WOTO 07
Un pei sëmbë Jehovah dë?
Te i pakisei Jehovah Gadu, nöö andi ta ko a i pakisei? I si kuma a dë longi fuu kumafa dee teeja dë longi fuu ö? Naa i ta si ën kuma wan Sëmbë di abi makiti, ma di an abi fii da u? Un pei sëmbë Jehovah dë tuutuu? A di Wöutu fëën di Bëibel, Jehovah ta piki u andi da so u dee fasi fëën, söseei a ta piki u unfa a ta booko hën hedi ku u tjika.
1. Faandi mbei wa sa si Gadu?
„Gadu da wan Jeje”. (Johanisi 4:24) Jehovah an abi wan libisëmbë sinkii. A dë wan jeje di ta libi a liba ala, wan kamian di wa sa si.
2. Andi da so u dee fasi u Jehovah?
Hii fa wa sa si Jehovah, ma a dë wan tuutuu Sëmbë di abi bunu fasi, nöö dee sëmbë dee sabi ën lobi ën. Di Bëibel ta taki taa: „Jehovah da wan Sëmbë di lobi letilibi, nöö an o go disa dee sëmbë dee ta hoi deseei nëën” (Psalöm 37:28). A „lobi sëmbë tuutuu, nöö a abi tjalihati u de”, möönmöön dee sëmbë dee ta tja sitaafu ku fuka (Jakobosi 5:11). „Jehovah dë zuntu u dee sëmbë dee lasi hati. A ta heepi dee sëmbë dee ta fii bookosaka” (Psalöm 34:18). I sabi taa dee soni dee u ta du sa mbei Jehovah ta wai nasö ta tjali ö? Ee wan sëmbë buta taa a o du wan soni di an bunu, nöö a ta mbei Jehovah tjali (Psalöm 78:40, 41). Ma wan sëmbë di ta du bunu soni ta mbei Jehovah ta piizii.—Lesi Nöngö 27:11.
3. Unfa Jehovah ta lei taa a lobi u?
Wan u dee fasi u Jehovah di u ta möön si a dee soni dee a ta du, da lobi. Di Bëibel ta taki taa: „Gadu da lobi” (1 Johanisi 4:8). Jehovah an ta piki u a di Bëibel nöö taa a lobi u, ma a ta lei taa a lobi u tu, te u luku dee soni dee a mbei. (Lesi Tjabukama 14:17.) Pakisei di fasi fa a mbei u. A mbei u a sö wan fasi taa u ta si hansehanse kulölu, u sa haika suti poku, söseei u sa tesi sömëni sutisuti njanjan. A kë fuu ta piizii u di libi.
WOTO SONI DI I SA LEI
Boo luku andi Jehovah ta tei u du sömëni gaangaan soni. Boo luku tu unfa Jehovah ta mbei u ko sabi dee fasi fëën, söseei unfa a ta lei u dee fasi dë.
4. Di santa jeje da di kaakiti u Gadu
Leti kumafa u ta du soni ku u maun, sö nöö Jehovah ta tei di santa jeje fëën u du soni. Di Bëibel ta lei u taa di santa jeje an dë wan sëmbë, ma a dë di kaakiti di Gadu ta tei u du soni. Lesi Lukasi 11:13 ku Tjabukama 2:17, nöö piki dee hakisi aki:
-
Gadu ta da dee sëmbë dee ta hakisi ën di santa jeje fëën. Wë i si kuma di santa jeje da wan sëmbë u, naa a dë di kaakiti u Gadu? Faandi mbei i taki sö?
Jehovah ta wooko ku di santa jeje fëën u du gaangaan soni. Lesi Psalöm 33:6 ku 2 Petuisi 1:20, 21, nöö piki di hakisi aki:
-
Andi da wantu fasi fa Jehovah wooko ku di santa jeje fëën?
5. Jehovah abi bunu fasi
Mosesi bi dë wan dinima u Gadu di bi ta hoi hënseei nëën, nöö a bi kë lei sabi di Sëmbë di mbei ën möön bunu. Fëën mbei Mosesi bi piki Gadu taa: „Lei mi dee pasi fii, u mi sa ko sabi i möön bunu” (Ëkisodesi 33:13). Di Mosesi bi hakisi Jehovah di soni aki, hën Jehovah bi mbei a ko sabi un pei sëmbë a dë. Lesi Ëkisodesi 34:4-6, nöö piki dee hakisi aki:
-
Un fasi u Jehovah di kai a di tëkisi aki a bi mbei Mosesi ko sabi?
-
Undi u dee fasi u Jehovah i möön lobi?
6. Jehovah ta booko hën hedi ku sëmbë
Dee sëmbë u Gadu, dee bi dë Hebelejën sëmbë, bi dë saafu a Egepiti. Unfa Jehovah bi ta fii di de bi ta tja sitaafu? Pëë di AUDIO nasö lesi Ëkisodesi 3:1-10, nöö piki dee hakisi aki.
-
Andi di woto aki ta lei i u di fasi fa Jehovah ta fii te sëmbë ta tja sitaafu?—Luku vers 7 ku 8.
-
I si kuma Jehovah kë heepi sëmbë tuutuu ö? I si kuma a abi di kaakiti u du ën u? Faandi mbei i taki sö?
7. Dee soni dee Jehovah mbei buta a goonliba aki, ta lei u dee fasi dee a abi
Jehovah ta lei u dee fasi dee a abi te u luku dee soni dee a mbei. Pëë di FËLÖN. Baka di dë, lesi Loomë 1:20, nöö piki di hakisi aki.
-
Andi da dee fasi u Jehovah dee i ta si a dee soni dee a mbei?
SO SËMBË TA TAKI TAA: „Wa sa si Gadu, nöö wa sa ko sabi ën tu.”
-
Andi ii bi o taki?
-
Faandi mbei i taki sö?
ANDI I LEI?
Jehovah da wan jeje di wa sa si, nöö a abi sömëni bunu fasi, möönmöön di fasi de kai lobi.
Andi i bi o piki?
-
Faandi mbei wa sa si Jehovah?
-
Andi da di santa jeje?
-
Andi da so u dee fasi u Jehovah?
WOTO SONI DI I SA LUKU
Lesi di woto aki fii ko sabi fö u dee möön fanöudu fasi u Jehovah.
Luku unfa di woto aki ta lei u taa Jehovah an dë a hii soni.
Lesi di woto aki fii ko si faandi mbei di Bëibel ta taki taa di santa jeje dë kuma Jehovah maun.
Lesi di woto aki fii si faandi mbei a bi taanga da wan womi di wojo fëën booko, u biibi taa Gadu ta booko hën hedi ku ën. Nöö luku andi bi mbei a bi tooka pakisei.
„Now mi e firi taki mi kan yepi tra sma” (A Waktitoren, 1 u tinimu-liba 2015)