LESON 07
Zan̈ahary Karakory ma Jehovah Io?
Anao koa fa maharen̈y Jehovah zen̈y, ino raha avy an̈aty jerinao? Izy Zan̈ahary farany mahery, ke tsy mijery olo? Sa izy tsy manan̈a maha izy izy? Karakory marin̈y ma Jehovah io? Amy Baiboly ao Jehovah man̈ambara toetrinany. Koran̈iny ao koa fa Jehovah mikarakara anao.
1. Nan̈ino ma atsika tsy mahita Zan̈ahary?
“Zan̈ahary io Fan̈ahy.” (Jaona 4:24) Jehovah tsy manan̈a vatan̈a karaha nintsika. Izy tsy hitantsika, fotony izy mipetraka andan̈itry an̈y.
2. Ino sasany amy toetriny Jehovah?
Jehovah tsy hitantsika, fa atsika mety mianatra raha momba izy, ke ho tia izy, fotony izy tsara toetry. Baiboly mivolan̈a: “Jehovah tia rariny, ke izy tsy mety hiala olo tsy mivadiky aminany.” (Salamo 37:28) Jehovah koa “ten̈a be fitiavan̈a sady mamindra fô,” sirto aminolo mijaly. (Jakoba 5:11) “Jehovah marikitry olo torotoro fô, ary izy mamonjy lan̈iany olo kivy.” (Salamo 34:18) Jireny ma zay raha ataontsika? Ia. Atsika koa man̈ano ny ratsy, izy malahelo. (Salamo 78:40, 41) Fa atsika koa man̈ano ny tsara, izy ravoravo.—Vakia Ohabolana 27:11.
3. Akory ahitan̈a fa Jehovah tia atsika?
Fitiavan̈a io toetry ten̈a mampiavaka Jehovah. Koran̈iny Baiboly fa izy sady manan̈a fitiavan̈a, avio ‘izy lastio koa fitiavan̈a.’ (1 Jaona 4:8) Baiboly ndreky raha niasainy an̈ambarany amintsika fa izy ten̈a tia atsika. (Vakia Asan’ny Apostoly 14:17.) Ohatra amy zen̈y fomba niasany atsika. Nataony mahita kolera maro tsara oe atsika. Avio atsika maharen̈y hira ndreky mihina hanin̈y masiro. Tiany ho ravoravo atsika miain̈y.
ALEVA ONON̈O
Zahava ino raha ampiasainy Jehovah ahavitany raha maro mahagaga. Diniha amy zay ino toetrinany baka amy zen̈y.
4. Fan̈ahy masin̈y io angovony Zan̈ahary
Atsika mampiasa tan̈antsika izikoa fa miasa. Jehovah ndraiky mampiasa fan̈ahy masin̈inany izikoa fa miasa. Baiboly mivolan̈a fa fan̈ahy masin̈y io tsy olo fa angovony Zan̈ahary. Vakia Lioka 11:13 ndreky Asan’ny Apostoly 2:17, avio iaraha dinihin̈y fan̈ontanian̈a aby ty:
-
Zan̈ahary “han̈amia” fan̈ahy masin̈y lan̈iany olo mangataka izio aminany. Ke fahitanao zen̈y, fan̈ahy masin̈y io olo sa angovony Zan̈ahary? Nan̈ino?
Jehovah mampiasa fan̈ahy masin̈inany an̈anovan̈a raha maro mahagaga. Vakia Salamo 33:6 ndreky 2 Petera 1:20, 21, avio iaraha dinihin̈y fan̈ontanian̈a ty:
-
Ino aby raha sasany nampiasany Jehovah fan̈ahy masin̈inany?
5. Mbala misy toetry maro tsara hafa koa Jehovah
Mosesy ndray efa panompony Zan̈ahary tsy nivadiky taminany, izy mbala tihahay toetriny Jehovah fo. Ke ho Mosesy: “Ambarà zaho lalan̈anao, baka zaho mahay anao.” (Eksodosy 33:13) Namaly volan̈a Mosesy zen̈y Jehovah, ke nambarany izy toetrinany. Vakia Eksodosy 34:4-6, avio iaraha dinihin̈y fan̈ontanian̈a aby ty:
-
Ino aby toetriny Jehovah nivolan̈iny tamy Mosesy?
-
Ino amindro toetriny Jehovah io ten̈a tianao?
6. Jehovah mijery olo
Nisy lera iro hebreo olony Zan̈ahary aby io efa navy andevo ta Ezipty. Mba nijireny Jehovah edy iro tamy zen̈y? Alifasa AUDIO io avio areha amy Baibolinao, na vakia Eksodosy 3:1-10. Iaraha dinihin̈y amy zay fan̈ontanian̈a aby ambany io.
-
Izikoa tantara in̈y zahan̈a, Jehovah ma mijery olo mijaly?—Zahava andininy 7 ndreky 8.
-
Fahitanao izy ma Jehovah ten̈a tihan̈ampy olo, avio vitany ma zen̈y? Nan̈ino?
7. Raha niasainy Jehovah ahaizan̈a toetrinany
Baka amy raha niasainy Jehovah koa an̈ambarany toetrinany amintsika. Alifasa VIDEO io. Avio vakia Romanina 1:20, avio iaraha dinihin̈y fan̈ontanian̈a ambany io.
-
Ino aby toetriny Jehovah hitanao baka amy raha niasainy?
MISY OLO MIVOLAN̈A: “Zan̈ahary zen̈y, zay tany imboanao misy izy fo.”
-
Akory hevitrinao?
-
Nan̈ino anao mivolan̈a zen̈y?
INO RAHA NIANARANAO TATO?
Jehovah io tsy hitantsika. Tsara aby toetrinany jiaby, fa ten̈a mampiavaka izy fitiavan̈a.
Fan̈ontanian̈a Fameren̈ana
-
Nan̈ino atsika tsy mahita Jehovah?
-
Ino ma fan̈ahy masin̈y zen̈y?
-
Ino sasany amy toetriny Jehovah?
ZAHAVA
Diniha toetry efatra mampiavaka Jehovah.
“Karakory ma Zan̈ahary Zen̈y?” (Tilikambo Fiambesan̈a No. 1 2019)
Diniha ino antony ivolan̈ana fa tsy zay tany imboanao misy Jehovah fo.
“Zay Tany Imboanao ma Misy Zan̈ahary?” (Lahatsoratra aminy Internet)
Zahava nan̈ino Baiboly mivolan̈a fa fan̈ahy masin̈y io mira tan̈any Zan̈ahary.
“Ino ma Fan̈ahy Masin̈y Zen̈y?” (Lahatsoratra aminy Internet)
Nisy lelahy araiky gila, ke sarotro taminany nan̈eky fa Zan̈ahary mijery izy. Zahava ino raha nampiova izy.
“Haiko Izioty fa Kaiky Zaho mba Afaka Man̈ampy Olo” (Tilikambo Fiambesan̈a 1 Oktobra 2015)
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
