LECCIÓN 07
Jehová ¿imasna an?
Jehová Diospi iyarisha ¿imasnara iyaringui? ¿Sintinguichu pai yapa ushaira charishas canmanda caruyasha, paihua amigo tucungaj mana ushashca cuinta? ¿Iyaringuichu imasna yapajta ushayuj, shinzhi shunguyuj shu rayu cuinta shina? ¿Imasnara sirtu pacha Jehová an? Paihua shimi Bibliai, Jehová ricuchin pai imasna ashcara, paihuas shinallara ñucanchira yanapana munan.
1. ¿Imarasha Yaya Diosta mana ricuna ushanchi?
“Dios Ispiritumi” (Juan 4:24). Jehová mana charinzhu shu aicha, shu tullus. Pai shu espíritu ahua pachai causaj an, shu mana ricuna partii tian.
2. Jehová ¿ima tunu Dios an?
Jehovara mana ricuna ushashas paita ricsisha llaquina ushanchi, shu sirtu runa cuinta pai sumaj ruraiguna charishcaras. Biblia nin: “Jehová ali dirichu ruranara llaquij ashcaraigu, chuyaj shunguyujcunara mana saquingachu” (Salmo 37:28). Shinallara “yapa llaquij shunguyuj, sintij shunguyuj” an, imasna yapajta turmindarij runaunahua (Santiago 5:11). “Jehová yapa llaquirishca shunguyujcunama mayanlla tian; yapa turbarishca sintirijcunara quishpichinmi” (Salmo 34:18). Shinajpi ¿yachanguichu ñucanchi ruraihua cushiyachina, llaquichinas ushanchi Jehová Diosta? Maican runa manali cosasgunara rurangaj ajllasha paita llaquichin (Salmo 78:40, 41). Randi maican alira ruraj cushira sintichin Yaya Diosta (leai Proverbios 27:11).
3. ¿Imasnara ricuchin Jehová ñucanchira llaquishcara?
Jehová pai llaquinara ricuchin ali shunguhua. Chimanda “Dios llaquijmi” (1 Juan 4:8). Jehová Bibliamanda llaquinara ricuchin shinajpi pai rurashca cosasgunahuas (leai Hechos 14:17). Iyari pai ñucanchira imasna rurarca. Pai rurarca gustu colorgunara ricungahua, música uyanamanda gustu sintingahua, mishqui micunaunara micungahua rurarca. Shinajpi pai munanmi cushihua causanuchu.
MAS YACHAI
Ricushun imasna Jehová manzhanaita cosasgunara rurashcara. Huasha yachashun imasna ricuchin sumaj ricuchishcaunaras.
4. Espíritu santo: Diospa ushai an
Ñucanchi maquiunara utilizanchi tarbangahua, Jehová paihua espíritu santora utilizan. Biblia mana ninzhu espíritu santo shu runa ashcara, chi randi Diospa ushai ashcara, pai utilizan tucuira rurangaj. Leaichi Lucas 11:13; Hechos 2:17, huasha catij tapuimanda rimaichi:
-
Dios paihua espíritu santora maican mañajcunara cunga. Chiraigu can ¿quiringuichu espíritu santo shu runa ajta o Diospa ushai ashcara? ¿Imarasha shina iyangui?
Jehová paihua espíritu santora utilizan manzhanaita cosasgunara rurangaj. Leaichi Salmo 33:6; 2 Pedro 1:20, 21, huasha catij tapuimanda rimaichi:
-
Jehová paihua espíritu santora ¿ima tunuibi utilizashca?
5. Jehová imasna ashcara ricsina paihuajma mayanllayachin
Moisés chuyaj shunguhua Yaya Diosta sirvica. Shinallara alira mas ricsina munaca tucuira Rurajta. Chiraigu Moisés rimaca: “Camba purina ñambiunara yachachihuai canda ricsingaj” (Éxodo 33:13). Jehová Moisesta rimaca pai imasna ashcara. Leaichi Éxodo 34:4-6, huasha catij tapuigunamanda rimaichi:
-
Jehová ¿imara rimaca Moisesta pai imasna ashcara?
-
¿Imara mas gustangui Jehovamanda?
6. Jehová runaunara llaquinmi
Hebreoguna ñaupa timpui Diospa llacta, Egipto llactai esclavoguna anuca. Paihua llacta turmindarishcai ¿imasna Jehová sintirica? GRABASHCARA uyaichi shinallara leaichi Éxodo 3:1-10. Huasha catij tapuigunamanda rimaichi:
-
Cai cuintashca ¿imara yachachin Jehová sintishcamanda runauna turmindariushcara ricusha? (Versículo 7, 8 ricuichi).
-
Can ¿sirtu pacha quiringuichu Jehová Dios runaunara yanapana munashcara? ¿Chita rurana ushangachu? Can ¿imarasha shina iyangui?
7. Jehová imasna ashcara yachana ushanchi pai rurashcaunara ricusha
Jehová ñucanchira yachachin imasna ashcara pai rurashca cosasgunahua. VIDEORA ricuichi. Shinallara leaichi Romanos 1:20, huasha catij tapuimanda rimaichi:
-
Jehová rurashcauna ¿imara yachachin paimanda?
RUNAUNA CASNA NINUJPI: “Diosta mana ricuna ushashcamanda mana ricsina ushanchi”.
-
Can ¿imara iyangui?
-
¿Imarasha shina iyangui?
IMARA YACHASHCANGUI
Jehová shu espíritu an chiraigu mana ricuna ushanchi. Ali shungu ricuchinaunara charin shinajpis pai llaquina astaun mas valij an.
Iyaringaj
-
¿Imarasha Jehovara mana ricuna ushanchi?
-
¿Imara an espíritu santo?
-
Jehová ¿ima tunu Dios an?
RICUNGUI
Ushaj, sabiru, ali dirichu ruraj, llaquij Dios ashcara yachasha Jehovara mas ricsina ushangui.
Ricui imarasha ninchi Jehová mana tucui partiunai tiashcara.
“¿Yaya Dios tucui partiunai, tucui cosasgunai tianzhu?” (jw.org partii tiaj tema)
Ricui imarasha Biblia espíritu santora Diospa maqui cuinta ashcara riman.
Shu mana ricunara ushaj runa quirica Yaya Dios mana llaquishcara. Yachai imara paihua iyaira turcachica.
“Cuna shujcunara yanapangaj sintini” (La Atalaya, 1 de octubre de 2015)
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
