YE TI MANDA 07
Jéhovah ayeke tongana nyen?
Tongana mo gbu li na ndö ti Jéhovah Nzapa, mo pensé so lo yeke tongana nyen? Eskê mo pensé so lo yeke kota mingi nga lo yo na mo mingi, tongana atongoro so ayeke na yâ ti mbeni bungbi ti atongoro so ayo na e mingi? Wala eskê mo imaginé so lo yeke na ngangu mingi me lo yeke na anzoni sarango ye ape, tongana mbeni bekpa ti ngu-nzapa? Jéhovah ayeke biani tongana nyen? Bible afa na e asarango ye ti lo. A tene nga so lo yeke pensé na mo.
1. Ngbanga ti nyen la e lingbi ti bâ Nzapa ape?
“Nzapa ayeke mbeni Yingo.” (Jean 4:24). Terê ti Jéhovah ayeke tongana ti e ape. Lo yeke mbeni Yingo so ayeke na yayu, mbeni ndo so e lingbi ti bâ ni ape.
2. Ambeni sarango ye ti terê ti Jéhovah ayeke so wa?
E lingbi ti bâ Jéhovah ape. Me tongana e hinga lo, e yeke ye lo mingi ndali ti so lo yeke dä biani nga lo yeke na apendere sarango ye. Bible atene: “Jéhovah aye fango ngbanga ti mbilimbili, na lo yeke zia abe-ta-zo ti lo pëpe.” (Psaume 37:28). Lo yeke nga “tâ na ndoye mingi nga lo yeke sara nzoni bê na zo”, mbilimbili na azo so ayeke bâ pasi (Jacques 5:11). “Jéhovah ayeke nduru na azo so mbeni ye amû vundu na ala ngangu; lo sö azo so bê ti ala awoko kue.” (Psaume 34:18). Eskê mo hinga so e lingbi ti zia ngia wala vundu na bê ti lo? Tongana mbeni zo asoro ti sara asioni ye, lo yeke zia vundu na bê ti lo (Psaume 78:40, 41). Me tongana mbeni zo asara ye na lege ni, lo yeke zia ngia na bê ti lo.—Diko aProverbe 27:11.
3. Tongana nyen la Jéhovah afa so lo ye e?
Sarango ye ti Jéhovah so apika bê ti zo mingi ayeke ndoye. Ti tâ tënë ni, “Nzapa ayeke ndoye.” (1 Jean 4:8). E bâ ndoye ti Jéhovah na lege ti atënë ti Bible nga na lege ti aye so lo sara. (Diko Kusala 14:17.) Na tapande, gbu li na ndö ti fason so lo leke na e. Lo leke e na mbeni fason so amû lege na e ti bâ apendere couleur, ti mä apendere mozoko nga ti hinga nzerengo ti kobe. Lo ye si gigi anzere na e.
GI TI HINGA AYE MINGI
Gi ti hinga ye so Jéhovah asara kua na ni ti sara aye so apika bê mingi. Na pekoni, gi ti hinga tongana nyen la Jéhovah afa apendere sarango ye ti lo.
4. Yingo vulu ayeke ngangu ti Nzapa
Jéhovah ayeke sara kua na yingo vulu ti lo ti sara na aye, gï tongana ti so e yeke sara akua na maboko ti e. Bible afa so yingo vulu ayeke zo ape, me a yeke ngangu so Nzapa ayeke sara kua na ni ti sara na aye. Diko Luc 11:13 nga na Kusala 2:17, na pekoni kiri tënë na ahunda so:
-
Nzapa ayeke “tuku” yingo vulu ti lo na ndö ti azo so ahunda ni. Tongaso, mo pensé so yingo vulu ayeke mbeni zo wala ayeke ngangu ti Nzapa? Mo tene tongaso ngbanga ti nyen?
Jéhovah asara kua na yingo vulu ti lo ti sara na aye so apika bê mingi. Diko Psaume 33:6 nga 2 Pierre 1:20, 21, na pekoni kiri tënë na hunda so:
-
Na ambeni lege wa la Jéhovah asara kua na yingo vulu ti lo?
5. Asarango ye ti Jéhovah anzere na zo mingi
Moïse ayeke lani mbeni wakua be-ta-zo ti Nzapa, me lo ye ti hinga nzoni mingi Zo so acréé lo. Tongaso Moïse atene na lo: “Fa na mbi lege ti mo, tongaso si mbi hinga mo.” (Exode 33:13). Ti kiri tënë na Moïse, Jéhovah afa na lo ambeni sarango ye ti lo. Diko Exode 34:4-6, na pekoni kiri tënë na ahunda so:
-
Asarango ye ti Jéhovah wa la lo fa na Moïse?
-
Asarango ye ti Jéhovah wa la anzere na mo mingi?
6. Jéhovah ayeke pensé na azo
Azo ti Nzapa so ayeke aHébreu ayeke lani angbâa na Égypte. Pasi so ala bâ asara lani Jéhovah tongana nyen? Zia AUDIO ni na mä dikongo ni, wala diko Exode 3:1-10. Na pekoni kiri tënë na hunda so:
-
Tongana nyen la mbaï so afa na mo ye so pasi ti azo ayeke sara na ndö ti Jéhovah?—Bâ versê 7 na 8.
-
Mo pensé so Jéhovah aye biani ti mû maboko na azo? Lo lingbi ti sara ni? Mo tene tongaso ngbanga ti nyen?
7. Aye so Nzapa acréé afa na e asarango ye ti lo
Jéhovah afa asarango ye ti lo na lege ti aye so lo créé. Zia VIDÉO ni. Na pekoni diko aRomain 1:20, na kiri tënë na hunda so:
-
Asarango ye ti Jéhovah wa la mo bâ na yâ ti aye so lo sara?
AMBENI ZO ATENE: “Nzapa ayeke zo ape, me lo yeke gï mbeni ngangu so ayeke na ndo kue.”
-
Mo tene ti mo nyen?
-
Mo tene tongaso ngbanga ti nyen?
NA NDURU TËNË
Jéhovah ayeke mbeni Yingo so zo alingbi ti bâ lo ape, lo yeke na gbâ ti apendere sarango ye so anzere na zo mingi, mbilimbili ndoye.
Dango bê
-
Ngbanga ti nyen la e lingbi ti bâ Jéhovah ape?
-
Yingo vulu ayeke nyen?
-
Ambeni sarango ye ti Jéhovah ayeke so wa?
GI NDA TI YE
Gi ti hinga ye mingi na ndö ti Jéhovah na lege so mo manda ye na ndö ti akota sarango ye ti lo osio.
“Asarango ye ti terê ti Nzapa ayeke so wa?” (Tour ti Ba Ndo N° 1 2019)
Bâ aye so afa so Jéhovah ayeke na ndo kue ape.
“Nzapa ayeke lakue gï dä na ndo kue?” (Article na ndö ti site)
Bâ ngbanga ti nyen la Bible ahaka yingo vulu na maboko ti Nzapa.
A yeke lani ngangu na mbeni koli so abâ ndo ape ti yeda so Nzapa aye lo. Gi ti hinga ye so asara si lo changé pensé ti lo.
“Fadeso mbi hinga so mbi lingbi ti aidé ambeni zo” (Tour ti Ba Ndo ti lango 1 ti octobre 2015)
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
