GURUY NI 07

Uw Rarogon Jehovah?

PLAY

Uw Rarogon Jehovah?

Nap’an ni ga ra lemnag Jehovah Got, ma mang e ma yib ngan’um? Gur, ga ma lemnag ni ir be’ nrib ga’ fan machane dabiyog ni ngam chugur ngak ya bod e pi t’uf u lan e lang nib palog rodad? Fa ga ma lemnag ni ir be’ nib gel gelngin, machane der ma lemnag be’? Ri uw rarogon Jehovah? Be weliy e Bible murung’agen pi fel’ngin Jehovah. Ku be yog ni ma lemnagem.

1. Mang fan ndabiyog ni ngad guyed Got?

“Got e Kan.” (John 4:24) Dariy e dowef rok Got ni bod gadad, ma ma par u tharmiy ni aram bangi ban’en ndabiyog ni ngad guyed.

2. Mang boch i fel’ngin Jehovah?

Yugu aram rogon ndabiyog ni ngad guyed Jehovah, machane faan gad ra nang murung’agen, ma aram e ra t’uf rodad ni bochan e riyul’ ni bay ma bay pi fel’ngin nrib manigil. Be gaar e Bible: “Somol e ba t’uf rok e tin nib mat’aw, ma der ma pag e piin ni yad ba yul’yul’ ngak, ni aram girdien.” (Psalm 37:28) Ku ir be’ nri “ma runguy ma ma taganan’ ngak e girdi’,” nib ga’ ni piin yad be gafgow. (James 5:11) “I Somol e ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay.” (Psalm 34:18, BT) Maku reb e, ga manang nrogon e ngongol rodad e rayog ni nge felfelan’nag Jehovah ara kirebnag laniyan’, fa? Be’ ni ma dugliy ni nge rin’ e tin nib kireb e ma kirebnag laniyan’. (Psalm 78:40, 41) Machane be’ ni ma rin’ e tin nib fel’ e ma felfelan’nag.—Mu beeg e Proverbs 27:11.

3. Uw rogon ni ma dag Jehovah ni gad ba t’uf rok?

T’ufeg e aram e bin th’abi lingagil i fel’ngin Jehovah. Bin riyul’ riy e, “Got e t’ufeg.” (1 John 4:16) Gathi kemus ni ma m’ug e t’ufeg rok Jehovah u daken e Bible, ya ku ma m’ug u daken e tin ke sunmiy. (Mu beeg e Acts 14:17.) Am lemnag rogon ni ke sunmiydad. Ke sunmiydad nrayog ni ngad guyed ramaen ban’en, ma gad rung’ag e musik, ma gad ri’ lamen e ggan nib manigil. Baadag ni ngad felfelan’gad ko yafos rodad.

KUM FIL BOCH BAN’EN U MURUNG’AGEN

Mu fil rogon ni ma rin’ Jehovah boch ban’en ni yira ngat ngay. Ngemu’ mag guy rogon ni ma dag ngodad pi fel’ngin nrib manigil.

4. Gelngin Got nib thothup e aram gelngin ni ma maruwel

Ma fanay Jehovah gelngin nib thothup ni bod rogon ni gad ma fanay pa’dad ni ngad rin’ed boch ban’en. Be yog e Bible ni gelngin Got nib thothup e aram e re gelngin ni ma fanay Got ni nge rin’ boch ban’en ngay. Machane bay boch e girdi’ ni yad ma lemnag ni gelngin Got nib thothup e aram be’. Mu beegew e Luke 11:13 nge Acts 2:17, mi gimew weliy e fulweg ko gal deer ni baaray:

Ra “puog” Got gelngin nib thothup nga daken e piin yad ra ning ngak. Faanra arrogon, me ere ga be lemnag ni gelngin Got nib thothup e aram gelngin ni ma maruwel fa yugu ban’en? Mang fan ni ka mog ni arrogon?

Ma fanay Jehovah gelngin nib thothup ni nge rin’ boch ban’en ni yira ngat ngay. Mu beegew e Psalm 33:6 nge 2 Peter 1:20, 21, mi gimew weliy e fulweg ko re deer ni baaray:

Mang boch e kanawo’ ni ke fanay Jehovah gelngin nib thothup riy?

5. Rib manigil pi fel’ngin Jehovah

Moses e ir reb e tapigpig rok Got nib yul’yul’, machane baadag ni ngki nang boch ban’en u rarogon e En Ke Sunmiy. Ere yog ngak ni gaar: “Ngam weliy ngog e tin ni kam lemnag ni ngam rin’, nge yog ni gu nang lanin’um.” (Exodus 33:13) Ere yog Jehovah pi fel’ngin ngak Moses. Mu beegew e Exodus 34:4-6, mi gimew weliy e fulweg ko gal deer ni baaray:

Mang boch i fel’ngin Jehovah ni weliy ngak Moses?
Bin ngan ko pi fel’ngin Jehovah e ri ga baadag?

6. Ma lemnag Jehovah e girdi’ rok

Piyu Israel e yad e girdi’ rok Got, ma ur moyed u Egypt ni yad e sib. Uw rogon u wan’ Jehovah e gafgow ni ur ted? Mu playnagew e re AUDIO ney mi gimew yaliy u Bible romew, ara mu beegew e Exodus 3:1-10. Tomuren mi gimew weliy e fulweg ko pi deer ni baaray.

AUDIO: Jehovah Cared About Their Suffering (2:45)

Mang e be tamilangnag e re thin ney ngom u murung’agen rogon ni ma lemnag Jehovah e gafgow ni ma tay e girdi’?—Mu guy e verse 7 nge 8.
Ga be lemnag ma ri baadag Jehovah ni nge ayuweg e girdi’ maku rayog rok ni nge rin’, fa? Mang fan ni ka mog ni arrogon?

7. Rayog ni ngad filed murung’agen pi fel’ngin Jehovah ko tin ke sunmiy

Ma dag Jehovah pi fel’ngin u daken e tin ke sunmiy. Mu yaliyew e re VIDEO ney. Ngemu’ mi gimew beeg e Roma 1:20, mi gimew weliy e fulweg ko re deer ni baaray.