LISON 08

Ou Sa Fè Jan Épi Jéhova

JWÉ

Jéhova vlé’w vini konnèt li pli mèyè. Pouki i vlé’w fè sa? Paski Bondyé sav pli ou apwann konsèné kawaktè’y, mannyè i ka twété moun, èk sa i vlé pou ou, sé pli ou kay vlé fè jan épi’y. Mé, ès ou sa vwéman fè jan épi Bondyé? (Li Sam 25:14.) Kisa ou sa fè pou’w fè jan épi Bondyé? Bib-la ka ban nou wépons-lan pou sé kwèsyon sala, èk i ka moutwé nou pouki i tèlman enpòtan pou fè jan épi Bondyé.

1. Kisa Jéhova ka envité’w pou fè?

Lévanjil-la an Jémz 4:8 ka di nou: “vini pwé Bondyé èk i menm kay vini pwé’w.” Kisa sa vlé di? Sa vlé di, Jéhova ka envité’w pou fè jan épi’y. Mé adan moun ka twouvé i difisil pou fè jan épi Bondyé paski yo pa sa wè’y. Kanmenm, an Bib-la, Jéhova ka di nou tout sa nou bizwen konnèt konsèné kawaktè’y. Konsa, sa sa édé nou pou fè jan épi’y. Lè nou li Bib-la, nou ka vini pli pwé Bondyé, magwé nou p’òkò janmen wè’y.

2. Pouki Jéhova sé pli bon jan-an ou sa ni?

La pa ni pyèsonn ki sa enmen’w pli pasé Jéhova enmen’w. Jéhova vlé’w ni lakontantman, épi i vlé’w pwédyé ba li népòt lè ou bizwen èd. Anfen, lévanjil-la ka di nou: “tout bagay ou ni ki ka ba’w mal tèt, mété’y an lanmen [Bondyé], paski i ka gadé apwé’w.” (1 Pita 5:7) Jéhova toujou pawé pou sipòté, pou konfòté, èk pou kouté jan’y.—Li Sam 94:18, 19.

3. Kisa Jéhova vlé nou fè pou nou sa fè jan épi’y?

Jéhova enmen tout moun. Mé, ‘bon [jan’y sé moun ki ka fè sa ki] dwèt.’ (Pwovèb 3:32) Jéhova vlé jan’y fè sé bagay-la i di ki bon, èk i pa vlé yo fè sa i di ki pa bon. Mé adan moun ka di, yo pa sa fè tout sé bagay-la Bondyé ka mandé yo pou fè-a. Kanmenm, Jéhova sé yon Dyé ki ni mizèwikòd. Alò, i ka aksèpté tout moun ki vwéman enmen’y, épi ki ka fè fòs kò yo pou obéyi’y.—Sam 147:11; Twavay 10:34, 35.

ANNOU APWANN PLI

Apwézan, annou apwann pli konsèné sa ou sa fè pou vini jan épi Jéhova. Osi, ou kay apwann pouki Jéhova sé pli bon jan-an ou sa ni.

4. Abrahanm té bon jan épi Jéhova

Abrahanm té ni yon lòt non. Yo té ka kwiyé’y Abranm. Listwa’y an Bib-la ka édé nou pou konpwann kisa i vlé di pou vini jan épi Bondyé. Annou li yon wakont konsèné Abrahanm an Jennésis 12:1-4. Èk apwé, nou kay kozé asou sé kwèsyon sala:

Kisa Jéhova té di Abrahanm pou fè?
Kisa Jéhova té pwonmèt pou bay Abrahanm?
Silon Jennésis 12:4, kisa Abrahanm té fè?

5. Kisa Jéhova ka mandé jan’y pou fè

Lè jan nou ni bèl kawaktè èk bon atitid nou ka apwésyé sa.

Ki bèl kawaktè ou ka apwésyé an jan’w?

Annou li 1 Jan 5:3, èk apwé nou kay kozé asou kwèsyon sala:

Kisa Jéhova vlé jan’y fè?

Si nou vlé obéyi Jéhova, nou ni pou chanjé vyé atitid èk vyé kawaktè nou ni. Annou li Izaya 48:17, 18, èk apwé nou kay kozé asou kwèsyon sala:

Pouki Jéhova ka mandé jan’y pou fè chanjman an atitid yo, èk an kawaktè yo?

Yon bon jan ka ankouwajé nou pou fè bagay ki ka pwotéjé nou, èk ki an bennéfis nou. Jéhova ka fè menm bagay-la pou jan’y

6. Kisa Jéhova ka fè pou édé jan’y

Jéhova ka édé jan’y pou aji épi difikilté yo ni. Annou gadé VIDÉYO-A, Pa Dé Bagay Jéhova Ja Fè Ban Mwen èk apwé nou kay kozé asou kwèsyon sala:

VIDÉYO: Pa Dé Bagay Jéhova Ja Fè Ban Mwen (3:20)

An ki mannyè Jéhova té édé madanm-lan an vidéyo-a?

Annou li Izaya 41:10, 13, èk apwé nou kay kozé asou sé kwèsyon sala:

Kisa Jéhova ka pwonmèt pou fè ba tout jan’y?
Ès ou kwè Jéhova sé on bon moun pou’w ni kon an jan? Pouki ou kwè sa?

Bon jan ka édé’w lè ou bizwen èd. Menm kon an bon jan, Jéhova kay édé’w osi

7. Si nou vlé fè jan épi Jéhova nou ni pou palé épi’y èk nou ni pou kouté’y

Lè dé moun ka toujou palé épi yonn a lòt, yo ka vini pli pwé. An menm mannyè-a si nou ka toujou fè tan pou palé épi Jéhova, èk nou ka toujou kouté’y, nou kay vansé pli pwé’y. Annou li Sam 86:6, 11, èk apwé nou kay kozé asou sé kwèsyon sala: