LES 07
Fa Yehovah de?
Fa yu denki Yehovah de? Yu feni taki en na wan prenspari sma, ma yu nanga en no man tron mati? Yu feni taki a de farawe fu yu neleki fa den stari de farawe? Noso yu e si en leki wan sma di abi furu makti, ma di no abi firi? Ma fa Yehovah de trutru? Bijbel e fruteri wi sortu fasi Yehovah abi. A e sori tu taki Gado e broko en ede nanga yu.
1. Fu san ede wi no man si Gado?
„Gado na wan Yeye” (Yohanes 4:24). Yehovah no abi wan skin leki di fu libisma. En na wan yeye. A e tan na ini hemel, wan presi di wi no man si.
2. Sortu fasi Yehovah abi?
Wi no man si Yehovah. Ma te yu o kon sabi en, yu o lobi en fu di en na wan sma di abi moi fasi. Bijbel e taki: „Yehovah na wan sma di lobi retidu. Dati meki a no o gowe libi den sma di e tai hori na en” (Psalm 37:28). Bijbel e sori tu taki Yehovah „lobi sma trutru èn taki a abi sari-ati” (Yakobus 5:11). Dati meki a e firi gi sma di e pina. „Yehovah de krosibei fu den sma di lasi-ati. A e frulusu den wan di brokosaka” (Psalm 34:18). Yu ben sabi taki den sani di wi e du kan meki Yehovah firi prisiri noso sari? Te wan sma e du sani di no bun, dan Yehovah e sari (Psalm 78:40, 41). Ma te wan sma e du bun sani, dan Yehovah e prisiri.—Leisi Odo 27:11.
3. Fa Yehovah e sori taki a lobi wi?
A moro prenspari fasi fu Yehovah na lobi. Bijbel e taki srefi: „Gado na lobi” (1 Yohanes 4:8). Te yu o leisi Bijbel, dan yu o si fa Yehovah sori lobi gi wi. Ma den sani di Yehovah meki e sori tu taki a lobi wi. (Leisi Tori fu den apostel 14:17.) Prakseri fa a meki wi. A meki wi na so wan fasi taki wi man si moi kloru, wi man arki moi poku èn wi man nyan switi nyanyan. A wani taki wi prisiri ini a libi.
SORTU TRA SANI YU KAN LERI?
Wi o luku san Yehovah e gebroiki fu du bigi sani. Wi o si tu sortu moi fasi Yehovah abi.
4. A santa yeye na a krakti fu Gado
Neleki fa wi e gebroiki wi anu fu wroko, na so Yehovah e gebroiki en santa yeye fu du sani. Bijbel e sori wi taki santa yeye a no wan sma, ma na a krakti fu Gado. Leisi Tori fu den apostel 6:3 èn taki fu den aksi disi:
-
Efu sma kan „abi santa yeye”, dan yu denki taki a santa yeye na wan sma? Fu san ede yu piki so?
Yehovah e gebroiki en santa yeye fu du bigi sani. Leisi Psalm 104:30 nanga 2 Petrus 1:20, 21 èn taki fu na aksi disi:
-
Sortu sani Yehovah du nanga en santa yeye?
5. Yehovah abi moi fasi
Moses ben de wan anbegiman fu Gado kaba, ma toku a ben wani kon sabi en moro bun. Dati meki Moses taigi Gado: „Sori mi den pasi fu yu, fu mi kan sabi yu” (Eksodes 33:13). Di Moses aksi Yehovah a sani disi, dan Yehovah taigi en sortu fasi a abi. Leisi Eksodes 34:4-6 èn taki fu den aksi disi:
-
Sortu fasi fu Yehovah kari na ini a tekst?
-
Sortuwan fu den fasi fu Yehovah yu lobi moro?
6. Yehovah e broko en ede nanga sma
Fosi den Hebrewsma ben de a pipel fu Gado. Wan pisi ten den ben de srafu na ini Egepte. Fa Yehovah ben firi di a ben si fa den ben e pina? Prei na AUDIO noso leisi Eksodes 3:1-10. Baka dati taki fu den aksi disi:
-
Fa a tori disi e sori fa Yehovah e firi te libisma e pina?—Luku vers 7 nanga 8.
-
Yu denki taki Yehovah wani yepi libisma èn taki a man du dati? Fu san ede yu piki so?
7. Den sani di Yehovah meki e sori wi sortu fasi a abi
Te wi e luku den sani di Yehovah meki, dan wi e kon sabi sortu fasi a abi. Prei a FELEM. Baka dati leisi Romesma 1:20 èn taki fu na aksi disi:
-
Sortu fasi fu Yehovah yu e si te yu luku den sani di a meki?
SON SMA E TAKI: „Noiti wi o man kon sabi Gado.”
-
San yu e denki?
-
Fu san ede yu e denki so?
SAN YU LERI?
Wi no man si Yehovah, ma wi sabi taki a abi furu moi fasi. A moro prenspari fasi fu en na lobi.
Fa yu ben o piki den aksi disi?
-
Fu san ede wi no man si Yehovah?
-
San na a santa yeye?
-
San na wan tu fasi fu Yehovah?
TRA SANI DI YU KAN LUKU
Na artikel disi o leri yu moro fu den fo prenspari fasi fu Yehovah.
Na artikel disi e sori taki Yehovah no de na ini ala sani.
Na ini na artikel disi yu o si fu san ede Bijbel e kari a santa yeye Gado anu.
Na artikel disi e taki fu wan breniman di no ben bribi taki Gado ben lobi en. Yu o si fu san ede a bigin denki tra fasi.
„Now mi e firi taki mi kan yepi tra sma” (A Waktitoren, 1 oktober 2015)
