YOOSOMA 07

Mmusuwele vantxipale Yehova

PLAY

Nyuwo munoona weera Yehova ori hayi? Araaya munoona weera owo tooweraxa, ni-tho ori ottayi ni nyuwo ntoko itheneeri iraaya soorakamela wiirimu? Naari munoona weera owo khañyene mutthu, mene owera wa ephattuwelo, ntoko etari? Veekhaikhai Yehova taani? Biblya onnanleela mikhalelo sa Muluku, ni owo-tho onnathaliha weera Muluku onnoopwatthani.

1. Heeni nihinweraahu omoona Muluku?

Biblya oohima va Yohani 4:24 eeraka: “Muluku munepá.” Yehova khanono ethayi ni makhuva ntoko hiyo. Owo munepa onkhala wiirimu, nipuro nihinweraahu woona.

2. Mikhalelo heeni Yehova okhalannaawe?

Ekhaikhai weera khaninwera omoona Yehova. Mene naaxutteraka voohima sa Yehova, ninnoonelela weera owo mutthu orinono mikhalelo sooreera. Biblya onhima weera ‘Yehova onnatthuna exariya ni khanàttuwala anakharari awe.’ (Nsalmu 37:28) Owo-tho onnahima weera “Apwiya t’òsareya othunku ni òmorela ikharari,” naari neere ha, awo annaamorela ikharari atthu, otepaxawene ale anhaawa. (Yakobe 5:11) Yehova ori vakhiviru ni yaale a murima wowuma, “anyi onnàvuluxa yale a munepa woopwexiwa.” (Nsalmu 34:19, [34:18, Traducao do Novo Mundo] enoota) Nyuwo mwaasuwela weera soopaka sahu sinnamutapha Yehova? Moota heeni? Wakhala weera mutthu oothanla opaka yoonanara, Yehova onnamuripa murima. (Nsalmu 78:40, 41) Mene Yehova onnahakalala vaavo mutthu onthanlaawe opaka etthu yooreera.—Musome Miruku 27:11.

3. Yehova onoonihera hayi weera onnansiveliwa ni hiyo?

Mukhalelo woopatxera wa Yehova nsivelo. Mweekhaikhai Biblya onnathaliha weera “Muluku ti nsivelo.” (1 Yohani 4:8) Nnoowera woona nsivelo na Yehova, ohiya paahi mwa itthu ninsomaahu mBiblyani mene-tho moorweela mwa soopattuxiwa. (Musome Miteko 14:17.) Mwa ntakihero, muupuwele moota owo opankaawe. Owo oonivaha maitho weera niwereke woona ikoore sooreera, maaru weera niiweke itxipo ni nlumi weera nooneke osiva naatxaaka. Owo ontthuna weera hiyo nihakalaleke.

WEERA MUXUTTERE SINTXIPALE

Moone etthu Yehova onvarelaawe muteko weera apake itthu sootikiniha. Moone-tho moota Yehova onnooniheraawe mikhalelo sawe.

4. Munepa wootteela ti ikuru—sa mwaneene Muluku

Naavaraka muteko, ninvara ni matata. Ankha Yehova? Owo onvara ni eheeni? Owo onvarela muteko munepaawe wootteela. Atthu akina anaxuttihiwa weera munepa wootteela mutthu. Maxi Biblya onaxuttiha weera, munepa wootteela ikuru Muluku onvarelaawe muteko weera apake etthu ontthunaawe. Mmusome Luka 11:13 ni Miteko 2:17, avinyaka mutthekule ni epontu enttharelana:

Nohoona weera pooti ovekela munepa wootteela Muluku “onoonivaha.” Nto nyuwo munoona weera munepa wootteela mutthu naari ikuru sa mwaneene Muluku? Mwaha wa heeni munonaanyu hiiho?

Yehova onvarela muteko munepaawe wootteela weera apake itthu sootikiniha. Musome Nsalmu 33:6 ni 2 Pedru 1:20, 21, avinyaka mutthekule ni ipontu sinttharelana:

Mwa mukhalelo heeni Yehova onvarelaawe muteko munepaawe wootteela?

5. Yehova ookhalano mikhalelo sooreera

Mose aari murumeyi ororomeleya a Muluku. Mene naamwi vaareene hiiho, owo aatthuna waatxeerera omusuwela wawe mpattuxa. Mwa yeeyo, Mose aamweerela Yehova: “okithonyere ephiro á, wowisiso kòsuwele weyo.” (Ottimula 33:13) Mene, Yehova aamuleela Mose mikhalelo oraaweno. Mmusome Ottimula 34:4-6, ni avinyaka mutthekule ni ipontu sinttharelana:

Mikhalelo heeni sa Yehova Mose aaxuttenraawe?
Mukhalelo heeni wa Yehova onoosivelani?

6. Muluku onnaapwattha atthu

Aheberi yaari atthu a Muluku khalayi, ni awo yaakhala akaporo o Xipitu. Yehova oona hayi vaavo atthu awe yahaawaaya? Mmwiiwelele AUDIO ni mutthareke yaasommwaka naari mmusome Ottimula 3:1-10, ni avinyaka mutthekule ni ipontu sinttharelana.

AUDIO: Yehova annaapwattha atthu awe emaara yahaawaaya (2:45)

Yehova onoonela hayi aawoonaka atthu ehaawaka?—Moone iversiikulu 7 ni 8.
Nyuwo munuupuwela weera Yehova onnatthuna waakhavihera atthu? Munoona weera ookhalano owera woopaka eyo? Mwaha wa heeni munonaanyu hiiho?

7. Itthu sipattuxiwa sinnanxuttiha mikhalelo sa Yehova

Nnoowera oxuttera mikhalelo sa Yehova niwehexexaka itthu opattunxaawe. Moone EVIIDIYU. Avinyaka, mmusome Aroma 1:20, avinyaka mutthekule ni epontu enttharelana.