SAMBIRU 07
Kumbi Yehova ndi Munthu Wamtundu Wuli?
Kumbi yimwi muwona kuti Yehova Chiuta ndi munthu wamtundu wuli? Kumbi mutimuwona kuti ngwakuziziswa ukongwa ndipu we kutali nge mo ziliri nyenyezi? Kumbi mutimuwona kuti ndi nthazi waka nge po liliri limphezi? Kumbi Yehova ndi munthu wamtundu wuli ukongwa? Kuziya mu Bayibolu, Yehova watitikambiya mijalidu yaki ndipuso walongo kuti watitiŵanaŵaniya.
1. Ntchifukwa wuli titimuwona cha Chiuta?
“Chiuta ndi Mzimu.” (Yohane 4:24) Yehova we ndi liŵavu nge la munthu cha. Iyu ndi mzimu wo uja kuchanya ko isi tingawonaku cha.
2. Kumbi ndi mijalidu yinyaki niyi yo Yehova wenayu?
Chinanga kuti tingamuwona cha Yehova, kweni titimuyanja chifukwa we ndi mijalidu yamampha ukongwa. Bayibolu likamba kuti: “Yehova watanja cheruzgu chaurunji, ndipu wazakuŵajowo cha ŵanthu ŵaki akugomezgeka.” (Salimo 37:28) Ndipuso iyu “ngwachanju chikulu ukongwa kweniso ngwalisungu,” ukongwa ku ŵanthu wo asuzgika. (Yakobe 5:11) “Yehova we pafupi ndi wo asweka mtima; iyu wataska wo agongoweseka.” (Salimo 34:18, mazu ngamumphata) Kweniso, kumbi muziŵa kuti tingakondwesa pamwenga kukwiyisa Yehova? Munthu yo wasankhiya dala kuchita vinthu viheni wakwiyisa Yehova. (Salimo 78:40, 41) Kweni munthu yo wachita vinthu vamampha ndiyu watimukondwesa.—Ŵerengani Nthanthi 27:11.
3. Kumbi Yehova walongo wuli kuti watitiyanja?
Chanju ndilu jalidu likulu laku Yehova. Ndichu chifukwa chaki Bayibolu likamba kuti, “Chiuta ntchanju.” (1 Yohane 4:8) Bayibolu kweniso vinthu vo Yehova wakulenga vilongo kuti watitiyanja ukongwa. (Ŵerengani Machitidu 14:17.) Mwakuyeruzgiyapu, ŵanaŵaniyani mo wakutipangiya taŵanthu. Iyu wakutipanga kuti tikondwengi ndi mitundu yakutowa ya vinthu, tivwengi tisumu takunozga kweniso tivwengi kunowa kwa chakurya. Iyu wakhumba kuti tikondwengi ndi umoyu.
SAMBIRANI VINANDI
Wonani mo Yehova wachitiya vinthu vakuziziswa. Kweniso wonani mo walongore mijalidu yaki yamampha.
4. Mzimu wakupaturika ndi nthazi yaku Chiuta
Nge mo taŵanthu tigwiriskiya ntchitu manja pakugwira ntchitu, Yehova nayu wagwiriskiya ntchitu mzimu waki wakupaturika. Bayibolu lilongo kuti mzimu wakupaturika ndi munthu cha, kweni ndi nthazi yo Chiuta wagwiriskiya ntchitu kuti vinthu vichitiki. Ŵerengani Luka 11:13 ndipuso Machitidu 2:17, pavuli paki kambiskanani mafumbu yanga:
-
Chiuta ‘wangapunguliya’ mzimu waki wakupaturika pa ŵanthu wo amupempha. So muwona kuti mzimu wakupaturika ndi munthu pamwenga ndi nthazi yo Chiuta wagwiriskiya ntchitu? Ntchifukwa wuli muwona viyo?
Yehova wagwiriskiya ntchitu mzimu waki kuti wachiti vinthu vakuziziswa. Ŵerengani Salimo 33:6 ndipuso 2 Peturo 1:20, 21, pavuli paki kambiskanani fumbu ili:
-
Kumbi ndi nthowa zinyaki nizi zo Yehova wagwiriskiyapu ntchitu mzimu waki wakupaturika?
5. Yehova we ndi mijalidu yakukondwesa ukongwa
Mozesi wasopanga Chiuta mwakugomezgeka kweni wakhumbisiskanga kuti wamuziŵi umampha Mlengi waki. Mwaviyo, Mozesi wangukambiya Chiuta kuti: “Ndiziŵiseni nthowa zinu, kuti ndikuziŵeni.” (Ekisodo 33:13) Pakumumuka, Yehova wangukambiya Mozesi mijalidu yaki yinyaki. Ŵerengani Ekisodo 34:4-6, pavuli paki kambiskanani mafumbu yanga:
-
Kumbi ndi mijalidu yaki niyi yo Yehova wangukambiya Mozesi?
-
Kumbi ndi mijalidu niyi yaku Yehova yo yitikukondwesani ukongwa?
6. Yehova watiŵaphwere ukongwa ŵanthu
Nyengu yinyaki ŵanthu aku Chiuta wo aziŵikanga kuti Aheberi ŵenga akapolu ku Ijipiti. Kumbi Yehova wavwanga wuli po ŵanthu ŵaki asuzgikanga? Vwisiyani SEŴERU ndipu mulondongi mu Bayibolu linu, pamwenga ŵerengani mwija Ekisodo 3:1-10. Pavuli paki kambiskanani mafumbu ngo nge mumphata.
-
Kumbi seŵeru ili lilongo kuti Yehova watuvwa wuli asani wawona ŵanthu asuzgika?—Wonani vesi 7 ndipuso 8.
-
Kumbi muwona kuti Yehova wakhumba nadi kovya ŵanthu kweniso kuti wangafiska kuŵawovya? Ntchifukwa wuli muwona viyo?
7. Vinthu vo Yehova wakulenga vilongo mijalidu yaki
Yehova watitilongo mijalidu yaki kuziya mu vinthu vo wakulenga. Woneriyani VIDIYO. Pavuli paki ŵerengani Aroma 1:20, ndi kukambiskana fumbu lo le mumphata.
-
Kumbi ndi mijalidu niyi yaku Yehova yo muwona mu vinthu vo wakulenga?
ŴANTHU ANYAKI AKAMBA KUTI: “Chiuta ndi munthu cha, ndi nthazi waka yo yisanirika peposi.”
-
Yimwi muwona wuli?
-
Ntchifukwa wuli muwona viyo?
KUMBI MWASAMBIRANJI?
Yehova tingamuwona cha chifukwa ndi Mzimu ndipu we ndi mijalidu yinandi yakukondwesa, nge chanju.
Kuweriyamu
-
Ntchifukwa wuli titimuwona cha Chiuta?
-
Kumbi mzimu wakupaturika ntchinthu wuli?
-
Kumbi ndi mijalidu yinyaki niyi yo Yehova wenayu?
FUFUZANI
Muziŵeni umampha Yehova mwakusambira mijalidu yaki yinayi yikuluyikulu.
“Kumbi Chiuta Ndi Munthu wa Mtundu Wuli?” (Chigongwi cha Alinda Na. 1 2019)
Wonani maukaboni ngakulongo kuti Yehova wasanirika mu chinthu chechosi cha.
Wonani chifukwa cho Bayibolu likambiya kuti mzimu wakupaturika ndi manja ngaku Chiuta.
“Kumbi Mzimu Wakupaturika Ntchinthu Wuli?” (Nkhani ya pa webusayiti)
Munthu wambula kuwona wagomezganga cha kuti Chiuta wamuŵanaŵaniyanga. Wonani vo vingumuwovya kuti wasinthi maŵanaŵanu ngaki.
“Sonu Ndiwona Kuti Ndingawovya Ŵanthu Anyaki” (Chigongwi cha Alinda, October 1, 2015)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
