Jehová ayüi tami quimabel, ¿chemu? Quidu quimni tübachi dungu: quimülmi iñingen quidu, doi hueniyeabüimi. Doi quimabüimi tañi chumngen, ñi chumquen ca ñi chumal. Huelu, ¿rüb hueniyepeabüiñ mai Chau Dio? (Papiltunge Salmo 25:14). ¿Chumabüimi tami hueniyeabel Chau Dio? Biblia llouqui tübachi ramtun. Cabei eipi chemu ñi manelbalngen hueniyeabel Chau Dio.

1. ¿Chem eipiqueimu Jehová tami bemal?

“Bülconmün Chau Ngünechen mu, bei quidu bülconai ta eimün mu” (Santiago 4:8). ¿Chem eipieiñmu beichi dungu? Jehová ayüqui tami hueniyeabel. Iñi no ume pequelabi Chau Dio, beimu raquiduamabüiñ pepi hueniyelaabüiñ. Huelu quidu elcünoleiñmu Biblia, tañi quimal com iñchiñ iñingen ca chumngen quidu. Papiltuliiñ Biblia doi cüme hueniyeabüiñ Jehová, penobiliiñ ume.

2. ¿Chemu Jehová doi cüme tami hueningeabüi?

Jehová müna piuqueyeimu. Beimu ayüqui tami ayüucüleal. Cüpa incaqueimu. ‘Elcünoabüimi Chau Ngünechen mu com tami bill raquiduam, quidu am piuqueyenetu eimi’ (1 Pedro 5:7). Jehová nehuentuquebi, allcütuquebi ca quelluquebi (incaquebi) tañi pu hueni (papiltunge Salmo 94:18, 19).

3. Jehová, ¿chem ayüqui ñi bemal tañi pu hueni?

Jehová piuqueyebi com pu che, huelu “doi hueniyequebi pu che nor piuquengelu” (Proverbios 3:32). Jehová eipiqui chem tañi cümen cam chem tañi cümenon, beimu quidu ayüqui pu hueni ñi bemal cümeque dungu. Huelu ayüquelai ñi bemal hueyaque dungu. Quiñeque che raquiduamquingün, “iñche pepil-laan ñi bemal Jehová ñi eipiquetu”, huelu belelai. Rüb bemliiñ ñi eipiquetu ca piuqueyebiliiñ, Jehová hueniyeaiñmu (Salmo 147:11; Hechos 10:34, 35).

 DOI CÜME QUIMNGE

4. Abrahán, Jehová ñi hueni

Biblia mu, Abrahán (Abrán) ñi upan quimeleleiñmu chumabüi Jehová ñi pu hueni. Papiltoiñ Abrahán ñi upan Génesis 12:1-4. Papiltungele hula ngütramcaabiiñ tübachi cüla ramtun:

• Jehová, ¿chem eipibi tañi bemal Abrahán?

• Abrahán, ¿chem eipieyu Jehová tañi eluatu?

• Beimu, ¿chumi Abrahán?

5. ¿Chem ayüqui ñi bemal Jehová ñi pu hueni?

Com iñchiñ ayüquiiñ taiñ pu hueni ñi bemal cümeque dungu iñchiñ mu.

• Eimi, ¿chem ayüabüimi ñi bemal tami pu hueni eimi mu?

Papiltoiñ 1 Juan 5:3. Papiltungele hula ngütramcaabiiñ tübachi ramtun:

• Jehová, ¿chem ayüqui ñi bemal ñi pu hueni?

Taiñ mupitobel (beyentuabel) Jehová, inaabiñ quidu ñi ngülam tañi elcünotol com huedaque dungu. Papiltoiñ Isaías 48:17, 18. Papiltungele hula ngütramcaabiiñ tübachi ramtun:

• Jehová, ¿chemu eipiquebi tañi pu hueni inaal ñi ngülam tañi elcünotol ñi huedaque dungu?

 6. Jehová quelluquebi tañi pu hueni

 CHEM PEIÑ TÜBAMU

Jehová cüpa hueniyeaimu ca quelluaimu tami bülconal quidu mu.

Chem quimeleleiñmu tüba

• Jehová, ¿chumngechi incaquebi tañi pu hueni?

• Jehová, ¿chemu eipiquebi tañi pu hueni inaal ñi ngülam tañi elcünotol ñi hueyaque dungu?

• Jehová, ¿eipiquepi mai ñi bemal cüdaungechi dungu ñi pu hueni? ¿Chem pimi? ¿Chemu?