LISOMO LYA 07
Yehova Ni wa Siani?
Weewe uli watontonkania nangue Yehova Leeza ni wa siani? Eba, umumwene kuya wali muntu wa kupapia saana inzi kuya wali kule saana ni weewe nga evelia ntanda viili kule saana? Ao umumwene kuya wali wa maka saana, inzi bila wamanikile viali, walisie nga mulula? Mu kisinka, Yehova ni wa siani? Kupitila Bibilia Mulandu wakue, Yehova ali watubuila mibeele yakue, kabili ali walangilila nangue akupoozeleko maano.
1. Juu ya ki tetuviinda kumumona Leeza?
“Leeza ni mupasi.” (Yoane 4:24, NWT) Yehova tali na mubili nga onu weetu. Weene ni Mupasi ao Muntu asiizi kumoneka ekeele ku muulu, fuasi itusiviinda kumona.
2. Yehova ali ni mibeele ki paleepale?
Anzia kine Yehova teezi kumoneka, ni Muntu aliko kisinka kabili wali ni mibeele ili yalengia abatone baalia bamumanine. Bibilia ili yalanda eevi: “Yehova atonene nsaambu, takaba kubasia bantu bakue ba kisinka.” (Malumbo 37:28) Kabili “alambaleele saana mu ntono kabili ali ni luse,” aasa ku baalia bali mu kwema. (Yakobo 5:11, NWT) “Yehova ali peepi ni baalia batiokele mutima; ali wapususia baalia basaansilue.” (Malumbo 34:18, bulondolozi bwa pensina) Ati, umanine nangue kupitila bintu biuli wakita kunti wamulengia Yehova asaansamuke ao afiitue? Olia muntu ali wasaakula kukita bintu bibiipile, ali wamukisia Leeza ku mutima ni kumulengia afipue. (Malumbo 78:40, 41) Inzi, olia muntu ali wakita bintu biweeme, ali walengia Leeza asaansamuke.—Some Tuswalo ni Mafunde 27:11.
3. Yehova alangiliile siani nangue atutonene?
Ntono i mibeele ikata saana yakue Yehova. Kukila pakaako, Bibilia ili yalanda nangue Leeza talisie na ntono inzi, ‘Leeza muine ni ntono.’ (1 Yoane 4:8) Yehova ali walangilila ntono yakue apanasie mu Bibilia, inzi kabili ali wailangilila kupitila bintu byaakitile. (Some Miilo ya Batumua 14:17.) Kwa mufuano, monankesie vyaatubumbile. Watupeele buviinde bwa kumona rangi yaweeme, kutuilizia miziki yaweeme ni kutompa kya kulia kyaweeme. Waakitile evio, paantu atonene tusekelele buikazi.
TUKEBE SAANA
Tumone keelia kyaabombiizie Yehova eevi kukita bintu bya kupapia. Kisia, tumone Yehova vyali walangilila mibeele yakue iweeme.
4. Mupasi utakatiifu i maka akue Leeza ali abomba
Yehova ali wabombia mupasi wakue utakatiifu nga evelia vituli twabombia minue yeetu eevi kubomba miilo. Bibilia ili yalanda nangue mupasi utakatiifu te muntu, inzi ni maka aabombiizie Leeza pa kubumba bintu. Some Luka 11:13, (NWT) ni Miilo ya Batumua 2:17, (NWT), kisia londoluele beebi biipuzio:
-
Leeza wakaba “kumiina” mupasi wakue pa baalia bonse bali bamuloomba. Kansi, watontonkania nangue mupasi utakatiifu ni muntu ao ni maka ali abomba akue Leeza? Juu ya ki walanda evio?
Yehova waabombiizie mupasi wakue utakatiifu eevi akite bintu bya kupapia. Some Malumbo 33:6 ni 2 Petro 1:20, 21, (NWT), kisia londoluele keeki kiipuzio:
-
Yehova waabombiizie mupasi wakue utakatiifu eevi kukita ki?
5. Yehova ali ni mibeele yaweeme saana
Musa waakitile miaka ingi wali mukumubombela Leeza, inzi waatonene amumane buino Kabumba wakue. Pakaako Musa waamulandile eevi Leeza: “Mbuile nzila yobe, eevi nkumane.” (Kufuma 33:13) Mu kyasuko, Yehova waamubuilile Musa mibeele paleepale ilangiliile bumuntu bwakue. Some Kufuma 34:4-6, kisia londoluele beebi biipuzio:
-
Yehova waamubuilile Musa nangue ali ni mibeele ki?
-
Pakati ka mibeele ili na Leeza ni mibeele ki iwatonesia?
6. Yehova ali waemena bantu
Baebrania, bantu bakue Leeza ba mu nsita ya kale, babanga bazia mu kyalo kya Misri. Yehova waaiunvuile siani musita bantu bakue lubaali mu boobo buavia? Lizie ODIO ni kutuilizia mwe bonse, ao some Kufuma 3:1-10. Kisia londoluele beebi biipuzio.
-
Kumana nangue Yehova ali waunvua ovio musita bantu lubali baaluka mu maavia, kwa kusambilizia ki?—Mona mulongo wa 7 ni wa 8.
-
Eba, watontonkania nangue Yehova atonene kakiine kubakwasia bantu, kabili ali ni buviinde bwa kukita evio? Juu ya ki walanda evio?
7. Bintu byaakitile Yehova bili byatusambilizia mibeele yakue
Yehova ali walangilila mibeele yakue kupitila bintu byaabumbile. Mone VIIDEO. Kisia some Baroma 1:20, ni kulondoluela keeki kiipuzio.
-
Ni mibeele ki yakue Yehova iuli wamona mu bintu byaakitile?
BANGE BALI BALANDA: “Leeza te muntu, ni maka sie ali asaangua fuasi yonse.”
-
Watontonkania siani?
-
Ni kiki kili kya kulengia ulande evio?
MU KIFUPI
Yehova ni Muntu utusiviinda kumona. Ali ni mibeele ingi yaweeme, aasa mibeele ya ntono.
Kunti waasuka siani?
-
Juu ya ki tetuviinda kumumona Yehova?
-
Mupasi utakatiifu ni kiki?
-
Zimbula mibeele paleepale yakue Yehova.
MANAKO NI BINGE
Sambilila bingi palua mibeele ina ikata saana yakue Yehova.
“Leeza Ni wa Siani?” (Lupungu Lwakue Kamwenenena, Nim. 1, 2019)
Mona bintu bisininkiziizie nangue Yehova tali mu bintu byonse.
“Eba, Leeza Alisie Fuasi Yonse?” (Lyasi lili mu Kitente kya Enternete)
Mona juu ya ki Bibilia ili yapalania mupasi utakatiifu na minue yakue Leeza.
“Mupasi Utakatiifu Ni Kiki?” (Lyasi lili mu Kitente kya Enternete)
Mwalalume umo mpofu, waali wamwene kyakolele kuzumina nangue Leeza waali wamwemena. Mona kyaamukwasiizie aalulule maano akue.
