MATAUPU 07
A Ieova se Vaegā Tino Pefea?
Kafai e mafaufau koe ki a Ieova te Atua, ne a mea e ‵sae aka i tou mafaufau? E mata, a ia se tino fakaofoofogia kae ‵mao mai i a koe, pelā mo fetū i se fakaputugā fetū? Io me mafaufau koe me fai a ia pelā me se fatili, e ‵mana kae seai ne ana uiga? Kae ko Ieova la se vaegā tino pefea? E fakaasi mai ne Ieova i tena Muna, ko te Tusi Tapu ana nisi uiga, e pelā foki mo tena saga tonu atu ki a koe.
1. Kaia e se mafai o lavea ne tatou a te Atua?
“A te Atua se agaga.” (Ioane 4:24) E seai se foitino o Ieova e pelā mo tatou. A ia se Agaga telā e nofo i te lagi, se koga telā e se lavea ne tatou.
2. Ne a nisi uiga o Ieova?
E tiga eiloa e se lavea ne tatou a Ieova, a ia se Tino tonu kae e maua foki ne ia a uiga kolā e ‵gali ki tino kolā e iloa ne latou a ia. E fai mai te Tusi Tapu: “A Ieova e fiafia ki te fakamasinoga tonu, kae ka se tuku tiaki ne ia ana tino fakamaoni.” (Salamo 37:28) A ia foki e “lasi ‵ki te alofa atafai mo te alofa fakamagalo,” maise ki tino kolā e logo‵mae. (Iakopo 5:11) “A Ieova e pili ki a latou kolā e loto mafatia; e fakaola ne ia a latou kolā ko fati‵fati olotou loto.” (Salamo 34:18, fakamatalaga mai lalo) Kae e iloa ne koe me e mafai o pokotia a Ieova i ‵tou faifaiga? A te tino telā e filifili ke fai ne ia a mea ma‵sei ka fakafanoanoa ne ia a te Atua. (Salamo 78:40, 41) Kae ko te tino telā e fai ne ia te mea tonu, e fakafiafia atu ki a Ia.—Faitau te Faataoto 27:11.
3. E fakaasi mai pefea ne Ieova tena alofa ki a tatou?
A te ‵toe uiga tu ‵kese o Ieova ko te alofa. E tonu, a “te Atua ko te alofa.” (1 Ioane 4:8) E fakaasi mai ne Ieova tena alofa, e auala i te Tusi Tapu mo ana mea foki ne faite. (Faitau te Galuega 14:17.) Mafaufau ki te auala ne faite ne ia tatou. Ne tuku mai ne ia a te atamai ke lavea ne tatou a te ‵gali o lanu kese‵kese, ke lagona ne tatou a pese ‵gali, kae ke mafai foki o ‵tami tatou ki mea‵kai mo‵mona. E manako a ia ke gali ‵tou olaga.
KELI MALOSI IFO
Tauloto ki te mea e fakaaoga ne Ieova ke fai a mea fakaofoofogia. Ko onoono ei ki te auala e fakaasi mai ne ia ana uiga ‵gali.
4. Te agaga tapu—ko te malosi galue o te Atua
E pelā loa mo tatou e fakaaoga ‵tou lima ke fai a galuega, e fakaaoga ne Ieova a tena agaga tapu. E fakaasi mai i te Tusi Tapu me i te agaga tapu e sē se tino, kae ko te malosi e fakaaoga ne te Atua ke fai ana galuega. Faitau te Luka 11:13 mo te Galuega 2:17, ko sau‵tala ei ki fesili konei:
-
Ka “‵ligi atu” ne te Atua tena agaga tapu ki a latou kolā e akai atu ki ei. Se a la tau faka‵tau, a te agaga tapu se tino, io me ko te malosi galue o te Atua? Kaia e fai mai ei koe penā?
E fakaaoga ne Ieova tena agaga tapu ke fai a galuega fakaofoofogia. Faitau te Salamo 33:6 mo te 2 Petelu 1:20, 21, ko sau‵tala ei ki te fesili tenei:
-
Ne a nisi auala ne fakaaoga ei ne Ieova a tena agaga tapu?
5. A Ieova e ‵gali ana uiga
A Mose se tavini fakamaoni a te Atua, kae ne manako a ia ke iloa faka‵lei ne ia tena Mafuaga. Ne fai atu a Mose ki a ia: “Fakaasi mai la ki a au ou auala, ko te mea ke iloa ne au a koe.” (Esoto 33:13) I tena tali, ne fakaasi atu ne Ieova ki a Mose ana nisi uiga. Faitau te Esoto 34:4-6, ko sau‵tala ei ki fesili konei:
-
Ne a uiga o Ieova ne fakaasi atu ne ia ki a Mose?
-
Ne a uiga o Ieova e ‵gali ki a koe?
6. A Ieova e atafai ki tino
Ne ‵nofo pologa a tino o te Atua, telā ko tino Epelu i Aikupito. Ne a lagonaga o Ieova ki logo‵maega ne fe‵paki mo latou? Fakatagi te FAITAUGA kae fakalogologo ki ei, io me faitau ki te Esoto 3:1-10. Ko sau‵tala ei ki fesili konei.
-
Ne a lagonaga o Ieova e fakaasi mai i te tala tenei e uiga ki logo‵maega o tino?—Onoono ki te fuaiupu e 7 mo te 8.
-
Se a tau faka‵tau, e mata, e manako tonu kae mafai foki ne te Atua o fesoasoani ki tino? Kaia e fai mai koe penā?
7. E fakaasi mai a uiga o Ieova i ana mea ne faite
Ne fakaasi mai ne Ieova ana uiga e auala i ana mea ne faite. Pei te VITIO. Faitau te Loma 1:20, ko sau‵tala ei ki te fesili tenei.
-
Ne a uiga o Ieova e lavea ne koe i ana mea ne faite?
MEA E FAI MAI NE NISI TINO: “A te Atua e sē se tino, se malosi fua telā e nofo i koga katoa.”
-
Se a tau faka‵tau?
-
Kaia e mafaufau ei koe penā?
MANATU AOGA
A Ieova se Tino faka-te-Agaga sē matea telā e uke ana uiga ‵gali, kae sili atu i ei, ko te alofa.
Fesili
-
Kaia e se mafai ei o lavea ne tatou a Ieova?
-
Se a te agaga tapu?
-
Ne a nisi uiga o Ieova?
NISI FAKAMATALAGA
Fai ke momea aka te iloa ne koe o Ieova mai te tauloto ki ana uiga fakaofoofogia e fa.
“A te Atua se Vaegā Tino Pefea?” (Te Faleleoleo Maluga Napa 1 2019)
Mafaufau ki fakamaoniga kolā e fai mai me i a Ieova e se nofo i koga katoa.
Onoono ki te pogai e fakasino atu te Tusi Tapu ki te agaga tapu e pelā me ko te lima o te Atua.
Ne taumafai se tagata ‵kivi ke talitonu a ia me e atafai a te Atua ki a ia. Onoono ki te mea ne ‵fuli ei tena mafaufau.