LEKCIJA 7
Savo hino o Jehovas?
Te pes phenel o Del Jehovas, so tuke avel pre goďi? Vareko phenel, hoj o Del hino igen rajikano a avka dur sar o čercheňa pro ňebos. Aver phenen, hoj o Del nane dženo, ča bari zor sar varesavi bari balvaj. Savo čačes hino o Jehovas? O Jehovas prekal e Biblija sikavel, savo hino a so savoro kerel predal tute.
1) Soske le Devles našťi dikhas?
„O Del hino duchos.“ (Ján 4:24) Le Jehovas nane ajso ťelos sar amen. Hino duchos a dživel andro ňebos, pro than, so našťi dikhas.
2) Savo hino o Jehovas?
Le Jehovas našťi dikhas, aľe the avka les šaj rado dikhas, kana sprindžaraha savo hino. E Biblija phenel: „Bo o Jehovas kamel spravodlivosť a na mukhela peskere vernen.“ (Žalm 37:28) Ov hino tiš „igen jileskero a achaľol amen“ te predživas pharipena. (Jakub 5:11) „O Jehovas hino pašes olenge, savenge hino o jilo strapimen dukhatar, zachraňinel olen, so cerpinen.“ (Žalm 34:18, dikh e poznamka) Džanehas, hoj le Jehovaske nane jekh, so keras? Te keras nalačhipen, le Jehovas olestar dukhal o jilo. (Žalm 78:40, 41) Aľe te keras oda, so hin lačho, o Jehovas olestar igen radisaľol. (Pregen Príslovia 27:11)
3) Sar o Jehovas sikavel, hoj amen kamel?
Ňič nane bareder sar le Jehovaskero kamiben. „O Del hino o kamiben.“ (1. Jána 4:8) O Jehovas amenge sikavel peskero kamiben prekal e Biblija a tiš prekal savoro, so kerďa. (Pregen Skutky 14:17) Ča le tuke sar sam kerde. Paľikeras leske, hoj šaj dikhas but farbi, hoj šaj šunas šukar giľa a hoj amenge šmakinel lačho chaben. O Jehovas kamel, kaj amen te el lačho dživipen.
DODŽAN TUT BUTER
Sar o Jehovas savoro šukares kerďa. Paľis dikheha, savo lačho hino.
4) Svato duchos – Devleskeri zor
Amen keras buťi le vastenca a o Del le svatone duchoha. E Biblija sikavel, hoj o svato duchos nane dženo. Hino Devleskeri zor, savaha kerel, so kamel. Pregen Lukáš 11:13 the Skutki 2:17 a vakeren jekhetane:
-
O Del šaj „čhivel avri“ svato duchos pre ola, so les pal ada mangen. Ta, so phenes, šaj el o svato duchos dženo? Soske avka phenes?
O Jehovas le svatone duchoha savoro šukares kerďa. Pregen Žalm 104:30 the 2. Petra 1:20, 21 a vakeren jekhetane:
-
So o Jehovas kerďa le svatone duchoha?
5) Kamas le Jehovas vaš oda, savo hino
O Mojžiš rado dikhelas le Jehovas, aľe the avka kamelas pal leste te džanel mek buter. Phenďa le Jehovaske: „Mangav tut, de man, kaj te sprindžarav tire droma, bo kamav mek buter pal tute te džanel.“ (2. Mojžišova 33:13) So pre oda phenďa o Jehovas? Pregen 2. Mojžišova 34:4–6 a vakeren jekhetane:
-
So o Jehovas phenďa le Mojžišoske pal peste?
-
So tu rado dikhes pro Jehovas?
6) Le Jehovaske nane jekh, so predživas
Le Devleskero nipos, o Židi, sas otroka andro Egipt. Sar sas le Jehovaske te dikhelas, so odoj predživen? Mukh o AUDIO a šun abo pregen 2. Mojžišova 3:1–10. Paľis vakeren jekhetane.
-
Sar hin le Jehovaske, te zadživas dukh? (Dikh o teksti 7, 8.)
-
Čačes amenge o Jehovas kamel te pomožinel a hin les pre kada zor? Khatar ada džanes?
7) La prirodatar sikhľuvas, savo hino o Jehovas
O Jehovas kerďa e priroda avka, kaj latar te sprindžaras, savo hino. Mukh o VIDEJO. Paľis pregen Rimanom 1:20 a vakeren jekhetane.
-
So džanes te phenel pal o Jehovas, te dikhes sar savoro kerďa?
VAREKO ŠAJ PHENEL: „O Del nane dženo, aľe ča zor, savi hiňi všadzik.“
-
So pre ada phenes?
-
Sar džanes, hoj hin oda čačipen?
SO SIKHĽIĽAM
Le Jehovas nane manušikano ťelos. Ov hino Duchos. Igen les kamas, vaš ada, savo hino. Ňič nane bareder sar leskero kamiben.
So bi phenehas
-
Soske našťi dikhas le Jehovas?
-
So hin o svato duchos?
-
So džanes te phenel, savo hino o Jehovas?
DIKH TUKE BUTER
Mek buter tut dodžan, savo hino o Jehovas.
Pregen tuke, či hin o Del pre dojekh than.
Pregen tuke, soske e Biblija phenel, hoj o svato duchos hino sar Devleskere vasta.
Koro manuš na paťalas, hoj les o Del rado dikhel. Pregen tuke, so leske pomožinďa, kaj aleske te paťal.
„Teraz mám pocit, že môžem pomáhať druhým“ (Strážna veža z 1. októbra 2015)
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
