07 YACHACHIKUY
¿Imaynan Jehová Dios?
Wakin runakunan ninku: “Diosqa tukuy atiyniyoqmi, ichaqa nishu karupin kashan. Paymanqa manan asuykuyta atisunmanchu”, nispa. Wakintaq ninku: “Diosqa wayra jinallan, manan sonqoyoqchu”, nispa. Qanri, ¿imaynatan Jehová Diosta qhawarinki? ¿Imaynan Jehová Dios kanman? Payqa simin qelqapin willawanchis imayna Dioschus chayta, maytukuytachus munakuwanchis chaytapas.
1. ¿Imaraykun Jehová Diosta mana rikunchischu?
“Diosqa espiritun” (Juan 4:24). Payqa manan noqanchis jina aychayoq tulluyoqchu, chayraykun paytaqa mana rikuyta atisunmanchu. Chaymantapas payqa janaq pachapin tiyan. Maypichus tiyasqantapas manan rikuyta atisunmanchu.
2. ¿Imayna Diosmi Jehová Dios?
Manaña Jehová Diosta rikuyta atinchischu chaypas, payta allinta reqsispaqa munakuytan qallarisunchis. Payqa cheqaq Diosmi, munakuqtaqmi kanpas. Chayraykun Bibliapipas nin: “Jehová Diosqa chanin kaqtan munakun, manan saqenqachu tukuy sonqowan serviqninkunataqa”, nispa (Salmos 37:28). Chaymantapas payqa “ancha munakuq [...] khuyapayakuq” Diosmi, payqa khuyapayanmi llapa sufriq runakunata (Santiago 5:11). Chaymantapas “Jehová Diosqa sonqo nanasqakunawan kuskan kashan, sinchi llakisqakunatapas llakikuyninmantan libran” (Salmos 34:18). Runakunaqa atisunmanmi Jehová Diosta kusichiyta llakichiytapas. Mana allinkunata ruwaspaqa maytan sonqonta nanachisunman (Salmos 78:40, 41). Allin kaqta ruwaspan ichaqa anchatapuni kusichisun (leey Proverbios 27:11).
3. ¿Imaynapin reparasunman Jehová Dios munakuwasqanchista?
Jehová Diosqa ancha munakuqmi. Chaymi Bibliapas nin: “Diosqa munakuymi”, nispa (1 Juan 4:8). Jehová Diosqa simin qelqapi llapa kamasqankunapi iman munakuwasqanchista rikuchiwanchis (leey Hechos 14:17). Imayna kamawasqanchispi piensarisun. Ñawinchisqa color-colortan rikun ¿riki? Takikunapas maytan sonqonchista kusirichin, mijunapas may sumaqmi. Chaykunata reparananchispaq jinan Diosqa kamawasqanchis. Jehová Diosqa kusisqa kausananchistan munan.
ASTAWAN YACHASUNCHIS
Kunanqa yachasunchis imawansi Jehová Dios imatapas ruwan chayta, may munakuqchus pay chaytapas.
4. Santo espirituqa Diospa atiyninmi
Runakunaqa makinchiswanmi llank’anchis, Jehová Diosmi ichaqa santo espiritunwan imatapas ruwan. Bibliaq nisqan jina, santo espirituqa manan Dios jinachu, aswanpas Jehová Diospa mana rikuna kallpanmi. Chaywanmi Diosqa tukuy imata kamarqan. Leeychis Lucas 11:13; Hechos 2:17 textokunata, jinaspa jamuq tapuykunaman jina parlariychis:
-
Bibliaq nisqan jina, Diosqa paymanta mañakuqkunamanmi santo espiritunta jich’aykamun. Chhaynaqa, ¿juj dioschu kanman santo espíritu, icha Diospa kallpanchu? ¿Imaniwaqtaq?
Jehová Diosqa santo espiritunwanmi imaymanata ruwan. Leeychis Salmos 33:6; 2 Pedro 1:20, 21 textokunata, jinaspa jamuq tapuyman jina parlariychis:
-
¿Imakunatan Jehová Dios santo espiritunwan ruwarqan?
5. Jehová Diosqa ancha munakuqmi
Moisesqa tukuy sonqon Jehová Diosta servirqan, chaywanpas astawanmi payta reqsiyta munarqan. Chaymi nirqan: “Reqsichiway ñanniykikunata, chhaynapi qanta reqsinaypaq”, nispa (Éxodo 33:13). Jehová Diosqa uyarirqanmi mañakusqanta, chaymi imaynachus kasqanta Moisesman willarqan. Leeychis Éxodo 34:4-6 textota, jinaspa jamuq tapuykunaman jina parlariychis:
-
¿Imayna kasqantan Jehová Dios Moisesman willarqan?
-
¿Jehová Dios imayna kasqanmi astawan kusichisunki?
6. Jehová Diosqa llakikunmi runakunamanta
Ñaupa tiempopin Israel runakunaqa Diospa llaqtan karqanku, paykunaqa sinchitan Egipto llaqtapi sufrirqanku. ¿Imaynan Jehová Dios tarikunman karqan sufrisqankuta rikuspa? UYARINAPAQ nisqata uyariychis, jinaspa leekamusqanta Bibliaykichispi qatipaychis, mana chayqa leeychis Éxodo 3:1-10 textota. Jinaspa jamuq tapuykunaman jina rimaychis:
-
¿Imaynatan Jehová Dios qhawarin llapa sufriq runakunata? (7, 8 versiculokunata qhawaychis).
-
¿Munanchu Jehová Dios runakuna yanapayta? ¿Atinmanchu runakunata yanapayta? ¿Imaraykun chhaynata piensanki?
7. Jehová Diosqa kamasqankunapin reqsichikun imaynachus kasqanta
Jehová Diosqa llapa kamasqankunapin sut’ita willawanchis imaynachus kasqanta. VIDEOTA qhawaychis. Chaymantataq leeychis Romanos 1:20 textota, jinaspa jamuq tapuyman jina parlariychis:
-
¿Imayna kasqantan reparanki Jehová Diospa kamasqankunata qhawaspa?
WAKIN RUNAKUNAN NINKU: “Diosqa juj atiyniyoq kallpallan, tukuy ladopitaqmi kashanpas. Paytaqa manan reqsiyta atisunmanchu”, nispa.
-
¿Chay nisqanku cheqaqchu kanman?
-
¿Imaraykun chhaynata piensanki?
IMATAN YACHAMURQANCHIS
Jehová Diosqa angelkuna jina mana rikuna cuerpoyoqmi. Payqa ancha munakuqmi, sumaq sonqo Diosmi.
Yuyarisun
-
¿Imaraykun Jehová Diosta mana rikuyta atinchischu?
-
¿Iman santo espíritu?
-
¿Imaynan kamaqninchis Jehová Dios?
ASTAWAN YACHANAYKIPAQ
Kay qelqapin willashan Jehová Dios tukuy atiyniyoq, yachayniyoq, chanin Dios, munakuq Dios kasqanmanta.
Jehová Diosqa manan tukuy ladopichu kashan, chaymantan kay qelqapi rimashan.
Diosqa imaymanatan ruwarqan santo espiritunwan, chaymantan kay qelqapi willashan.
Juj ñausa runan piensarqan Jehová Dios paymanta mana llakikunanpaq. Kay qelqapin yachanki imas payta yanaparqan chhayna piensasqanta cambiananpaq chayta.
“Kunanqa jujkunatan yanapayta atini” (Qhawaq, 2015 watapi 1 noviembre)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
