CIIYO 07
Ino Jehova Uli Buti?
Ciindi nomuyeeya kujatikizya Jehova Leza, ncinzi ciboola mumizeezo yanu? Sena ulisumpukide kapati akuti uli kulamfwu andinywe, mbuli nyenyezi zili mumulalabungu uuli kulamfwu kapati? Sena mumuyeeyela kuti tali muntu mwini-mwini, naa ncintu buyo cimwi cilaanguzu mbuli kuzuma kwamvwula? Ino mubwini Jehova uli buti? Kwiinda mu Jwi lyakwe Bbaibbele, Jehova ulatwaambila bube bwakwe alimwi akuti ulamubikkila maano.
1. Nkaambo nzi ncotutakonzyi kumubona Leza?
“Leza Muuya.” (Johane 4:24) Jehova tajisi mubili mbuli wesu. Muntu uutalibonyi uukkala kujulu.
2. Mbube nzi bumwi mbwajisi Jehova?
Nokuba kuti Jehova talibonyi, Muntu mwini-mwini uujisi bube ibupa kuti aabo bamuzyi kabamuyanda. Bbaibbele lyaamba kuti: “Jehova uyandisya bululami, aboobo takabalekelezyi pe bantu bakwe basyomeka.” (Intembauzyo 37:28) “Ulaalubomba kapati aluse,” kwaambisya kubantu bapengede. (Jakobo 5:11) “Jehova ulaafwaafwi abaabo batyompedwe mumoyo, aabo bapengede mumizeezo, ulabafwutula.” (Intembauzyo 34:18) Alimwi sena mulizyi kuti Jehova tulakonzya kumupa kukkomana naa kuusa? Muntu uusala kucita zintu zibyaabi ulamutyompya alimwi akumupa kuusa. (Intembauzyo 78:40, 41) Pele muntu uucita zintu zibotu ulamukkomanisya.—Amubale Tusimpi 27:11.
3. Mbuti Jehova mbwatondezya kuti ulatuyanda?
Bube bupati mbwajisi Jehova, nduyando. Alimwi buya, “Leza nduyando.” (1 Johane 4:8) Jehova ulalutondezya luyando lwakwe ikutali buyo kwiinda mu Bbaibbele, pele amuzintu nzyaakalenga. (Amubale Milimo 14:17.) Mucikozyanyo, amubone mbotulengedwe. Wakatulenga munzila yakuti katucikonzya kubona mibala mibotu, kumvwa nyimbo zikkomanisya alimwi akulabila cakulya cinona. Uyanda kuti katukkomene mubuumi.
AMWIIYE ZINJI
Atubone Jehova ncabelesya kucita zintu zigambya. Mpoonya tulabona Jehova mbwabutondezya bube bwakwe bubotu.
4. Muuya uusalala ninguzu nzyabelesya Leza
Mbubwenya mbotubelesya maanza eesu notubeleka, awalo Jehova ubelesya muuya wakwe uusalala. Bbaibbele lyaamba kuti muuya uusalala tali muntu, pele ninguzu nzyabelesya Leza. Amubale Luka 11:13, alimwi a Milimo 2:17, akubandika mibuzyo eeyi:
-
Leza ‘uyootila’ muuya wakwe uusalala ali baabo ibaulomba. Aboobo sena muyeeya kuti muuya uusalala muntu, naa ninguzu nzyabelesya Leza? Nkaambo nzi ncomwaambila boobo?
Jehova ubelesya muuya wakwe uusalala kucita zintu zigambya. Amubale Intembauzyo 33:6 alimwi a 2 Petro 1:20, 21, akubandika mubuzyo ooyu:
-
Muunzila nzi zimwi Jehova mwaakabelesya muuya wakwe uusalala?
5. Jehova ulijisi bube bubotu kapati
Musa wakali mubelesi wa Leza uusyomeka, pele wakali kuyanda kumuzyiba kabotu Mulengi wakwe. Aboobo Musa wakalomba Leza kuti: “Kondizyibya nzila zyako, kutegwa ndikuzyibe.” (Kulonga 33:13) Mukumwiingula, Jehova wakamwaambila Musa bube mbwajisi. Amubale Kulonga 34:4-6, akubandika mibuzyo eeyi:
-
Mbube nzi Jehova mbwaakaambila Musa?
-
Mbube nzi bwa Jehova ibumukkomanisya kapati nywebo?
6. Jehova ulababikkila maano bantu
Bantu ba Leza, Bahebrayo, bakali bazike mu Egepita. Ino Jehova wakalimvwa buti ciindi bantu bakwe nobakali kupenga? Amuswiilile CAKALEKKOODWA amutobelezye, naa kubala Kulonga 3:1-10. akubandika mibuzyo iitobela.
-
Ino cibalo eeci cimwaambila nzi kujatikizya Jehova mbwalimvwa ciindi bantu nobapenga?—Amubone tupango 7 a 8.
-
Nkaambo nzi ncomuyeeya kuti Jehova ulayanda kubagwasya bantu akuti ulilibambilide kucita oobo?
7. Tulakonzya kwiiya bube bwa Jehova kuzintu nzyaakalenga
Jehova ulabutondezya bube bwakwe muzintu nzyaakalenga. Atweebelele VIDIYO. Mpoonya mubale Baroma 1:20, akubandika mubuzyo uutobela.
-
Mbube nzi bwa Jehova mbomubona muzintu nzyaakalenga?
BAMWI BAAMBA KUTI: “Leza tali muntu, pele ninguzu buyo izijanika koonse.”
-
Ino nywebo muyeeya buti?
-
Ncinzi cimupa kwaamba boobo?
MUBUFWAAFWI
Jehova Muuya uutalibonyi, pele ulijisi bube bunji bubotu, ikapati bube bwaluyando.
Ncinzi Ncomwaiya?
-
Nkaambo nzi ncotutakonzyi kumubona Jehova?
-
Ino muuya uusalala ninzi?
-
Mbube nzi bumwi mbwajisi Jehova?
AMUZYIBE ZINJI
Amwiiye kujatikizya bube bwa Jehova bone ibuyandika kapati.
“Ino Leza Ujisi Bube Buli Buti?” (Ngazi Yamulindizi No. 1 2019)
Amubone bumboni ibutondezya kuti Jehova tajaniki muzintu zyoonse.
Amubone kaambo Bbaibbele ncolikozyanisya muuya uusalala kumaanza aa Leza.
Mwaalumi moofwu cakali kumukatazya kusyoma kuti Leza ulamubikkila maano. Amubone cakamupa kucinca mbwaakali kuyeeya.
“Lino Ndilimvwa Kuti Inga Ndabagwasya Bamwi” (Ngazi Yamulindizi, October 1, 2015)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
