Jehovah mito ni inge en maber. Pingo? En geno ni ka imedde ki pwonyo lok i kom kite, kit ma en timo kwede jami, kacel ki yubbe, ci mitini me bedo lareme bene bidongo. Tika itwero bedo larem Lubanga? (Kwan Jabuli 25:14.) Ngo ma itwero timo wek idok lareme? Baibul gamo lapeny magi dok nyuto pingo bedo larem Jehovah aye obedo wat ma pire tek loyo ma itwero bedo kwede.

1. Ngo ma Jehovah lwongi me timone?

“Wunyik cok bot Lubanga, ci en bene binyiko cok botwu.” (Yakobo 4:8) Meno tyen lokke ngo? Jehovah tye ka lwongi me doko lareme. Jo mogo gitwero nongo ni tek adada me ye ni giromo doko lurem Lubanga pien pe gitwero neno kom Lubanga. Kadi bed kit meno, Jehovah oketo i Lokke, Baibul, jami ducu ma mitte ni wange madok i kom kite wek wanyik cok bote. Ka wakwano kwena pa Lubanga ma kicoyo botwa i Baibul, ci lirem i kinwa ki Jehovah dongo matek kadi bed pe wanene.

2. Pingo Jehovah aye obedo larem maber loyo ma itwero bedo kwede?

Pe tye ngat mo ma mari loyo Jehovah. En mito ni ibed ma cwinyi yom dok iyeny kony ki bote i cawa mo keken ma imito. Itwero ‘keto parri ducu i kome, pien en paro piri.’ (1 Petero 5:7) Jehovah tye atera kare ducu me konyo lureme, kweyo cwinygi, kacel ki winyo lokgi.—Kwan Jabuli 94:18, 19.

3. Ngo ma Jehovah mito ki bot lureme?

Jehovah maro dano ducu, ento En “bedo larem jo ma gilwore.” (Jabuli 25:14) Jehovah mito ni lureme gutute me timo jami ma en neno ni ber dok gugwokke ki timo jami ma en neno ni rac. Jo mogo gitamo ni pe gitwero kwo ma lubbe ki rwom pa Jehovah me gin maber ki gin marac. Kadi bed kit meno, Jehovah lakica adada. En jolo jo ducu ma gimare dok gitute ki kerogi ducu me yomo cwinye.—Jabuli 147:11; Tic pa Lukwena 10:34, 35.

 NONG NGEC MATUT

4. Abraim onongo obedo larem Jehovah

Lok ma i Baibul madok i kom Abraim (ma bene kilwonge ni Abram) konyowa me niang gin ma bedo larem Lubanga kwako. Kwan lok i kom Abraim i Acakki 12:1-4. Ci wunyam lapeny magi:

• Gin ango ma Jehovah owaco ki Abraim ni otim?

• Jehovah ocikke bote nining?

• Abraim odok nining i kom lok pa Jehovah man?

 5. Gin ma Jehovah mito ki bot lureme

Wan ducu pol kare wamito gin mo ki bot luremwa.

• In imito ni luremi guteri nining?

Kwan 1 Jon 5:3, ci wunyam lapeny man:

• Ngo ma Jehovah mito ki bot lureme?

Ka wamito bedo luwiny bot Jehovah, twero mitte ni walok kitwa nyo kit ma watimo ki jami mogo. Kwan Icaya 48:17, 18, ci wunyam lapeny man:

• Pingo Jehovah penyo lureme me timo alokaloka mogo i kwogi?

6. Gin ma Jehovah timo me konyo lureme

 WOT WIYE WIYE

Jehovah mito ni ibed Lareme, dok en bikonyi me nyiko cok bote.

Ngo ma ipwonyo?

• Jehovah konyo lureme nining?

• Pingo Jehovah waco ki lureme ni gutim alokaloka i kwogi?

• Tika itamo ni Jehovah keto gingi tutwal i kom lureme? Pingo itamo kit meno?