AISISIAET NA 07

Erai Yawe Loepone Ani?

KOBOLIAK

Iwomit ijo erai Yawe Edeke loikoni ai? Erai kereka ngesi loeumokina noi konye kolwana kaneijai ijo, kwape elwakatar aacer? Arai bo iwomit ijo ebe erai ngesi loejaatar kapedor naepol kwape nat naka ekipiei konye komameotor kiponesio luejaatar itunga? Erai Yawe loepone ani? Itejenunit Ebaibuli ice koponesio luka Yawe ido isisianakini bobo ebe epodokinit Yawe ijo.

1. Kanuinyo mam oni ipedoria aanyun Edeke?

“Erai Edeke Emoyo.” (Yokana 4:24) Mam Yawe ejaatar keda akuan kwape kanawok. Erai ngesi emoyo ido iboiei kotoma akuj, aiboisit namam oni ipedori aanyun.

2. Anu bo ice kotoma oponesio luka Yawe?

Karaida mam Yawe etakani, ejai ngesi, ido ejaatar kiponesio luepedorete ainakin itunga aminun nges. Ebala Ebaibuli ebe: “Emin EJAKAIT etube, ido mam ejalakini lukalaunakake.” (Isabulin 37:28) Erai bobo ngesi “lokasianut naepol ka aitim,” kanoinoi neejaasi itunga luetereikina kaiticanitoi. (Yakob 5:11) Eyapiei Yawe kaneejaasi luebilil itauon “itangaleuni ngesi . . . [kes], eeni da amusungunukec.” (Isabulin 147:3) Ijeni kereka jo ebe epedorete aswamisiowok aisiyalamikin arai bo aitakadikin Yawe? Itunganan yeneseuni aswam iboro luarokok itakadikini nges. (Isabulin 78:40, 41) Konye itunganan yeniswamai nuedolito isiyalamikini nges.—Kosiom Awaragasia 27:11.

3. Epone bo ani itodunitor Yawe ebe emina ngesi oni?

Epone loka Yawe loepol kakere nges amin. Kabeit, “erai Edeke amin.” (1 Yokana 4:8) Itejenunit Yawe akemin mere kotoma Obaibuli bon konye bobo kotoma oboro luesubit ngesi. (Kosiom Aswamisio 14:17.) Kwape aanyunet, koomoom ber ijo epone loesubitor ngesi oni. Einakinit ngesi oni apedor naka asesen iriagin, aipup emiusik, keda alelakin ajijim naka inyamat. Ekoto ngesi oni alelakin aijar.

KISISIAU NUIPU

Isisiau ibore yenitwasamai Yawe aitodolikinia nueumokina. Kosodi aanyun epone loitejenunitor ka loitodunitor Yawe ikeponesio.

4. Emoyo lokalaunan—erai agogong naka Edeke

Kwape iswamaa oni keda akaniniwok, itwasamai Yawe da ekemoyo lokalaunan. Itejenunit Ebaibuli ebe mam emoyo lokalaunan erai Edeke konye erai agogong naiswamaa ngesi iboro. Kosiom Luka 11:13 keda Aswamisio 2:17, kosodete aimor aingiseta nuta:

‘Ebukokini’ Edeke ekemoyo neejaas ngul luilipitos. Aso, iwomit kereka ijo ebe erai emoyo lokalaunan Edeke arai bo agogong naka Edeke? Kanuinyo ibalar ijo kwangin?

Itwasamai Yawe ekemoyo lokalaunan aitodolikinia iboro lueumokina. Kosiom Isabulin 33:6 keda 2 Petero 1:20, 21, kosedete aimor aingiset nata:

Anu bo iwaitin luitwasamator Yawe ekemoyo lokalaunan?

5. Ejaatar Yawe keda iponesio luejokuka noi

Arai Musa ejaanakinan lomunot loka Edeke konye akoto ngesi ajenun Lokasuban ejok. Aso, abu Musa kolimok Edeke ebe: “Kitodikinai ikonirotin, tetere kajenuni jo.” (Anyoun 33:13) Kosodi Yawe aitejenikin Musa ice koponesioke. Kosiom Anyoun 34:4-6, kosodete aimor aingiseta nuta:

Anu bo iponesio luka Yawe luabu ngesi itejenik Musa?
Anu bo iponesio luka Yawe lueminakinitos jo?

6. Epodokinit Yawe itunga

Araasi itunga luka Edeke, Iburanian, ibulesin koMisiri. Epone bo ani apupio Yawe kanuikamunitos aiticanitoikec? Oboliak ASIOMAN NAIKAMITAI kosodi atupakinit esiomio, arai bo kosiom Anyoun 3:1-10. Kosodete aimor aingiseta nuetupakinete.

ASIOMAN NAIKAMITAI: Apodokinit Yawe Aiticanitoikec (2:45)

Anyoika bo nuisisiau ijo kotoma akiro kanu, nuikamunitos epone loepupia Yawe kanuka aiticanitoi naka itunga?—Koany ikokoron 7 keda 8.
Iwomit kereka jo ebe ekoto Yawe cut aingarakin itunga, ido ebe epedori ngesi aswam ngun? Kanuinyo, arai kanuinyo mam?