OCIPAMA 07
Yehova o Kuete hẽ Etimba Ndeli Liomanu?
Eci o sokolola catiamẽla ku Yehova Suku, nye ciya vovisimĩlo viove? Eye ukuakuvetiya, pole, o kasi ocipãla love ndeci olombungululu vi kasi ocipãla locengele cimue? Ale o sima okuti eye ukuonene, pole, ka kuete ocikembe ndeci ehunguhungu limue? Yehova wa tuwa ndati? Pocakati Condaka yaye Embimbiliya, Yehova o situlula ovituwa vimue viaye kuenda olio li lekisa okuti, wa ku kapako.
1. Momo lie ka tu ponduila oku mola Suku?
“Suku Espiritu.” (Yoano 4:24) Yehova ka kuete etimba ndeli lietu. Eye omunu umue ka muiwa o kasi kovailu okuti, ocitumãlo cimue ka tu pondola oku mola.
2. Vipi ovituwa vimue via Yehova?
Ndaño okuti Yehova ka muiwa, pole, eci tu u kũlĩha, tu pondola oku u sola omo okuti Omunu umue wocili, o kuete ovituwa vi komõhisa. Embimbiliya liti: “Yehova o sole esunga, kuenda eye ka ka yanduluka vana vo kolela.” (Olosamo 37:28) Eye “ukuacisola calua haeye ukuahenda,” ca piãla enene komanu va kasi oku tala ohali. (Tiago 5:11) “Yehova o kasi ocipepi la vakuavitima via teka; eye o popela vana va sumua.” (Olosamo 34:18) Ove hẽ wa kũlĩha okuti ovituwa tu lekisa vi pondola oku sanjuisa Yehova ale oku u sumuisa? Omunu o nõla oku linga ovina vĩvi, u nyumãlisa loku u sumuisa. (Olosamo 78:40, 41) Pole, omunu o nõla oku linga ovina viwa u sanjuisa.—Tanga Olosapo 27:11.
3. Yehova o lekisa ndati okuti o tu sole?
Ocituwa ca velapo ca Yehova, ocisola. Ocili okuti, “Suku eye ocisola.” (1 Yoano 4:8) Yehova ka situlula lika ocisola caye Vembimbiliya, pole, o ci lingavo pocakati covina eye a lulika. (Tanga Ovilinga 14:17.) Kũlĩhĩsa ndomo eye a tu lulika. Eye wa tu ĩha uloño woku luluvalela kavala a posoka, oku yevelela ovisikilo viwa kuenda oku yeva epepo liokulia kuwa. Eye o yongola okuti, tu sanjukila omuenyo.
LILONGISA ONDONGOSI
Lilongisa eci Yehova a talavaya laco oco a lulike ovina vi komõhisa. Noke tala ndomo Yehova a situlula loku lekisa ovituwa viaye vi komõhisa.
4. Espiritu sandu—ongusu ya pama ya Suku
Ndeci tu talavaya lovaka etu oco tu linge upange umue, Yehova o talavaya lespiritu sandu liaye. Embimbiliya li situlula okuti, espiritu sandu, hamunuko pole, ongusu Suku a talavaya layo oco a linge ovina. Tanga Luka 11:13 kuenda Ovilinga 2:17, noke konomuisa apulilo a kuãimo:
-
Suku o “sukumũila” espiritu sandu liaye ku vana vo pinga. Omo liaco, o sima hẽ okuti espiritu sandu omunu umue, ale ongusu ya pama ya Suku? Momo lie o ci popela?
Yehova o talavaya lespiritu sandu liaye oco a linge ovina vi komõhisa. Tanga Olosamo 33:6 kuenda 2 Petulu 1:20, 21, noke konomuisa epulilo li kuãimo:
-
Volonjila vipi Yehova a talavaya lespiritu sandu liaye?
5. Yehova o kuete ovituwa vi komõhisa
Ndaño okuti Mose wa kala ufendeli umue ukuekolelo wa Suku, pole, eye wa yonguile oku kũlĩha ciwa Ululiki waye. Omo liaco, Mose wo sapuila hati: “Ndekise olonjila viove, oco ndu ku kũlĩhe.” (Etundilo 33:13) Kuenje Yehova wa situluila ku Mose ovituwa Viaye. Tanga Etundilo 34:4-6, noke konomuisa apulilo a kuãimo:
-
Ovituwa vipi Yehova a situluila ku Mose?
-
Ovituwa vipi via Yehova o sole vali?
6. Yehova wa kapako omanu
Afendeli va Suku va Heveru, va kala apika Kegito. Yehova wa liyeva ndati eci afendeli vaye va tala ohali? Yevelela OCIPAMA CA NGALAVALIWA kuenda kuama, ale tanga Etundilo 3:1-10. Noke konomuisa apulilo a kuãimo.
-
Ulandu owu, u ku longisa nye catiamẽla ku Yehova ndomo a liyeva poku mola ohali yomanu?—Tanga ocinimbu 7 kuenda 8.
-
O sima hẽ okuti Yehova o yongola oku kuatisa omanu kuenda o kuete epondolo lioku ci linga? Momo lie?
7. Ovina vi sangiwa voluali vi situlula ovituwa via Yehova
Yehova o situlula ovituwa viaye pocakati covina eye a lulika.
Tala OVIDEO. Noke tanga Va Roma 1:20, kuenje konomuisa epulilo li kuãimo.
-
Ovituwa vipi via Yehova o pondola oku mola kovina eye a lulika?
OMANU VAMUE VA POPIA VATI: “Suku hamunuko, eye ongusu yimue ño yi kasi kolonepa viosi.”
-
Nye o sima?
-
Momo lie o simĩla ndoco?
NYE WA LILONGISA?
Yehova omunu umue ka muiwa, o kuete ovituwa vi komõhisa ca piãla enene ocisola.
Oku Pitulula
-
Momo lie ka tu ponduila oku mola Yehova?
-
Nye ci lomboloka espiritu sandu?
-
Vipi ovituwa vimue via Yehova?
OCO O KŨLĨHE OVINA VIKUAVO
Lilongisa ondongosi poku konomuisa ovituwa vikuãla via velapo via Yehova.
Konomuisa ovovangi a lekisa okuti, Yehova ka kasi kovina viosi.
“Suku o Kasi hẽ Kolonepa Viosi Vepuluvi Limuamue?” (Ocipama ci sangiwa lika vo Internet)
Tala esunga lieci Embimbiliya li sokisila espiritu sandu lovaka a Suku.
“Nye ci Lomboloka Espiritu Sandu?” (Ocipama ci sangiwa lika vo Internet)
Ulume umue omeke, ka tavele okuti Suku wo kapeleko. Kũlĩhĩsa eci ca pongolola ovisimĩlo viaye.
“Cilo Ndi Pondola Oku Kuatisa Vakuetu” (Utala Wondavululi 1 wa Mbalavipembe 2015)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
