WEKELO 07
Woho akɔna w’onto wele Jehowa?
Etena kakanyiyayɛ dikambo dia Jehowa Nzambi, kakɔna kakoyɛ lo yimba? Onde nde ekɔ onto la diambo, koko langanyi la yɛ etale, oko tɔɔtɔ ta lo galaksi? Ko kana wɛ mbɔɔsaka oko onto lele la wolo efula, koko bu la waonga w’amɛna, oko dikungola dia mvula? Woho akɔna w’onto wele Jehowa mɛtɛ? Lo tshimbo y’Ɔtɛkɛta ande Bible, Jehowa tosholɛka waonga ande amɔtshi, ɛnyɛlɔ woho wayakiyanyande dikambo diayɛ.
1. Lande na kahatakoke mɛna Nzambi?
“Nzambi ekɔ nyuma.” (Joani 4:24) Jehowa bu la demba dia l’emunyi. Nde ekɔ Nyuma ndo nde mbidjasɛka l’olongo, dihole diahatakoke mɛna.
2. Naa waonga amɔtshi waki Jehowa?
Sho hatokoke mɛna Jehowa, koko etena kaweyaso, sho mbolangaka dikambo nde ekɔ onto la mɛtɛ lele la waonga wa diambo. Bible mbutaka ɔnɛ: “Jehowa nangaka losembwe ndo nde hatokalɛ ekambi ande wa kɔlamelo.” (Osambo 37:28) Nde ekɔ nto “la ngandji k’efula ndo la kɛtshi,” djekoleko otsha le anto wasowa. (Jakɔba 5:11) “Jehowa ekɔ suke la wanɛ wele la etema wambatɛ; nde shimbɛka wanɛ wambɔkɔmɔ.” (Osambo 34:18, nɔtɛ) Onde wɛ akeyaka dia sho koka ngɛnyangɛnya Jehowa kana mbonyangiya? Onto lasɔna dia nsala akambo wa kɔlɔ, mbonyangiyaka ndo mboshaka paa lo asolo. (Osambo 78:40, 41) Koko, onto lasɔna dia nsala kɛnɛ kele ɔlɔlɔ mbɔngɛnyangɛnyaka.—Adia Tokedi 27:11.
3. Ngande wɛnya Jehowa dia nde tolangaka?
Dionga dia Jehowa dioleki woke ko ngandji. Lo mɛtɛ, “Nzambi ekɔ ngandji.” (1 Joani 4:8) Jehowa mɛnyaka ngandji kande aha tsho oma lo tshimbo ya Bible, koko ndo oma lo tshimbo ya diangɔ diakandatonge. (Adia Etsha 14:17.) Ɛnyɛlɔ, tɔsɛdingole woho wakandatotonge. Nde akatosha dikoka dia mɛna alangi w’amɛna, dia mboka mishiki wa dimɛna ndo dia ndɛta mbo ya ndɛ y’amɛna. Nde nangaka dia sho ngɛnangɛna la lɔsɛnɔ.
NYOMOTSHIMOLA
Eka dia mbeya kɛnɛ kakamba la Jehowa dia nsala akambo wa diambo. Oma laasɔ, yanga dia mɛna woho watɔkɛnɛmɔlɛ Jehowa waonga ande wa diambo.
4. Nyuma k’ekila kekɔ wolo waki Nzambi wakamba olimu
Oko wakambaso l’anya aso dia nsala olimu, mbakamba Jehowa la nyuma kande k’ekila. Bible mɛnyaka dia nyuma k’ekila bu onto, koko wolo wakamba la Nzambi dia nsala akambo. Nyadia Luka 11:13 ndo Etsha 2:17, ndo oma laasɔ, nyɔkɛtshanya ambola anɛ:
-
Nzambi “ayotshola” nyuma kande k’ekila le wanɛ wɔlɔmbatɔ. Laasɔ, onde wɛ fɔnyaka dia nyuma k’ekila kekɔ onto, ko kana wolo waki Nzambi wakamba olimu? Lande na katayɛ ngasɔ?
Jehowa kambaka la nyuma kande k’ekila dia nsala akambo wa diambo. Nyadia Osambo 33:6 ndo 2 Petero 1:20, 21, ndo oma laasɔ, nyɔkɛtshanya dimbola nɛ:
-
Naa toho tɔmɔtshi takamba Jehowa la nyuma kande k’ekila?
5. Jehowa ekɔ la waonga w’amɛna efula
Mɔsɛ aki okambi ɔmɔtshi wa Nzambi wa kɔlamelo, ndo akalangaka mbeya Otungi ande dimɛna dimɛna. Ɔnkɔnɛ, Mɔsɛ akawotɛ ate: “Ombetsha mboka yayɛ dia dimi keya.” (Etombelo 33:13) Ko Jehowa akatɛ Mɔsɛ woho w’onto wende. Nyadia Etombelo 34:4-6, ndo oma laasɔ, nyɔkɛtshanya ambola anɛ:
-
Jehowa akasholɛ Mɔsɛ waonga ande akɔna?
-
Lo waonga waki Jehowa asɔ, dionga diakɔna dialeka kɔngɛnyangɛnya?
6. Jehowa ndjakiyanyaka dikambo di’anto
Ekambi waki Nzambi, mbuta ate ase Hɛbɛru, waki ɛhɔmbɔ lo Edjibito. Ngande wakayaokaka Jehowa etena kakasowaka ekambi ande? Nyohokame AWUI WAKADJAMA LO ESHINGA ndo nyotayelaka kana nyadia Etombelo 3:1-10. Oma laasɔ, nyɔkɛtshanya ambola wayela anɛ:
-
Ɔkɔndɔ ɔnɛ akotɛwɔ lo kɛnɛ kendana la woho wayaoka Jehowa etena kasowa anto?—Enda divɛsa 7 ndo 8.
-
Onde wɛ fɔnyaka dia Jehowa nangaka mɛtɛ nkimanyiya anto ndo ɔnɛ nde ekɔ l’akoka wa nsala dui sɔ? Lande na?
7. Diangɔ diakatongama kɛnɛmɔlaka waonga waki Jehowa
Jehowa kɛnɛmɔlaka waonga ande oma lo diangɔ diakandatonge. Nyende VIDƐO. Oma laasɔ, nyadia Rɔmɔ 1:20, ndo nyɔkɛtshanya dimbola diayela nɛ:
-
Waonga akɔna waki Jehowa wɛnayɛ lo diangɔ diakandatonge?
ANTO AMƆTSHI MBUTAKA ƆNƐ: “Nzambi keema onto, nde ekɔ tsho wolo ɔmɔtshi wele dihole tshɛ.”
-
Naa kanyi yayɛ?
-
Lande na keyɛ la kanyi shɔ?
LO TSHENA PE
Jehowa ekɔ onto lahatakoke mɛna ndo nde ekɔ la waonga efula w’amɛna, djekoleko ngandji.
Ovuswelo
-
Lande na kahatakoke mɛna Jehowa?
-
Nyuma k’ekila kɛdikɛdi na?
-
Naa waonga amɔtshi waki Jehowa?
SALA EYANGELO
Yanga dia mbeya awui akina wendana la waonga anɛi waki Jehowa woleki weke.
Tɔsɛdingole djembetelo yɛnya dia Jehowa bu ahole tshɛ.
“Onde Nzambi ekɔ dihole tshɛ, ndo wonya tshɛ?” (Sawo dia l’Ɛtɛrnɛtɛ)
Tende lande na kɛdika Bible nyuma k’ekila l’anya waki Nzambi.
Pami kɛmɔtshi ka tshungu aki l’okakatanu dia mbetawɔ dia Nzambi ndjakiyanyaka dikambo diande. Toshole kɛnɛ kakookimanyiya dia ntshikitanya kanyi yande.
“Kakianɛ loyaoka dia dimi koka nkimanyiya anto akina” (Tshoto y’Etangelo, Ngɔndɔ ka dikumi 1, 2015)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
