ISIFUNDO 07
Unjani UJehova?
Lapho ucabanga ngoJehova uNkulunkulu, yini efika engqondweni? Ingabe ucabanga ukuthi uyamangalisa, kodwa ukude le njengezinkanyezi ezisemkhathini? Noma umbona enamandla amakhulu kodwa engenabo ubuntu, njengesiphepho esihambisana nokuduma kwezulu? Unjani ngempela uJehova? Esebenzisa iZwi lakhe iBhayibheli uJehova uveza ezinye zezimfanelo zakhe, aphinde akutshele ukuthi uyakukhathalela.
1. Kungani singamboni uNkulunkulu?
“UNkulunkulu unguMoya.” (Johane 4:24) UJehova akanawo umzimba ofana nowethu. UnguMoya ohlala ezulwini, indawo esingayiboni.
2. Yiziphi ezinye zezimfanelo zikaJehova?
Nakuba uJehova engabonakali, unguMuntu ongokoqobo onezimfanelo ezibenza bamthande labo abamaziyo. IBhayibheli lithi: “UJehova uyabuthanda ubulungisa, ngeke abashiye abantu bakhe abaqotho.” (IHubo 37:28) “Unothando olukhulu nesihe,” ikakhulukazi kubantu abahluphekayo. (Jakobe 5:11) “UJehova useduze nalabo abaphukile enhliziyweni; uyabasindisa abadangele.” (IHubo 34:18) Ingabe bewazi ukuthi izinto esizenzayo zingamenza ajabule noma adumale? Umuntu okhetha ukwenza izinto ezimbi umzwisa ubuhlungu uJehova futhi uyamdumaza. (IHubo 78:40, 41) Kodwa umuntu owenza okulungile uyamjabulisa.—Funda izAga 27:11.
3. UJehova ubonisa kanjani ukuthi uyasithanda?
Imfanelo kaJehova evelele kunazo zonke uthando. Empeleni, “uNkulunkulu uluthando.” (1 Johane 4:8) UJehova usembulela uthando lwakhe, hhayi nje kuphela eBhayibhelini kodwa nasezintweni azidalile. (Funda izEnzo 14:17.) Ngokwesibonelo, cabanga indlela asenze ngayo. Usenze sakwazi ukubona imibala emihle, ukuzwa umculo omnandi nokunambitha ukudla okwehla esiphundu. Ufuna sikujabulele ukuphila.
FUNDA OKWENGEZIWE
Funda ukuthi uJehova uzenza kanjani izinto ezinhle. Ngemva kwalokho ufunde indlela uJehova asibonisa ngayo izimfanelo zakhe ezinhle.
4. Umoya ongcwele ungamandla uNkulunkulu awasebenzisayo
Njengoba nje sisebenzisa izandla zethu ukuze sisebenze, noJehova usebenzisa umoya wakhe ongcwele. IBhayibheli liveza ukuthi umoya ongcwele awuyena umuntu, kodwa ungamandla uNkulunkulu awasebenzisayo ukuze enze izinto. Fundani uLuka 11:13 nezEnzo 2:17, bese nixoxa ngale mibuzo:
-
UNkulunkulu ‘uzothululela’ umoya wakhe ongcwele kulabo abawucelayo. Ngakho ucabanga ukuthi umoya ongcwele ungumuntu, noma ungamandla uNkulunkulu awasebenzisayo? Kungani usho kanjalo?
UJehova usebenzisa umoya wakhe ongcwele ukuze enze izinto ezinhle. Fundani iHubo 33:6 neyesi-2 Petru 1:20, 21, bese nixoxa ngalo mbuzo:
-
Yiziphi ezinye zezindlela uJehova asebenzise ngazo umoya wakhe ongcwele?
5. UJehova unobuntu obukhangayo
UMose wayeyinceku kaNkulunkulu ethembekile, kodwa wayefuna ukwazi okwengeziwe ngoMdali wakhe. Ngakho wathi kuye: “Ngenze ngazi izindlela zakho, ukuze ngikwazi.” (Eksodusi 33:13) UJehova wabe esetshela uMose ukuthi unguMuntu onjani. Fundani u-Eksodusi 34:4-6, bese nixoxa ngale mibuzo:
-
Yini uJehova ayitshela uMose mayelana nobuntu baKhe?
-
Iyiphi imfanelo kaJehova oyithanda kakhulu wena?
6. UJehova uyabakhathalela abantu
Abantu bakaNkulunkulu abangamaHebheru babeyizigqila eGibhithe. Ubunzima ababebhekene nabo bamthinta kanjani uJehova? Dlalani OKULALELWAYO bese nihambisana nakho, noma nifunde u-Eksodusi 3:1-10, bese nixoxa ngemibuzo elandelayo.
-
Le ndaba ikutshela ukuthi uJehova uzizwa kanjani lapho ebona abantu besebunzimeni?—Bheka ivesi 7 no-8.
-
Ucabanga ukuthi uJehova uyafuna ngempela ukubasiza abantu nokuthi uyakwazi ukubasiza? Kungani usho kanjalo?
7. Lokho indalo kaJehova esifundisa kona ngobuntu bakhe
UJehova wembula izimfanelo zakhe ezintweni azidala. Dlalani IVIDIYO. Ngemva kwalokho, fundani eyabaseRoma 1:20, bese nixoxa ngombuzo olandelayo.
-
Yiziphi izimfanelo zikaJehova ozibonayo ezintweni azenzile?
ABANYE ABANTU BATHI: “UNkulunkulu akayena umuntu, umane nje ungamandla akuyo yonke indawo.”
-
Wena ucabangani?
-
Kungani uzizwa kanjalo?
UKUBUYEKEZA
UJehova unguMoya, unezimfanelo eziningi ezinhle, ikakhulukazi uthando.
Ufundeni?
-
Kungani singeke sikwazi ukubona uJehova?
-
Uyini umoya ongcwele?
-
Yiziphi ezinye zezimfanelo zikaJehova?
HLOLA OKWENGEZIWE
Funda okwengeziwe ngezimfanelo zikaJehova ezine eziyinhloko.
Funda ubufakazi bokuthi uJehova akekho kuzo zonke izinto.
“Ingabe UNkulunkulu Ukuyo Yonke Indawo?” (isihloko esikuyi-Inthanethi)
Funda ukuthi kungani iBhayibheli libiza umoya ongcwele ngokuthi izandla zikaNkulunkulu.
Kwakunzima ngendoda ethile eyimpumputhe ukuba ikholelwe ukuthi uNkulunkulu uyayithanda. Thola ukuthi yini eyayenza yashintsha umqondo.
“Manje Sengingakwazi Ukusiza Abanye” (INqabayokulinda, Okthoba 1, 2015)
Okunye Ongase Ukuthande
IMIBUZO EVAME UKUBUZWA
Siyini Isifundo SeBhayibheli Esilungiselelwe OFakazi BakaJehova?
Kulolu hlelo lwamahhala olulungiselelwe oFakazi BakaJehova, ungasebenzisa noma yiliphi iBhayibheli. Ungesabi ukumema bonke abakini nabangani ukuze bakujoyine.
