XIDONDZRO 07
Yehovha A Tsrhamisise Kuyini?
Loko u pimisa hi Yehovha Xikwembu Nkulukumba, i yini leswi buyaka miyanakanywini yaku? Xana u mu vona a li kule na wene ku fana ni tinyeleti ni swidzrimela? Kumbe u yanakanya leswaku yene a hi mhunu, kambe i ntamu wa ntumbuluku, ku fana ni xidzedze? Kasi Yehovha a tsrhamisise kuyini hi ntshima? Hi ku tizrisa Zritu dzrake, ku nga Bibele, Yehovha a hi byela byin’wana bya wumhunu byake lebyi kombisaka leswaku awa zron’weka ha wene.
1. Ha yini hi nga swi koti ku vona Xikwembu Nkulukumba?
‘Xikwembu Nkulukumba i moya.’ (Yohan 4:24) Yehovha a nga na mizri wa ku fana ni wa mhunu wa nyama. I mhunu lwa nga vonekiki lwa tsrhamaka tilweni, mbangu lowu hi nga kotikiki ku wu vona.
2. Hi wani man’we ya matsrhamela ya Yehovha?
Nambileswi Yehovha a nga vonekiki, loko hi sungula ku mu tiva hi gama hi mu zrandzra hikusa i mhunu lwa nga kone hakunene, lweyi a nga ni matsrhamela ya ku xonga ngopfu swinene. Bibele dzri li: ‘Hikuva Yehovha a zrandzra ku lulama, a nga sukeli tinsasi takwe.’ (Amapsalma 37:28) Nakone a tale ‘timpswalu ni lilondzro’, ngopfungopfu ka vhanu lava xanisekaka. (Yakob 5:11) ‘A Hosi [Yehovha] yi le kusuhi ni lava va nga ni mbilu leyi yi tsrhovekiki; yone yi huluxa lava va xanisiwaka moyeni.’ (Amapsalma 34:18, BX) Xana a wu swi tiva leswaku Yehovha awa khumbeka hi ndlela leyi hi hanyaka ha yone? Mhunu lwa hlawulaka ku yentxa mintxhumu ya ku biha, a kwatisa Yehovha a tlhela a mu vavisa mbilu. (Amapsalma 78:40, 41) Kambe mhunu lweyi a yentxaka leswinene, a nyonxisa Yehovha.—Dondzra Amaproverbia 27:11.
3. Yehovha a swi kombisa hi ndlela yini leswaku awa hi zrandzra?
Tsrhamela dzra Yehovha ledzri xiyekaka ngopfu i lizrandzru. Hakunene ‘Xikwembu Nkulukumba i lizrandzru’. (1 Yohan 4:8) Hi nga vona lizrandzru dzra Yehovha ku nga li ntsena hi ku dondzra Bibele kambe ni hi kola ka mintxhumu leyi a yi tumbuluxiki. (Dondzra Amintiṛo 14:17.) Hi xikombiso, vona leswaku a hi hambise kuyini. A hi nyike wuswikoti bya ku vona mivala ya ku xonga, ku yingela wunanga bya ku nyonxisa ni ku twa ku nandzrika ka swakuda. A djula hi tikholisa hi wutomi.
KELISISA
Vona leswi Yehovha a swi tizrisaka akuva a hamba mintxhumu ya ku hlamalisa. Tlhela u vona ni ndlela leyi Yehovha a hi kombaka matsrhamela yake ya ku xonga ha yone.
4. Moya wa ku xwenga i ntamu wa Xikwembu Nkulukumba
Swanga hi leswi hi tizrisaka mavoko akuva hi yentxa ntizro wa kukazri, Yehovha a tizrisa moya wake lowa ku xwenga. Bibele dzri li a moya wa ku xwenga a hi mhunu kambe i ntamu lowu Xikwembu Nkulukumba a wu tizrisaka akuva a yentxa mintxhumu. Dondzrani Luka 11:13 ni Amintiṛo 2:17, mi gama mi bulisana hi swivutiso leswi:
-
Hi nga kombela moya wa ku xwenga kutani Xikwembu Nkulukumba a ta hi nyika wone. Xana u pimisa leswaku moya wa ku xwenga i mhunu kumbe i ntamu wa Xikwembu Nkulukumba? Ha yini u hlaya leswo?
Yehovha a tizrisa moya wake lowa ku xwenga akuva a yentxa mintxhumu ya ku hlamalisa. Dondzrani Amapsalma 33:6 ni 2 Petros 1:20, 21, mi gama mi bulisana hi xivutiso lexi:
-
Hi tini tindlela timbeni leti Yehovha a tizrisiki moya wa ku xwenga ha tone?
5. Yehovha a ni matsrhamela ya ku xonga
Moxe a a li mugandzreli wa ku dumbeka wa Xikwembu Nkulukumba. Nambitanu, a a djula ku tiva Muvumbi wake ku yampswa. Xileswo, Moxe a byele Yehovha leswi: ‘Ndzri kombe tindlela taku, ndzri ta ku tiva.’ (Eksoda 33:13) Yehovha a hlamule Moxe hi ku mu byela mintxhumu ya kukazri mayelanu ni matsrhamela yake. Dondzrani Eksoda 34:4-6, mi gama mi bulisana hi swivutiso leswi:
-
I yini leswi Yehovha a byeliki Moxe mayelanu ni matsrhamela yake?
-
Hi dzrini tsrhamela dzra Yehovha ledzri ku nyonxisaka?
6. Yehovha awa zron’weka hi vhanu
Vaheberu a va li vhanu va Xikwembu Nkulukumba lava a va li swikazrawa a Egipta. Xana ku xaniseka kwavu ku mu khumbise kuyini Yehovha? Yingisetani AWUDIYU kumbe mi Dondzra Eksoda 3:1-10, mi gama mi bulisana hi swivutiso leswi landzrelaka.
-
Xana wudzrunguli lebyi byi ku byela yini hi ndlela leyi Yehovha a titwaka ha yone loko vhanu va xaniseka?—Vona tindzrimana 7, 8.
-
U vona leswaku Yehovha awa swi djula hakunene ku pfuna vhanu? Xana a nga swi kota ku yentxa leswo? Ha yini u hlamulisa xileswo?
7. Ntumbuluku wu kombekisa matsrhamela ya Yehovha
Yehovha a tlhamuxela wumhunu byake hi ku tizrisa mintxhumu leyi a yi tumbuluxiki. Vonani VHIDIYU. Ntsrhaku, dondzrani Ba-le-Roma 1:20, mi gama mi bulisana hi xivutiso lexi landzrelaka.
-
Hi wani matsrhamela ya Yehovha lawa u ma vonaka ka mintxhumu leyi a nga yi tumbuluxa?
VAN’WE VA LI: “Xikwembu Nkulukumba a hi mhunu; i ntamu lowu nga kwini na kwini.”
-
U swi vonisa kuyini?
-
Ha yini u titwa hi ndlela yoleyo?
NKATSRAKANYU
Hi nge swi koti ku vona Yehovha hikusa i moya. Kambe a ni matsrhamela lawa ma kokanaka, ngopfungopfu lizrandzru.
Mpfuxeto
-
Ha yini hi nga swi koti ku vona Yehovha?
-
Xana i yini moya lowa ku xwenga?
-
Xana hi wani man’we ya matsrhamela ya Yehovha?
HANDZRISISA
Kulisa matwisisela yaku ha Yehovha hi ku dondzra hi mune wa matsrhamela yake ya ku xonga.
“Xana Xikwembu Nkulukumba A Tsrhamisise Kuyini?” (Xihondzro Xa Ku Zrindzra No 1 2019)
Vona wumboni lebyi kombisaka leswaku Yehovha a nga kumeki ka ntxhumu wini na wini.
“Xana Xikwembu Nkulukumba A Kone Mimbangwini Hinkwayu?” (Leswi kumekaka ka jw.org)
Vona leswaku ha yini Bibele dzri fananisa moya wa ku xwenga ni mavoko ya Xikwembu Nkulukumba.
“Xana I Yini Moya Lowa Ku Xwenga?” (Leswi kumekaka ka jw.org)
Wanuna lwa fiki mahlo a swi mu kazratela ku kholwa ka leswaku Xikwembu Nkulukumba awa zron’weka ha yene. Vona leswi mu yentxiki a txintxa miyanakanyu.
“Swoswi Ni Nga Swi Kota Ku Pfuna Van’wana” (Xihondzro Xa Ku Zrindzra, 1 ka Otubru wa 2015)
