XCHANOBIL 07
¿Kʼu yelan li Jeovae?
¿Kʼu van yelan xanaʼ li Jeova Diose? Ta skoj ti toj tsots sjuʼele, ¿mi nom tajek chavaʼi aba ta stojolal jech kʼuchaʼal snamal li kʼanaletike? ¿Mi chanop ti muʼyuk tstsak ta venta Dios kʼu yelan chkaʼi jbatik ta skoj ti tsots tajek yipe? ¿Kʼu yelan ta melel li Jeovae? Li ta Vivliae, te chal junantik stalelaltak xchiʼuk chal ti oyot ta yoʼontone.
1. ¿Kʼu yuʼun mu xkiltik li Diose?
«Li Diose jaʼ jun kuxlejal ti mu xvinaje» (Juan 4:24). Li Jeovae muʼyuk sbekʼtal kʼuchaʼal voʼotike, yuʼun jaʼ jun kuxlejal ti mu xvinaj ta kʼelel ti te nakal ta vinajele, ti bu mu xa jtatik ta ilele.
2. ¿Kʼu yelan stalelaltak li Jeovae?
Akʼo mi mu xkiltik li Jeovae, chlik jkʼantik kʼalal chkojtikintike, yuʼun kuxul ta melel xchiʼuk oy stalelaltak ti toj kʼupilik sbae. Xi chal li Vivliae: «Skʼanoj tukʼilal li Jeovae xchiʼuk muʼyuk chikta komel li buchʼutik tukʼ yakʼoj sbaik ta stojolale» (Salmo 37:28). Jech xtok, «toj echʼ xa noʼox snaʼ xkʼanvan xchiʼuk chkʼuxubinvan li Jeovae», mas to jech tspas ta stojolal li buchʼutik chil svokolike (Santiago 5:11). «Nopol oy Jeova ta stojolal li buchʼutik muʼyuk xa te tsakal chaʼi li yoʼontonike; tskolta li buchʼutik chat yoʼontonike» (Salmo 34:18). ¿Mi anaʼoj ti xuʼ xmuyubaj o xat yoʼonton kuʼuntik Jeova ta skoj li kʼusitik ta jpastike? Li buchʼu tspas kʼusi chopole chakʼbe yatel yoʼonton li Diose (Salmo 78:40, 41). Pe li buchʼu jaʼ tspas li kʼusi leke xmuyubaj yoʼonton yuʼun (kʼelo Proverbios 27:11).
3. ¿Kʼuxi chakʼ ta ilel Jeova ti skʼanojutike?
Li stalelal Jeova ti mas kʼupil sba xchiʼuk ti tsots skʼoplale jaʼ ti snaʼ xkʼanvane, yuʼun «jaʼ kʼanelal li Diose» (1 Juan 4:8). Li Jeovae maʼuk noʼox chakʼbutik ta ilel ta Vivlia ti skʼanojutike, yuʼun te chakʼbutik ta ilel xtok li ta spasbentake (kʼelo Echos 14:17). Nopo noʼox avaʼi ti kʼu yelan spasojutike. Yuʼun xuʼ xkiltik li kʼupil sba koloretike, xuʼ jkʼupintik xchikintael li sone xchiʼuk ti jlajestik muil veʼliletike. Oy ta yoʼonton ti jkʼupin jkuxlejaltike.
JCHANTIK TO BATEL MAS
Jkʼeltik kʼusi tstunes Jeova kʼalal oy kʼusitik labalik sba tspase. Mi laje, jkʼeltik kʼuxi chakʼ ta ilel li stalelaltak ti toj kʼupilik sbae.
4. Li chʼul espiritue jaʼ li yip Diose
Voʼotike ta jtunes jkʼobtik sventa xij-abtej, yan li Jeovae jaʼ tstunes li xchʼul espiritue. Li Vivliae muʼyuk chal ti jaʼ jun Dios li chʼul espiritue, yuʼun jaʼ yip Dios sventa tspas li kʼusi tskʼane. Kʼelik Lukas 11:13 xchiʼuk Echos 2:17 xchiʼuk albeik skʼoplal li sjakʼobiltak liʼe:
-
Xuʼ jkʼanbetik xchʼul espiritu li Diose, vaʼun ta xakʼbutik. Jaʼ yuʼun chaʼa, ¿mi ta van xanop ti jaʼ Dios li chʼul espiritue o mi jaʼ noʼox van yip li Diose? ¿Kʼu yuʼun ti jech chanope?
Li Jeovae tstunes xchʼul espiritu sventa oyuk kʼusitik labalik sba spas. Kʼelik Salmo 33:6 xchiʼuk 2 Pedro 1:20, 21 xchiʼuk albeik skʼoplal li sjakʼobil liʼe:
-
¿Butik la stunes xchʼul espiritu li Jeovae?
5. Kʼupilik sba stalelaltak li Jeovae
Akʼo mi yajtunel Dios xa ox li Moisese, jech-o tskʼan chojtikin lek li Jpasvanej yuʼune. Jaʼ yuʼun, li Moisese xi laj yalbe li Jeovae: «Akʼbun kil li beetik avuʼune sventa xkojtikinot» (Eksodo 33:13). Li Jeovae laj yalbe Moises kʼu yelan li stalelaltake. Kʼelik Eksodo 34:4-6 xchiʼuk albeik skʼoplal li sjakʼobiltak liʼe:
-
Jech kʼuchaʼal chal li tekstoe, ¿kʼu yelan stalelaltak li Jeovae?
-
¿Kʼusitik stalelal Jeova mas lek chavilbe?
6. Kʼuxutik ta yoʼonton li Jeovae
Li j-ebreoetik ti jaʼik li steklumal Dios ta voʼnee laj toʼox yichʼik mosoinel ta Ejipto. Kʼalal laj yil ti chil svokol steklumal li Jeovae, ¿kʼu van yelan laj yaʼi sba? Chikintaik li AUDIOE xchiʼuk tsʼakliik batel o jaʼ noʼox kʼelik Eksodo 3:1-10. Laje albeik skʼoplal li sjakʼobiltak liʼe:
-
Li loʼil liʼe, ¿kʼusi chakʼ achan ti kʼu yelan chaʼi sba Jeova kʼalal chil svokol li krixchanoetike? (Kʼelik li versikulo 7 xchiʼuk 8).
-
¿Mi ta melel tskʼan van tskoltautik li Jeovae? ¿Mi xuʼ van yuʼun skoltautik xanaʼ? ¿Kʼu yuʼun ti jech chanope?
7. Xuʼ xkilbetik stalelaltak Jeova li ta spasbentake
Li Jeovae chakʼbutik ta ilel stalelaltak li ta spasbentake. Kʼelik li VIDEOE. Laje kʼelik Romanos 1:20 xchiʼuk albeik skʼoplal li sjakʼobil liʼe:
-
¿Kʼusitik stalelal Jeova chavil li ta spasbentake?
JUNANTIKE XI CHALIKE: «Ta skoj ti mu xkiltik li Diose, mu xuʼ xkojtikintik».
-
¿Mi jech chanop ek?
-
¿Kʼu yuʼun ti jech chanope?
¿KʼUSI LA ACHAN?
Li Jeovae jaʼ jun kuxlejal ti mu xvinaj ta kʼelele. Kʼupilik sba tajek li stalelaltake, jtos ti bu mas kʼupil sbae jaʼ ti snaʼ xkʼanvane.
Svulesobil ta joltik
-
¿Kʼu yuʼun ti mu xkiltik li Jeovae?
-
¿Kʼusi jaʼ li chʼul espiritue?
-
¿Kʼusitik stalelaltak Jeova la jchantik talel?
XUʼ TO XAKʼEL LIʼE
Kʼelavil chantos stalelal Jeova sventa xavojtikin leke.
«¿Kʼu yelan li Diose?» (Li Jkʼel-osil ta toyole, num. 1 2019)
Kʼelavil kʼu yuʼun chkaltik ti muʼyuk te oy Jeova ta buyuk noʼoxe.
Kʼelavil kʼu yuʼun chal Vivlia ti xkoʼolaj ta skʼob Dios li chʼul espiritue.
Jun vinik ti maʼsate vokol chaʼi xchʼunel ti kʼanbil yuʼun li Diose. Kʼelavil kʼusi jelbat-o snopben.
«Li avie xkoltaj xa kuʼun chkaʼi li yantike» (Li Jkʼel-osil ta toyole, 1 yuʼun oktuvre ta 2015)
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
