YAĆHACHICUY 7
¿Imanuymi Jehová Dios?
¿Imactam pinsanqui Dios imanuymi? Waquin nunacuna nipäcun, Dios jatun jatunmi payman manam aśhuycuchwanchu, waquincunañatac nin: Dios alli-alli poderniyümi manam ya’anchicpï llaquicunmanchu. Chayurá, ¿imanuymi Jehová Dios? Bibliaćhu nimanchic, Jehová Diosninchic imanuy caśhanta chaypi’a nimanchic cuyamanchicmi imay camapis.
1. ¿Imapïmi mana Diosta licachwanchu?
“Dios espiritum” (Juan 4:24, TNM). Dios manam aychayüchu nï tulluyüchu. Pay cielućhumi yaćhan, chaymi mana licachwanchu yaćhaśhan läductapis.
2. ¿Imanuymi Jehová Dios?
Jehovata masqui mana licayta atipalpis, lisilul’a munanchicmi cuyayta pay’a allin-cayniyümi. Bibliaca nin: Jehová “allincällactamá cuyan; chalapacünincunacta pay manamá caćhaycunchu” (Salmo 37:28). Nintacmi “Jehová alli cuyacümi, llaquipacümi”, masta llaquipan ñacacuśha cäcunatam (Santiago 5:11, TNM). “Pasaypi llaquićhu cäcunäwanmi [Jehová] caycun; llaquisha śhun’uyücunätamá pay salbaycun” (Salmo 34:18). ¿Yaćhalanquichun Jehovata cushichichwanchućh o llaquichichwanchućh lulayninchicwan? Mana allinta imactapis lulaptinchic Jehovapa śhun’unta nanachinchic ñatac llaquichinchic. (Salmo 78:40, 41). Allinta lulaptinchic’a cushichiśhunmi (liguicuy Proverbios 27:11).
3. ¿Imanuypam Jehová licachin cuyamaśhanchicta?
Jehová Dios alli-alli cuyacümi. Bibliaca ninmi: “Dios cuyaymi” (1 Juan 4:8, TNM). Jehová allictam cuyamanchic chaymi umalanchic Bibliata ñatac licalichila imacunactapis (liguicuy Hechos 14:17). Pay imanuytam lulamalanchic. Ya’anchic lulaśha cayanchic imaymana colorta licananchicpä, taquicunacta uyalilpis cushicunchicmi, miculpis tantianchicmi mishqui caśhanta. Jehová munan cushisha cananchictam.
MASTA YAĆHAYCUŚHUN
Cayćhu yaćhaśhun imawan Jehová lulaśhanta lluy imacunactapis. Chaypi’a yaćhaśhun imanuy allin-caynin caśhanta.
4. Chuya espirituca: Diospa poderninmi
Ya’anchic trabajanchic maquinchicwan, Jehova ñatac lulan chuya espiritunwan. Biblia nishannü chuya espirituca manam Dioschu, aśhwanpa Diospa poderninmi chaywanmi imacunactapis licalichila. Liguiśhun Lucas 11:13 ñatac Hechos 2:17, ñatac limaśhun caypi:
-
Liguiśhanchicnü Diosta mañacuptiqui chuya espiritunta umäśhunmi. Chayurá, ¿chuya espirituca nunachun o Diospa poderninchun?
Jehová chuya espiritunwanmi lluy imacunactapis lulala. Liguiśhun Salmo 33:6 ñatac 2 Pedro 1:20, 21, ñatac limaśhun caypi:
-
¿Imacunactam Jehová lulala poderninwan?
5. Jehovapa allin-caynin maypis wätacunam
Moisés lluy śhun’unwanmi sirvila Jehovata. Mastalämi lisita munala Jehovata. Chaymi Moisés nila: “Lisicachillamay imanuy caśhayquita” (Éxodo 33:13, TNM). Chaymi Jehová nila imanuy caśhanta. Liguiśhun Éxodo 34:4-6, ñatac limaśhun caypi:
-
¿Ima mastam Jehová pay quiquinpi nila Moisesta?
-
¿Jehová Dios imanuy caśhanmi masta gustaśhunqui?
6. Jehová ya’anchicta yalpamanchicmi
Unay tiempo israelitacunaca Diospa malcan esclavum capäcula. ¿Imanuymi sintila Jehová malcanta ñacayäta lical? Uyaliśhun AUDIUCTA o liguiśhun Éxodo 3:1-10. Chaypi’a limaśhun caypi:
-
¿Imanuymi Jehová sienten nunacunata ñacayäta lical? (Liguipäcuy versículo 7 ñatac 8).
-
¿Jehová Dios un’amachwanchućh? ¿Yanapamachwanchućh? Am, ¿ima ninquim?
7. Licalichiśhancunacta licalmi Dios imanuy caśhanta yaćhanchic
Jehovata lisinquimanmi lulaśhancunacta lical. Licaśhun VIDEUCTA. Chaypi’a liguiśhun Romanos 1:20 ñatac limaśhun caypi:
-
Jehovapa lluy licalichiśhancunacta lical, ¿imactam yaćhanchic paypi?
WAQUINCUNA NIPÄCUN: “Diosta mana licayal’a, ¿imanuypam paypi yaćhachwan?”.
-
¿Imactam am pinsanqui?
IMACTAM YAĆHALUNCHIC
Jehová espiritum chaymi mana licanchicchu. Pay llaquipayniyümi, ñatac alli cuyacümi.
Yalpaśhun
-
¿Imapïmi mana licachwanchu Jehovata?
-
¿Imam chuya espirituca?
-
Bibliaca nishannü, ¿imanuymi Jehová?
MASTA YAĆHANAYQUIPÄ
Jehová poderniyümi, yaćhayniyümi, allincunacta lulami ñatac alli cuyacümi, liguiy.
¿Imapïmi ninchic Jehová manam enteru lädućhuchu cayan? Liguiy.
“¿Está Dios en todas partes? ¿Es omnipresente?” (Artículo de jw.org)
Bibliaćhumi nin Jehovapa chuya espiritun ‘maquinnü’ caśhanta, liguiy.
Juc apla hombre pinsala Dios manam yalpamanchu nil. Yaćhaycuy imanuypam cambiala piensaśhanta, liguiy.
“Ahora siento que puedo ayudar a los demás” (La Atalaya, 1 de octubre de 2015)
