Kon ginhuhunahuna mo hi Jehova nga Dios, ano an imo naiimadyin? Harangdon ba hiya hinduro pero hirayo ha imo, sugad han mga bitoon ha hirayo nga galaksi? O ginhuhunahuna mo ba nga diri hiya tinuod nga persona pero gamhanan, sugad hin dalugdog? Ano gud ba nga klase hin persona hi Jehova? Pinaagi han iya Pulong, an Biblia, iginsusumat ni Jehova an pipira han iya kalidad, pati an iya gugma ha imo.

1. Kay ano nga diri naton nakikita an Dios?

“An Dios Espiritu.” (Juan 4:24) Hi Jehova waray lawas nga sugad han aton. Espiritu hiya nga naukoy ha langit, usa nga lugar nga diri naton nakikita.

2. Ano an pipira nga kalidad ni Jehova?

Diri naton nakikita hi Jehova, pero kon makilala naton hiya, hihigugmaon naton hiya kay tinuod hiya nga persona nga may mag-opay nga kalidad. An Biblia nasiring: “Hi Jehova nahigugma han hustisya, ngan diri niya babayaan an mga maunungon ha iya.” (Salmo 37:28) Hiya liwat “malumo hinduro magpalangga ngan maloloy-on,” labi na ha mga tawo nga nag-aantos. (Santiago 5:11) “Hi Jehova hirani ha mga ruba an kasingkasing; iya gintatalwas an mga nanluluya.” (Salmo 34:18, footnote) Ngan maaram ka ba nga nakakaapekto kan Jehova an aton mga ginbubuhat? Kon ginpipili han tawo nga magbuhat hin maraot, nasusubo hiya. (Salmo 78:40, 41) Pero kon ginbubuhat han usa an husto, nakakapalipay ito ha iya.—Basaha an Proberbios 27:11.

3. Paonan-o iginpapakita ni Jehova nga hinigugma kita niya?

An nangunguna nga kalidad ni Jehova amo an gugma. Ngani, “an Dios gugma.” (1 Juan 4:8) Iginpapakita ni Jehova an iya gugma, diri la pinaagi han Biblia kondi pinaagi liwat han mga butang nga iya ginhimo. (Basaha an Buhat 14:17.) Pananglitan, hunahunaa an iya pagkahimo ha aton. Gintagan kita niya hin abilidad nga makita an maghusay nga kolor, mabatian an magpakalilipay nga musika, ngan matilawan an magrasa nga pagkaon. Karuyag niya nga magin malipayon kita.

 DUGANG NGA USISAHA

5. Hi Jehova may magpakaruruyag nga mga kalidad

Hi Moises usa nga matinumanon nga magsiringba han Dios, pero karuyag niya nga mas makilala an iya Maglalarang. Salit hi Moises nagsiring ha iya: “Ipahibaro ha akon an imo mga dalan, basi makilala ko ikaw.” (Exodo 33:13) Sugad nga baton, iginsumat ni Jehova kan Moises an pipira han Iya mga kalidad. Basaha an Exodo 34:4-6, katapos, hisguti niyo ini nga mga pakiana:

• Ano nga mga kalidad ni Jehova an iya iginsumat kan Moises?

• Ano nga mga kalidad ni Jehova an naruruyagan mo gud?

 SUMARYO

Hi Jehova usa nga diri nakikita nga Espiritu nga may damu nga magpakaruruyag nga kalidad, labi na an gugma.

Repaso

• Kay ano nga diri naton nakikita hi Jehova?

• Ano an baraan nga espiritu?

• Ano an pipira han mga kalidad ni Jehova?