ISOMO 07

Yahwe Muntu wa Mulingo Ki?

TEKAHO

Obw’otekerezaaho Yahwe Ruhanga, kiki ekikwizira omu bitekereezo? W’amaani muno, baitu kandi ali hara muno naiwe, nk’ekikonjonjo ky’enyunyuzi? Rundi n’otekereza w’amaani, baitu ali kintu kwonka nk’enkuba? Mali Yahwe muntu wa mulingo ki? Kurabira omu Kigambo kye Baibuli, Yahwe n’ayoleka emu ha miringo ye kandi n’ayoleka nk’oku n’akufaaho.

1. Habwaki titurukusobora kurora Ruhanga?

“Ruhanga mwoyo.” (Yohana 4:24) Yahwe taine omubiri nk’ogwaitu. Uwe mwoyo kandi n’aikara omu iguru, ekiikaro ekitarukurorwa.

2. Emu ha miringo ya Yahwe niyo eha?

N’obukiraaba ngu Yahwe tarukurorwa, aine emiringo ey’ereetera abo abamumanyire kumugonza. Baibuli n’egamba eti: “[Yahwe] nagonza omusango ogwobulyo, kunu tasiga abarukwerabe.” (Zabuli 37:28) Kandi “wembabazi nyingi nokuganyira,” kukira muno hali abantu abali omu kubonabona. (Yakobo 5:11) “[Yahwe] aikara haihi nabo abomutima ogucwekere, abajuna [abahoirwemu amaani].” (Zabuli 34:18) Kandi obaire okimanyire ngu Yahwe akwatwaho habw’omulingo twetwazaamu? Omuntu obw’acwamu kukora ebintu ebibi amusaaliza kandi amubiihiza. (Zabuli 78:40, 41) Baitu omuntu ow’akora ebihikire amusemeza.—Soma Enfumo 27:11.

3. Yahwe ayoleka ata ngu n’atugonza?

Omulingo gwa Yahwe ogurukukirrayo kimu obukuru nukwo okugonza. Amananu gali, “Ruhanga nukwo kugonza.” (1 Yohana 4:8) Yahwe ayoleka okugonza kwe kurabira omu bintu ebiyahangire, hatali omu Baibuli honka. (Soma Engeso Ezabakwenda 14:17.) Ekyokurorraho, tekerezaaho omulingo yatuhangiremu. Atuhaire obusobozi obw’okurora erangi ezirukuzooka kurungi, kuhurra obuzina oburukusemeza, hamu n’obw’okunulirwa ebyokulya. N’agonza twegondeze omu bwomeezi.

YEGA EBIRUKUKIRAHO

Manya omulingo Yahwe akoramu ebintu ebirukuhuniriza. Hanyuma orole omulingo Yahwe atwolekamu emiringo ye erukusikiiriza.

4. Omwoyo ogurukwera—gali maani ga Ruhanga

Nk’oku tukozesa emikono yaitu kukora emirimo, Yahwe uwe akozesa omwoyo ogurukwera. Baibuli n’eyoleka ngu omwoyo ogurukwera tali Ruhanga, baitu maani Ruhanga agakozesa kukora emirimo ye. Musome Luka 11:13, hamu na Engeso Ezabakwenda 2:17, hanyuma mubazeeho ebikaguzo binu:

Ruhanga naija ‘kuseesa’ omwoyo gwe ogurukwera hali abo abagumusaba. Nahabweki, notekereza omwoyo ogurukwera Ruhanga, rundi maani ga Ruhanga? Habwaki n’ogamba oti?

Yahwe akozesa omwoyo gwe ogurukwera kukora ebintu ebirukuhuniiriza. Musome Zabuli 104:30 na 2 Petero 1:20, 21, hanyuma mubazeeho ekikaguzo kinu:

Miringo ki endi Yahwe ey’akozesezeemu omwoyo gwe ogurukwera?

5. Yahwe aine emiringo erukusikiiriza

Musa akaba ali muheereza wa Ruhanga omwesigwa, baitu akaba n’agonza kumanya Omuhangi we kurungi. Nahabweki Musa akamugambira ati: “Onyoleke hati emihanda yawe, nkumanye.” (Okuruga 33:13) Yahwe akagarukamu Musa yamugambira emu ha miringo Ye. Musome Okuruga 34:4-6, hanyuma mubazeeho ebikaguzo binu:

Miringo ki emu Yahwe ey’aine, eiyagambiire Musa?
Omu miringo ya Yahwe, mulingo ki ogw’orukukirayo kugonza?

6. Yahwe afaaho abantu

Abantu ba Ruhanga, Abaheburaniya, bakaba bali bairu omu ihanga lya Misiri. Kubonabona kwabo kukakwataho kuta Yahwe? Mutekeho IRAKA kandi muhondere, rundi musome Okuruga 3:1-10. Hanyuma mubazeeho ebikaguzo binu.

IRAKA: Yahwe Akakwatwaho Habw’Okubonabona Kwabo (2:45)

Ebyahandiikirwe binu nibikwegesa ki, ha mulingo Yahwe ayehurra ha kubonabona kw’abantu be?—Rora orukarra 7 na 8.
Notekereza mali Yahwe n’agonza kukonyera abantu, kandi ngu aine obusobozi obw’okukikora? Habwaki?

7. Ebihangwa byoleka emiringo ya Yahwe

Yahwe ayoleka emiringo ye kurabira omu bintu ebiyahangire. Mutekeho VIDIYO. Hanyuma musome Abarumi 1:20, hanyuma mubazeeho ekikaguzo kinu.