ima Jehová maa túcuy lauspi tían.
«¿Tata Yaya tían túcuy lauspi quiquin tiempupé?» (Artículo sitiuycumanta jw.org)
Ckáay imajchus Biblia nin espíritu santu can Tata Yáyap «maquisnin ina».
«Espíritu santu, ¿imát can?» (Artículo sitiuycumanta jw.org)
Suj ckari maa ckaajta cuestapora creeyta ima Tata Yaya payraycu preocupacun. Yáchay ima ʼruara maa chayna pensananta.
«Cunan cuentáp cayeni ima sujcunasta yanapayta atini» (La Atalaya, 1 octubremanta 2015 huatamanta)
