WIRIKAPAI 07

Gini Ngbatunga Boro Nga Yekova?

SI TONA MANGASUNGE

Ho mo aberãpa Yekova Mbori ni, ginipai naye ku berãro yo? Ya mo mo nabihe nga ko nga iiriwo boro, ono ki du tuturũ tiro, wakina agu akerekuru mo abira tuturũ ku ariyo gbe? Watadu mo nabiko ni gu boro du na bakere ome, ono ka ko adunga na wene asino ya na nasumbo kurii aboro wakina gumba? Gini ngbatunga boro nzunzu nga Yekova? Yekova ima yugo bete asinoko rogo Fugoko nga Baibiri na agu apai ko aidaha tipa ro.

1. Tipagine ani arengbanga ka bi Mbori ti ni ya?

‘Mbori nga Toro.’ (Yoane 4:24) Yekova na kpoto tiko wa gaani te. Ko nga Toro naraka ngbangbaturũ yo, nga gu ba ka bangirani abingo he ku rogoho ya.

2. Gini bete asino du ti Yekova?

Wa vura duhe nga ani abingo Yekova te, ko nga ndikidi boro du na agu asino tiko nasako ko ngba ti agu aboro iniko. Baibiri naya: “Yekova nakpi nyemu ruru sarangbanga; ko ambú nga pa gako ziazia aboro te.” (Atambuahe 37:28) Ko a ‘na bakere nunga ti ko, na bakere inapai,’ gbe fu agu aboro narungo. (Yakoba 5:11) “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” (Atambuahe 34:18) Na ya mo mo iningo gupai nga gaani mangapai na kina maapai kurii Yekova? Gu boro nasia ka manga gbegberẽ apai naba gberãrago ti ko. (Atambuahe 78:40, 41) Ono gu boro nasia ka manga gupai du ni ruruhe nasa ngbarago ti ko.—Mo gedi Asanza 27:11.

3. Waigu Yekova ayugo gupai nga ko ima kpinyemu rani?

Bangua sino Yekova nga nyemuse. Nirengo, ‘Mbori nga nyemuse.’ (1 Yoane 4:8) Yekova nayugo gako nyemuse furani angianga kina rogo Baibiri yo sa ya, ono rogo agu ahe yo ko akusihe. (Mo gedi Amokedi 14:17.) Ani bingo kpiapai ti wai Yekova akusi rani. Ko akusi rani na gu rengba nga ani bi wene arangi, ani gi wene woro amanzigo, na ani ngba be wene ariahe. Ko naida ani gbia ngbarago rogo raka yo.

MO WIRIKI KURA DUNGU APAI

Mo wirikipai tipa guhe Yekova amangasunge na ni tipa ka manga iiriwoapai. Fuo gure, mo ki bingo wai Yekova ayugo gako wene asino.

4. Ziazia toro nga ga Mbori zaaza ome mangaapai

Kina wai ani amangasunge na berani tipa ka manga apai, kinawo a Yekova amangasunge na ziazia toro. Baibiri nayugo gupai nga ziazia toro nga boro te, ono si nga gu ome Mbori amangasunge na ni tipa ka manga apai. Mo gedi Ruka 11:13 na Amokedi 2:17, na tifuoho, mo ki sakipai tipa agi asanahe re:

Mbori nika ‘uka’ gako ziazia toro kurii agu aboro nasanako tipaha. Sidu, ya mo mo naberãha nga ziazia toro nga boro, watadu ga Mbori zaaza ome mangaapai? Tipagine mo apehe ti ni wo?

Yekova namangasunge na gako ziazia toro tipa ka manga iiriwoapai. Mo gedi Atambuahe 33:6 na 2 Petero 1:20, 21, na tifuoho, mo ki sakipai tipa gi sanahe re:

Gini bete agene Yekova namangisunge na gako ziazia toro ngbaha?

5. Yekova na wene asino tiko

Moize angia ruru irisimbori, ono ko aaida ka ino Bakusiko wenengai. Sidu, Moize aya fuko: “Mo yúgu gamo agene fere awere ya mi ini ro.” (Gate 33:13) Ni karagapai kuti gipai re, Yekova ayugu gini ngbatunga boro nga ko fu Moize. Mo gedi Gate 34:4-6, na tifuoho, mo ki sakipai tipa agi asanahe re:

Gini ngbatunga asino Yekova ko ayuguhe fu Moize?
Gini Sino Yekova ngba gbe tiro?

6. Yekova naberãpa aboro aberã

Ga Mbori aboro nangia aEbere angia akanga Ezipeta yo. Waigu Yekova adu ho i aarungo ni? Mo bi gu DEDE WORO FUGO re na kini pekefuoho, watadu ka geda Gate 3:1-10. Na tifuoho, mo ki sakipai tipa agu asanahe ngbe fuoho.

DEDE WORO FUGO: Yekova Aaberãpa Gayo Rungo Aberã (2:45)

Ginipai gi pangbanga re ayugoho foro nibipa wai Yekova abi agu arungo namanga aboro?—Mo bi veresi 7 na 8.
Ya mo mo nabihe nga Yekova nzunzu na nyemu ka undo aboro, na ya mo ko na rengba ka mangaha wo? Tipagine mo abihe tini wo, watadu tipagine mo abingo ho tini wo ya?

7. Agu ahe Yekova akusihe nayugo gako wene asino

Yekova nayugo gako wene asino rogo agu ahe yo ko akusihe. Mo bi gu VIDIO re. Tifuoho, mo gedi ARomo 1:20, na mo ki sakipai tipa gu sanahe ngbe fuoho.