ISAMBILILO 08
Kuti Mwaba Cibusa wa kwa Yehova
Yehova alafwaya mwamwishiba bwino. Mulandu nshi? Enekela ukuti nga twaishiba imibele yakwe, ifyo acita ifintu ne fyo afwaya ukutucitila, kuti twalafwaisha ukuba ifibusa fyakwe. Bushe cine cine kuti mwaba cibusa wa kwa Lesa? (Belengeni Amalumbo 25:14.) Finshi mufwile ukucita pa kuti mube cibusa wa kwa Lesa? Baibolo ilasuka aya mepusho, kabili ilalondolola no mulandu bucibusa twingakwata na Yehova bwacindamina ukucila bucibusa ubo twingakwata no muntu uuli onse.
1. Finshi Yehova afwaya ukuti mucite?
“Palameni kuli Lesa, na o akapalama kuli imwe.” (Yakobo 4:8) Bushe aya amashiwi yalola mwi? Yehova afwaya ukuti mube cibusa wakwe. Nalimo bamo kuti cabakosela ukusumina ukutila kuti baba cibusa wa kwa Lesa, pantu tabamumona. Na lyo line, Yehova alitweba mu Cebo cakwe Baibolo fyonse ifingalenga twaishiba imibele yakwe pa kuti tube ifibusa fyakwe. Nga tulebelenga ifyo Yehova atweba mu Baibolo, bucibusa bwesu na ena bulakoselako nangu ca kuti tatwatala atumumonapo.
2. Cinshi twingalandila ukuti Yehova e cibusa umusuma sana uo mwingakwata?
Takwaba uwamutemwa ukucila ifyo Yehova amutemwa. Afwaya muleba ne nsansa no kulapepa kuli ena pa kuti alemwafwa. Kuti ‘mwapoosa amasakamika yenu yonse pali ena, pantu asakamana imwe.’ (1 Petro 5:7) Yehova ali-iteyanya ukwafwa, ukusansamusha, no kukutika ku fibusa fyakwe.—Belengeni Amalumbo 94:18, 19.
3. Finshi Yehova enekela ifibusa fyakwe ukulacita?
Yehova alitemwa abantu bonse, “lelo abalungama e baba bacibusa bakwe.” (Amapinda 3:32) Yehova enekela ifibusa fyakwe ukulaesha na maka ukulacita ifintu ifyo amona ukuti fisuma, no kukanalacita ifyo amona ukuti fibi. Abantu bamo bamona ukutila te kuti bakumemo ukulacita fyonse ifyo Yehova amona ukuti fisuma, kabili te kuti bakumanishe ukutaluka kuli fyonse ifyo amona ukuti fyalibipa. Nomba Yehova alalangulukilako. Bonse abamutemwa kabili abesha na maka ukulacita ifimusekesha, alabasuminisha ukuba ifibusa fyakwe.—Amalumbo 147:11; Imilimo 10:34, 35.
SAMBILILENI NA FIMBI
Sambilileni na fimbi pa fyo mwingacita pa kuti mube cibusa wa kwa Yehova, kabili moneni ico twingalandila ukuti Yehova e cibusa umusuma sana uo mwingakwata.
4. Abrahamu ali ni cibusa wa kwa Yehova
Ilyashi lya mu Baibolo ililanda pali Abrahamu (uo baleita no kuti Abramu) lilalenga twaishiba ifyo twingacita pa kuti tube ifibusa fya kwa Lesa. Belengeni ilyashi ililanda pali Abrahamu pa Ukutendeka 12:1-4. Lyena lanshanyeni aya mepusho:
-
Cinshi Yehova aebele Abrahamu ukucita?
-
Finshi Yehova alaile Abrahamu?
-
Bushe Abrahamu acitile shani ilyo Yehova amwebele ifya kucita?
5. Ifyo Yehova enekela ifibusa fyakwe ukulacita
Ilingi line tulenekela ifibusa fyesu ukutucitilako fimo.
-
Finshi fimo ifyo mwingatemwa ifibusa fyenu ukumucitila?
Belengeni 1 Yohane 5:3, lyena lanshanyeni ici cipusho:
-
Finshi Yehova enekela ifibusa fyakwe ukulacita?
Pa kuti tuleumfwila Yehova, nalimo tulingile ukwalula imibele yesu nelyo ukwaluka muli fimo. Belengeni Esaya 48:17, 18, lyena lanshanyeni ici cipusho:
-
Cinshi Yehova ebela ababa ifibusa fyakwe ukwaluka muli fimo?
Cibusa musuma alatwebako pa fintu ifingatucingilila e lyo na pa fingatuwamina. Ifi fine e fyo Yehova na o acita ku fibusa fyakwe
6. Ifyo Yehova afwa ifibusa fyakwe
Yehova alafwa ifibusa fyakwe ukushipikisha amafya. Tambeni VIDIO, lyena lanshanyeni icipusho cakonkapo.
-
Bushe Yehova ayafwile shani umwanakashi waciba muli vidio pa kuti aleke ukumfwa ububi no kusakamikwa sana?
Belengeni Esaya 41:10, 13, lyena lanshanyeni aya mepusho:
-
Finshi Yehova alaya ukucitila bonse ababa ifibusa fyakwe?
-
Bushe mulemona ukutila Yehova kuti aba cibusa musuma? Cinshi mwa-asukila ifyo?
Ifibusa fya cine balatwafwa ilyo tulekabila ukutwafwa. Yehova na o akulamwafwa
7. Tufwile ukulalanshanya na Yehova pa kuti tube ifibusa fyakwe
Abantu nga balelanshanya balaba sana ifibusa. Belengeni Amalumbo 86:6, 11, lyena lanshanyeni aya mepusho:
-
Kuti twalanda shani na Yehova?
-
Bushe Yehova alanda shani na ifwe?
Tulanda na Yehova ilyo tulepepa; Yehova na o alanda na ifwe ukubomfya Baibolo
ABANTU BAMO BATILA: “Umuntunse te kuti abe cibusa wa kwa Lesa.”
-
Lilembo nshi mwingabomfya pa kulanga umuntu ukutila kuti twaba cibusa wa kwa Yehova?
IFYO MUSAMBILILE
Yehova afwaya ukuba Cibusa wenu, kabili akamwafwa ukupalama kuli ena.
Ukupitulukamo
-
Bushe Yehova afwa shani ifibusa fyakwe?
-
Cinshi Yehova ebela ifibusa fyakwe ukwaluka muli fimo?
-
Bushe mulemona ukuti Yehova enekela ifibusa fyakwe ukucita ifintu ifyo bashingakumanisha? Cinshi mulemwena ifyo?
ISHIBILENIPO NA FIMBI
Kuti mwanonkelamo shani nga mwaba cibusa wa kwa Lesa?
“Yehova—Ni Lesa Walinga Ukwishiba” (Ulupungu lwa kwa Kalinda, February 15, 2003)
Moneni ifyo mwingacita pa kuti mube cibusa wa kwa Lesa.
Moneni ifyalengele umwanakashi umo alemona ukuti ukuba cibusa wa kwa Yehova kwalimwafwile.
Umfweni ifyo abacaice bamo balandile pa fyo bomfwa pa kuba ifibusa fya kwa Yehova.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
