DYONDZO 07
Xana Yehovha U Njhani?
Loko u ehleketa hi Yehovha Xikwembu, ku ta yini emiehleketweni ya wena? Xana u n’wi teka a ri kule swinene ku fana ni tinyeleti lerova a hi nge swi koti ku va vanghana va yena? Xana u n’wi teka a ri ni matimba swinene kambe a ri nchumu lowu nga hanyiki ku fana na xidzedze? Kahlekahle Yehovha u njhani? Bibele yi hi byela leswaku Yehovha i Xikwembu xa njhani ni leswaku wa khathala hi wena.
1. Hikwalaho ka yini hi nga swi koti ku vona Xikwembu?
“Xikwembu i Moya.” (Yohane 4:24) Yehovha a nga na miri wa nyama. I Moya naswona u tshama etilweni laha hi nga kotiki ku ku vona.
2. Yehovha i Xikwembu xa njhani?
Hambileswi hi nga kotiki ku n’wi vona Yehovha, i wa xiviri naswona u na vumunhu lebyinene lebyi endlaka leswaku loko se hi n’wi tiva kahle hi ya hi n’wi rhandza. Bibele yi ri: “Yehovha u rhandza vululami, a nge ma fularheli malandza yakwe yo tshembeka.” (Pisalema 37:28) Nakambe “u ni ntwelavusiwana lowukulu ni tintswalo,” ngopfungopfu eka vanhu lava xanisekaka. (Yakobo 5:11) “Yehovha u le kusuhi ni lava tshovekeke timbilu; u ponisa lava hetiweke matimba.” (Pisalema 34:18) Xana a wu swi tiva leswaku ndlela leyi hi hanyaka ha yona ya n’wi khumba? Munhu loyi a hlawulaka ku endla swilo swo biha u twisa Yehovha ku vava. (Pisalema 78:40, 41) Kambe munhu la endlaka leswinene u tsakisa Yehovha.—Hlaya Swivuriso 27:11.
3. Yehovha u swi kombisa njhani leswaku wa hi rhandza?
Nchumu wa nkoka swinene lowu Yehovha a nga na wona i rirhandzu. Kahlekahle “Xikwembu i rirhandzu.” (1 Yohane 4:8) Hi swi vona kahle leswaku Yehovha wa hi rhandza loko hi hlaya Bibele niloko hi languta swilo leswi a swi tumbuluxeke. (Hlaya Mitirho 14:17.) Ehleketa hi ndlela leyi a hi endleke ha yona. U hi endle hi kota ku vona mihlovo yo saseka, ku twa vuyimbeleri byo xonga ni ku dya swakudya swo xawula. U lava hi tiphina hi vutomi.
ANAKANYISISA
Kambisisa leswaku Yehovha u tirhisa yini leswaku a endla swilo swo hlamarisa. Kutani u vona ndlela leyi a hi kombisaka ha yona leswaku i Xikwembu xa njhani.
4. Moya lowo kwetsima i matimba lawa Xikwembu xi ma tirhisaka
Ku fana ni loko hi tirhisa mavoko ya hina ku endla ntirho wo karhi, Yehovha u tirhisa moya lowo kwetsima. Bibele yi vula leswaku moya lowo kwetsima a hi munhu kambe i matimba lawa Xikwembu xi ma tirhisaka ku endla swilo. Hlaya Luka 11:13 na Mitirho 2:17, ivi mi bula hi swivutiso leswi landzelaka:
-
Xikwembu xi ta “[chulula] moya” wa xona lowo kwetsima eka lava wu kombelaka. Xana u ehleketa leswaku moya lowo kwetsima i munhu kumbe i matimba lawa Xikwembu xi ma tirhisaka? Hikwalaho ka yini u vula tano?
Yehovha u tirhisa moya lowo kwetsima leswaku a endla swilo swo hlamarisa. Hlaya Pisalema 33:6 na 2 Petro 1:20, 21, ivi mi bula hi xivutiso lexi:
-
Hi swihi swilo swin’wana leswi Yehovha a swi endleke hi ku tirhisa moya wakwe lowo kwetsima?
5. Yehovha u ni vumunhu lebyinene
Muxe a a ri nandza wo tshembeka wa Xikwembu kambe a a lava ku xi tiva kahle. Kutani Muxe u byele Xikwembu a ku: “Ndzi tivise tindlela ta wena leswaku ndzi ta ku tiva.” (Eksoda 33:13) Xikwembu xi hlamule Muxe hi ku n’wi byela leswaku xi njhani. Hlaya Eksoda 34:4-6, ivi mi bula hi swivutiso leswi landzelaka:
-
Yehovha u byele Muxe leswaku i Xikwembu xa njhani?
-
I yini leswi u swi rhandzaka ngopfu hi Yehovha?
6. Yehovha wa khathala hi vanhu
Vaheveru lava a va ri vanhu va Xikwembu, a va ri mahlonga eEgipta. Yehovha u titwe njhani loko va xaniseka? Tlanga RUNGULA LERI RHEKHODIWEKE ivi u fambisana na rona kumbe u hlaya Eksoda 3:1-10. Ivi mi bula hi swivutiso leswi landzelaka.
-
Mhaka leyi yi yi kombisa njhani ndlela leyi Yehovha a titwaka ha yona loko vanhu va xaniseka?—Vona ndzimana 7 na 8.
-
Xana u vona onge Yehovha wa swi kota ku pfuna vanhu naswona wa swi lava ku va pfuna? Hikwalaho ka yini u vula tano?
7. Ntumbuluko wu hi dyondzisa hi Yehovha
Hi kota ku tiva leswaku Yehovha i Xikwembu xa njhani loko hi languta swilo leswi a swi tumbuluxeke. Tlanga VHIDIYO. Ivi mi hlaya Varhoma 1:20, kutani mi bula hi xivutiso lexi landzelaka.
-
Swilo leswi Yehovha a swi endleke swi ku byela yini hi yena?
VAN’WANA VA RI: “Xikwembu a xi kona kambe xi le mbilwini ya munhu.”
-
Wena u ri yini?
-
Hikwalaho ka yini u vula tano?
NKATSAKANYO
Yehovha i Moya a hi nge koti ku n’wi vona, swi tele leswi hi nga swi dyondzaka eka yena, ngopfungopfu rirhandzu.
Mpfuxeto
-
Hikwalaho ka yini hi nga swi koti ku vona Yehovha?
-
I yini moya lowo kwetsima?
-
Hi byihi vumunhu lebyi Yehovha a nga na byona?
KUMA LESWI ENGETELEKEKE
Dyondza swilo swa mune leswi endlaka Yehovha a va Xikwembu lexinene.
“Hi Tihi Timfanelo Ta Xikwembu?” (Xihondzo xo Rindza No. 1 2019)
Xiya vumbhoni lebyi kombisaka leswaku Yehovha a nga le ka swilo hinkwaswo.
“Xana Xikwembu Xi Kumeka Kun’wana Ni Kun’wana?” (Nhlokomhaka leyi kumekaka eka website)
Twana leswaku hikwalaho ka yini Bibele yi vula leswaku moya lowo kwetsima i mavoko ya Xikwembu.
“Moya Lowo Kwetsima I Yini?” (Nhlokomhaka leyi kumekaka eka website)
Wanuna la feke mahlo a swi n’wi tikela ku pfumela leswaku Xikwembu xa khathala hi yena. Twana lexi endleke a cinca ndlela leyi a a titwa ha yona.
“Na Mina Se Ndza Swi Kota Ku Pfuna Van’wana” (Xihondzo xo Rindza, October 1, 2015)