NGUDO 07
Yehova U Hani?
Ni vhona u nga Yehova Mudzimu u hani? Naa ni vhona u nga u a ofhisa nahone u kule lune zwi nga si konadzee uri ni vhe khonani yawe? Kana naa ni vhona u nga a si muthu wa vhukuma, fhedzi u sokou vha tshithu tshi re na maanḓa u fana na mubvumo wa mvula? Yehova u hani zwa vhukuma? Bivhili i a ri vhudza zwine Yehova a vha zwone. I dovha ya ri vhudza uri u na ndavha na inwi.
1. Ndi ngani ri sa koni u vhona Mudzimu?
“Mudzimu ndi Muya.” (Yohane 4:24) Yehova ha na muvhili u fanaho na washu. Ndi Muya nahone u dzula ṱaḓulu hune ra si kone u hu vhona.
2. Ndi zwifhio zwiṅwe zwine Yehova a vha zwone?
A ri koni u vhona Yehova, fhedzi musi ri tshi mu ḓivha zwi ita uri ri mu fune ngauri ndi Muthu wa vhukuma nahone ndi muthu wavhuḓi. Bivhili i ri: “Yehova u funa khaṱhulo yo teaho, ha nga ṱutsheli vhathu vhawe vha fhulufhedzeaho.” (Phisalema 37:28) U dovha a vha na “lufuno luhulu na khathutshelo,” zwihuluhulu kha vhathu vhane vha khou tambula. (Yakobo 5:11) “Yehova u tsini na vho ṱungufhalaho; u tshidza vho kuleaho nungo.” (Phisalema 34:18) No vha ni tshi zwi ḓivha uri zwine ra zwi ita zwi nga sinyusa Yehova kana u mu takadza? Muthu ane a ita zwithu zwi si zwavhuḓi nga khole, u ṱungufhadza Yehova na u mu sinyusa. (Phisalema 78:40, 41) Fhedzi muthu ane a ita zwo lugaho u takadza Yehova.—Vhalani Mirero 27:11.
3. Yehova u sumbedza hani uri u a ri funa?
Kha zwoṱhe zwine Yehova a vha zwone, tsha ndemesa ndi lufuno. Bivhili i ri: “Mudzimu ndi lufuno.” (1 Yohane 4:8) Bivhili na zwithu zwoṱhe zwe Yehova a zwi sika, zwi sumbedza uri Yehova u na lufuno. (Vhalani Mishumo 14:17.) Sa tsumbo, ṱhogomelani nḓila ye a ri sika ngayo. O ri sika ri tshi kona u vhona mivhala yo nakaho, u thetshelesa muzika u takadzaho na u thetshela zwiḽiwa zwi ḓifhaho. U ṱoḓa ri tshi ḓiphiṋa nga vhutshilo.
GUDANI ZWO ENGEDZEAHO
Gudani uri Yehova u ita hani zwithu zwi mangadzaho. Ni vhone na uri u sumbedza hani zwine a vha zwone.
4. Muya mukhethwa ndi maanḓa ane Mudzimu a a shumisa
Samusi ri tshi shumisa zwanḓa zwashu musi ri tshi shuma, Yehova u shumisa muya wawe mukhethwa. Bivhili i sumbedza uri muya mukhethwa a si muthu, fhedzi ndi maanḓa ane Mudzimu a a shumisa u ita mishumo yawe. Vhalani Luka 11:13 na Mishumo 2:17, ni kone u fhindula mbudziso dzi tevhelaho:
-
Mudzimu a nga ri “shululela” muya wawe mukhethwa arali ra mu humbela. Zwino naa ni vhona u nga muya mukhethwa ndi muthu kana ndi maanḓa ane Mudzimu a a shumisa? Ndi ngani ni tshi ralo?
Yehova u ita zwithu zwi mangadzaho a tshi shumisa muya wawe mukhethwa. Vhalani Phisalema 33:6 na 2 Petro 1:20, 21, ni kone u fhindula mbudziso i tevhelaho:
-
Yehova u dovha a shumisa hani muya wawe mukhethwa?
5. Nḓila ine Yehova a vha ngayo i a mangadza
Mushe o vha e mushumeli a fhulufhedzeaho wa Mudzimu, fhedzi o vha a tshi ṱoḓa u ḓivha Musiki wawe khwine. Mushe o vhudza Mudzimu a ri: “Ndi humbela uri u ite uri ndi ḓivhe nḓila dzau, uri ndi u ḓivhe.” (Ekisoda 33:13) Yehova o vhudza Mushe zwine A vha zwone. Vhalani Ekisoda 34:4-6, ni kone u fhindula mbudziso dzi tevhelaho:
-
Yehova o ḓiḓivhadza hani kha Mushe?
-
Ndi mini zwine na zwi takalela kha zwine Yehova a vha zwone?
6. Yehova u na ndavha na vhathu
Vhahevheru vhane vha vha vhathu vha Mudzimu, vho vha vhe phuli shangoni ḽa Egipita. Yehova o ḓipfa hani musi a tshi vhona vhathu vhawe vha tshi khou tambula? Thetshelesani AUDIO ni tevhele musi hu tshi khou vhaliwa kana ni vhale Ekisoda 3:1-10. Ni kone u fhindula mbudziso dzi tevhelaho.
-
Enea mafhungo a sumbedza uri Yehova u ḓipfa hani musi vhathu vha tshi tambula?—Vhalani vese 7 na 8.
-
Naa ni vhona u nga Yehova u a ṱoḓa u thusa vhathu zwa vhukuma? Ni vhona u nga a nga zwi kona? Ndi ngani ni tshi ralo?
7. Ri nga guda nga ha zwine Yehova a vha zwone kha zwe a zwi sika
Zwe Yehova a zwi sika zwi sumbedza zwine a vha zwone. Ṱalelani VIDIO. Vhalani Vharoma 1:20, ni kone u fhindula mbudziso i tevhelaho.
-
Zwe Yehova a zwi sika zwi dzumbulula mini nga ha zwine a vha zwone?
VHAṄWE VHATHU VHA AMBA URI: “Ri nga si kone u ḓivha Mudzimu ngauri a ri koni u mu vhona.”
-
Inwi ni ri mini?
-
Ndi ngani ni tshi ralo?
NO GUDA MINI?
Ri nga si kone u vhona Yehova. Nḓila ine a vha ngayo i a mangadza, nga mannḓa-mannḓa lufuno lune a vha nalwo.
Ni Kha Ḓi Zwi Humbula?
-
Ndi ngani ri sa koni u vhona Yehova?
-
Muya mukhethwa ndi mini?
-
Ndi zwifhio zwiṅwe zwine Yehova a vha zwone?
WANANI ZWO ENGEDZEAHO
Gudani zwo engedzeaho nga ha zwithu zwiṋa zwa ndeme zwi sumbedzaho zwine Yehova a vha zwone.
Gudani nga ha zwithu zwi sumbedzaho vhuṱanzi ha uri Yehova haho fhethu hoṱhe.
Vhonani uri ndi ngani Bivhili i tshi vhambedza muya mukhethwa na zwanḓa zwa Mudzimu.
Muṅwe munna a sa vhoni o vha a tshi humbula uri Mudzimu ha mu funi. Vhonani uri ndi mini zwo shandulaho nḓila ine a ḓipfa ngayo.
“Zwa Zwino Ndi Vho Vhona U Nga Ndi Nga Kona U Thusa Vhaṅwe” (Tshiingamo, 1 October 2015)