07 УРОКИ

Саво си о Йехова?

МУК

Саво си о Йехова?

Кана мислинес е Йеховаске, со авел те гогяте? Дали мислинес, кай ов си бут баро тай бут дуре амендар сар о черхеня ко небес? Или мислинес, кай о Дел си само йекх бут бари сила, която нащи те чувствинел нищо, сар йекх бари буря? Ама саво си наистина о Йехова? Чрез пере Словосте ов сикавел саво си. Тари Библия също ащи те ахальовес, кай ов дикхел туке.

1. Соске нащи те дикхас е Девлес?

„О Дел си духос.“ (Йоан 4:24) Е Йеховас нанай сар амаре телосте. Ов си Духос, ковато живинел ко небес, йекх тхан, ковато аме нащи те дикхас.

2. Саво си о Йехова?

Нищо кай нащи те дикхас е Йеховас, ов си реално тай си бут лачшо. Аке соске, кана пенжарас лес, амари любов кариг лесте барьол. Анди Библия пхенел пес: „О Йехова дехел (обича) и справедливост тай нанай те мукел калкен, колато си верна леске.“ (Псалм 37:28) Ов „си жалостиво тай милостиво“ особено кариг о мануша, коленге си пхаро. (Яков 5:11) „О Йехова си паше жи калкенде, колен иси бари дукх тай спасинел калкен, колен нанай силес.“ (Псалм 34:18) Жанес ли, кай о букя, колато керас ащи те анен радост е Йеховаске или те дукхавен лес? Кана дикхел, кай декхой мангел те керел кханилипе, о Йехова хал холи тай дукхал лес. (Псалм 78:40, 41) Ама кана мануш керел лачшипе, анел леске радост. (Четине Притчи 27:11.)

3. Сар о Йехова сикавел пи любов кариг аменде?

Е Йеховаскоро най-баро качество си и любов. Даже ов „си любов“. (1 Йоан 4:8) Ахальовас, кай о Йехова дехел амен, ма само тари Библия, а таро букя-да, колато кергяс. (Четине Деяния 14:17.) Например помислине сар кергяс амен. Аме ащи те дикхас о шукар цветовя, те шунас и шукар музика тай те усетинас кизом си вкусно о хабе. Калка букя си таро Йехова, соскето ов мангел те овел амен шукар животос.

РОДЕ ПО-ХОРЕСТЕ

Ахальов со използвинел о Йехова, за те керел саворе шукар букя. После дикх сар о Йехова сикавел кизом си лачшо.

4. О свято духос си е Девлескери сила

Сарто аме керас бути амаре вастенца, о Дел-да керел всичко пе святоне духоса. И Библия сикавел, кай о свято духос нанай дел, а си и сила, коласа о Дел керел всичко со мангел. Четинен Лука 11:13 тай Деяния 2:17 тай хоратинен калке въпросиенге:

О Дел „ка чшорел пе святоне духостар“ упрал о мануша, колато манген лес лестар. Со ахальовес калке думендар, дали о свято духос си дел или си е Девлескери сила? Соске?

О Йехова керел бут шукар букя пе святоне духоса. Четинен Псалм 33:6 тай и бележка кариг лесте, тай 2 Петър 1:20, 21 тай хоратинен калке въпросиеске:

Саве букя кергяс о Йехова пе святоне духоса?

5. О Йехова си бут лачшо

О Моисей служинелас верно е Девлеске, ама мангелас те пенжарел пе Създателес по-лачшес. Аке соске пхенгяс леске: „Сикав манге тере дрома, за те пенжарав тут.“ (Изход 33:13) Тогава о Йехова пхенгяс е Моисейеске саво си. Четинен Изход 34:4-6 тай хоратинен калке въпросиенге:

Со пхенгяс о Йехова за песке, кана хоратингяс е Моисейеса?
Со харешинел туке най-бут андо Йехова?

6. О Йехова дикхел е манушенге

Е Девлескоро народос, о еврея, сине робя андо Египет. Сар чувствинелас пес о Йехова, кана дикхелас кизом си ленге пхаро? Дикхен со пишинел андо Изход 3:1-10 бискай шунен о ЗАПИСИ или четинен о стиховя тумаре Библиятар. После хоратинен калке въпросиенге:

ЗАПИСИ: Йехова не бил безразличен към страданията им (2:45)

Според о стиховя, сар чувствинел пес о Йехова, кана о мануша мъчинен пес? (Дикх о стиховя 7 тай 8.)
Мислинес ли, кай о Йехова наистина мангел тай ащи те помагинел е манушенге? Соске?